Aba Galatiya 5 - Ulufingo Ulupya

Ubusatuke mwa Kilisitu

¹ U Kilisitu akatusatula ukuti tubanje babuke. Mwimaye nkani, po mutakanyamule sona ikoli ilya buzya.

² Lema amazyu ghane! Ane ne Pabuli nkunena nane ukuti nanti mwasilimulilwa, kokuti u Kilisitu ate ni mbombo kukwinyu.

³ Inkupyanizya sona pakunena ukuti nanti umuntu asilimuliwa, kokuti akonkaye Indaghilo zyosi.

⁴ Amwe mwe mukuyezya pakwinena mwebene ukuti mute ninongwa nayimoyimo pamaso pa Chala pakuzikonka Indaghilo, amwe mwisabulako mwebene kwa Kilisitu. Po mwachikana ichisa icha Chala.

⁵ Pakuti aswe tuli nu lusubilo ulwakuti u Chala adumula ukuti tute ninongwa nayimoyimo, sona ichi cho chicho tukulindilila na maka agha Muzimu Umuzelu ukwendela mu lwitiko lwitu.

⁶ Nanti tuli mwa Kilisitu u Yesu ukusilimuliwa pamo ukusita kusilimuliwa kute ni mbombo. Ichintu choka bulo chicho chapamwanya nkani lo lwitiko, lulo luli pambombo ukwendela mu lughano.

⁷ Mukachimbilagha akiza nkani. Po, we wenu akabakanizya ukuti mutakivwilaye ubwanaloli?

⁸ Ukupepekiwa kwinyu kula kutakafuma ku yuyo akubitizya, awe.

⁹ Ichilungo ichinandi bulo chikututumula ichinyenya chosi.

¹⁰ Indi nu lusubilo mwa Mwene ukuti mutakwiza pakuba ni nyinong'ono izinji. Loli umuntu yuyo akubasovya akwiza pakupokela ulufundo, napapo angaba we wenu.

¹¹ Mwee bakamu bane, loli nanti ane inchili inkulumbilila nizya kusilimula, po choni chicho inchili inkuvwimiwa? Nanti nkalumbililagha nizya kusilimula, kokuti ubulumbilili bwane nizya chipinjika icha Kilisitu ngali chite chipunulo.

¹² Nalondagha ukuti babo bakubapuvya bipase bene.

¹³ Mwee bakamu bane, mukitiziwa ukuti mubanje bantu babuke. Mutakabubombezyanje ubusatuke bwinyu ukuti mubombaye ivinyonywa ivya mubili winyu, loli mubombelanaye mulughano.

¹⁴ Pakuti Indaghilo zyosi zyimite pilamulo lyoka ili, “Umughane umupalamani wako ukuyana na mumo wiyighaniye wemwenecho.”

¹⁵ Loli nanti mukulumana nu kunyonkolana, po muchebaye ukuti pabumalilo mukwiza pakukafulana.

Tulongoziwanje muvyosi nu Muzimu Umuzelu

¹⁶ Loli chicho nkunena chakuti: Mumwitikizye u Muzimu Umuzelu ukuti abalongozye, po mutakwiza pakubomba ivinyonywa ivya buntu bwitu ubwa mbibi.

¹⁷ Pakuti ivinyonywa ivya buntu bwitu vikususannya nu Muzimu Umuzelu, sona vivyo u Muzimu Umuzelu akulonda vikususannya ni vinyonywa ivya buntu bwitu. Ivintu vibili ivi vibenganite, umwakuti utakubomba chicho ukulonda pakubomba.

¹⁸ Loli nanti mukulongoziwa nu Muzimu Umuzelu, kokuti mute pasi pa Ndaghilo izya Mozesi, awe.

¹⁹ Izyene imbombo izya buntu bwitu zili pabuzelu bulo: Ubwamalaya ni vinyonywa, nu bupopo,

²⁰ nu kwiputa ivifwani, nu bulozi, nu lubengo, nukulwa, na kabini, nu bukali nu kwiyighana nu kudalinkana nu kwipaghula,

²¹ ni nkwini, nu bwaching'wela nu bupavu, sona ni vintu ivinji. Inkubasoka sona ukuyana na mumo inkabasokela pakwanda ukuti abantu babo bakwikala bunubu batakwiza pakupyana Ubumwene ubwa Chala.

²² Loli ivikomwa ivya Muzimu Umuzelu zyo izi: Ulughano nu buhobosu, nu mutende, nu bufisalyoyo, ni chisa, nu bwiza, nu busubiliwa,

²³ nu kwiyisya sona nukwilema. Lutalipo ululaghilo nalumolumo, lulo lungasusannya ni vintu vinivi.

²⁴ Sona babo ba Kilisitu u Yesu bakomela ubuntu bwabo ubwa mbibi pachipinjika poka ni vyakulonda, sona ni vinyonywa vyache.

²⁵ Aswe twapokela ubumi mwa Muzimu Umuzelu, polelo zagha tukonke inyayo izya Muzimu Umuzelu.

²⁶ Tutakitutumulaye, pamo ukukalalizannya, pamo ukubikilana inkwini.