Aba Galatiya 2 - Ulufingo Ulupya

Nizya Pabuli na batumiwa abanji

¹ Bo ghachilapo amaka 14 inkabuka sona ku Yelusalemu poka nu Balanabasi. Inkamusenda sona nu Titi.

² Nkabuka kulakula pachifukwa chakuti u Chala akanvumbulila ukuti imbuke. Inkabalingannya abalongozi Amazyu Amiza ghagho nkalumbilila pakasi pa bantu babo bate ba Yuda. Loli nkabomba ichi kubusyefu pakuti nkanyilagha ukuti lumo imbombo yiyo nkubomba, sona yiyo nabomba kale yingaba yabulo.

³ Loli napapo umumanyani wane u Titi akaba mu Giliki, atakafyengiwa ukuti asilimuliwe.

⁴ Ifundo iyi yikanda pachifukwa icha bakamu bamo abamyasi, babo bakaba palapala. Abene bakinjila mubusyefu mukabukatila kitu ukuti batendele ubusatuke, bubo tuli nabo mwa Kilisitu Yesu, pakuti bakalondagha ukuti tubanje bazya.

⁵ Loli tutakabitikizya napo panandi bulo, umwakuti tubasungile amwe ubwanaloli ubwa Mazyu Amiza.

⁶ Loli pakunena nizya babo bakaboneka pakuba balongozi—manyi bakaba bawenu, pate ukulekana kukwane pakuti u Chala atakumulonga umuntu pakwennya bulo icheni, awe—nkunena nizya bantu babo batakasakizyapo nachimo ichintu ichipya pavintu vivyo nkalumbilila.

⁷ Loli bakennya ukuti u Chala akampa imbombo iyakulumbilila Amazyu Amiza pakasi pa bantu babo bate ba Yuda ukuyana bulo na mumo u Pitala akapeghiwa imbombo iyakulumbilila Amazyu Amiza pakasi pa ba Yuda.

⁸ Pakuti u Chala yuyo akabomba ukwendela mwa Pitala mumbombo yache iya butumiwa pakasi pa ba Yuda, we yuyo sona akabomba bunubu ukwendela mumwane mumbombo yane iya butumiwa pakasi pa bantu babo bate ba Yuda.

⁹ U Yakobo nu Pitala, sona nu Yohani bakaba ngati zyo mpanda. Abene bakazyaghannya ukuti akaba we Chala yuyo akampa ane imbombo yiniyi. Po bakasyopolana nane nu Balanabasi ukulanjizya ukuti tuli poka. Tukivwana ukuti aswe tubuke pakasi pa bantu babo bate ba Yuda, sona nukuti abene babuke kuba Yuda.

¹⁰ Ichintu chene chicho bakatulaba chikaba chakuti tubakumbuke abantu abapina, ichintu chene chicho ane inkaba nu lweke nacho pakuchibomba.

¹¹ Loli bo u Pitala iza mu Antiyokiya, inkamubuzya pamaso na pamaso ukuti akananga nkani.

¹² Pakuti bo abantu bamo babo bakatumiwa nu Yakobo batafikite, umwene akalyanga poka na bantu babo bate ba Yuda. Loli bo abantu bala bafika, akaleghukako, sona atakalyanga poka na bantu babo bate ba Yuda pakuti akanyilagha akabukatila aka bantu babo bakasilimuliwa.

¹³ Aba Yuda abanji babo bakaba bakilisitu, bakamukonka u Pitala nu buzimbuli bwache, umwakuti u Balanabasi wepe akapetuliwa nu buzimbuli bwabo.

¹⁴ Bo nennya ukuti batakubomba ukuyana nu bwanaloli ubwa Mazyu Amiza, inkamubuzya u Pitala pamaso pa bosi ukuti, “Awe we mu Yuda, loli awe wabombagha ngati po we muntu yuyo ate mu Yuda, Po ukubafyenga buli-buli abantu babo bate ba Yuda ukuti babombaye ngati po ba Yuda?”

¹⁵ Aswe twe ba Yuda pakupapiwa, sona tute twe bantu bakuzi abambibi, awe.

¹⁶ Loli tuzimenye ukuti umuntu atakuneniwa pakuba mugholosu pamaso pa Chala pakuzikonka Indaghilo, loli kwene ukwendela mu lwitiko mwa Yesu Kilisitu. Po naswe bulo tuli nu lwitiko mwa Kilisitu u Yesu, umwakuti tunganeniwa pakuba bagholosu pamaso pa Chala ukwendela mu lwitiko mwa Kilisitu, pate pakuzikonka Indaghilo pene. Pakuti nayumo umuntu yuyo anganeniwa pakuba mugholosu pamaso pa Chala pakuzikonka Indaghilo pene.

¹⁷ Loli nanti pakuyezya kwitu ukuti tuneniwe pakuba bantu bagholosu ukwendela mwa Kilisitu, tukaghiwa ukuti twe bambibi. Nkimba kokuti u Kilisitu wambombo uwa mbibi? Awe, napo panandi!

¹⁸ Nanti inkuzenga sona Indaghilo zizyo inkazimongolannya, kokuti nkwisimikizya nemwene ukuti ne munanga Ndaghilo.

¹⁹ Loli ukuyana ni Ndaghilo, ane infuye. Inkafwa ukwendela mu Ndaghilo, umwakuti ningaba ne mumi mwa Chala.

²⁰ Inkomeliwe pachipinjika poka nu Kilisitu. Po inte nene yuyo mumi, loli we Kilisitu. Ubumi bubo inkwikala muchisu ichapasi, inkwikala ukwendela mu lwitiko mu Mwana uwa Chala, yuyo anganite nukufwa pachifukwa icha nene.

²¹ Intakuchipima ichisa icha Chala pakuba chabulo. Pakuti nanti umuntu anganeniwa pakuba mugholosu pamaso pa Chala pakukonka Indaghilo, kokuti u Kilisitu akafwa pabulo!