Aba Filipi 4 - Ulufingo Ulupya

Ukubalayizya

¹ Polelo bakamu bane, imbaghanite, sona inkubasamba nkani. Amwe mwe buhobosu bwane, sona ni mpumpu yane yiyo nkwituvikizyamo. Po baghaniwa bane, mwimaye nkani mwa Mwene.

² Inkukulaba awe Yudiya nu Sintike ukuti muyezye pakwivwana pakuti mwe bakamu mwa Mwene.

³ Ee, inkukulaba nawe bulo, we mubombi wamwitu umusubiliwa, ukuti ubavwe abakolo aba, pakuti bakabomba nkani poka nane pakufumusya Amazyu Amiza, poka nu Kelementi, sona na babombi abamwitu bosi, babo amatabwa ghabo ghasimbiwe mwibuku ilya bumi.

⁴ Muhobokaye mwa Mwene utubalilo tosi. Inkupyanizya sona ukuti, “Muhobokaye!”

⁵ Akabalilo kosi mubanje bololo na bantu bosi. U Mwene ali pamulyango.

⁶ Mutakapasyanje nizya chintu chimo, loli munyiputo zyinyu zyosi, mumulabe u Chala ivyakusobelwa vyinyu nu moyo uwakupalizya.

⁷ Po umutende uwakufuma kwa Chala ghugho ghuchilite akivwisizye kosi aka muntu ghukwiza pakusunga akiza amoyo ghinyu, sona ni nyinong'ono zyinyu pakumamatilana poka nu Kilisitu u Yesu.

⁸ Mwee bakamu bane, pabumalilo inkubabuzya ukuti mubikayepo umoyo pavintu vyosi vivyo vyiza nkani, sona ni vichindamu ivi: Ivyanaloli, ni vichindamu, ni vigholosu, ni vizelu, ni vighaniwa, sona ni vyamuchizi.

⁹ Bombezya imbombo vyosi vivyo mwamanyila pamo ukupokela, pamo ukwivwa kukwane, pamo vivyo mwavyennya mumwane. Po u Chala umwenecho uwa mutende akwiza pakuba namwe.

U Pabuli akubapalizya pachifukwa icha vyabupi vyabo

¹⁰ Nahoboka nkani mubumi bwane ubwakumamatilana poka nu Mwene ukuti pabumalilo mwandapo sona pakulanjizya ukuti mukunkumbuka. Intakung'anamula ukuti mukaleka pakunkumbuka, awe, loli mutakabanga bulo na kabalilo akakulanjizizya.

¹¹ Intakunena bunubu pachifukwa chakuti nasobelwa, awe, pakuti namanyila ukwikutisiwa ni vintu vivyo indi navyo.

¹² Pakuba mupina inkumenye, sona pakuba mukabi kope bulo inkumenye. Pakuti namanyila ubusyefu ubwakwikutisiwa na vivyo indi navyo, manyi pakuba ni vyakulya ivyinji, manyi pakuba ni zala, manyi indi navyo ivyinji, manyi nkusobelwa.

¹³ Ningabomba ichintu chosi ukwendela mumwache yuyo akumpa amaka.

¹⁴ Loli chikaba chiza nkani ukuti amwe mugabane nane muntamyo zyane.

¹⁵ Amwe mwe ba Filipi mwenemwe muzimenye akiza nkani ukuti bo nafuma ku Makedoniya mumasiku aghakwanda aghakulumbilila Amazyu Amiza, chitakabako ichipanga nachimochimo chicho chikanyavwa pafundo iya ndalama, loli mwenemwe bulo.

¹⁶ Bo indi mu Tesalonika, mukantumilagha ubwavwilizi pipi-pipi, pakunyavwa muvyakusobelwa vyane.

¹⁷ Kute kokuti inkubika umoyo wane pavyabupi vyinyu vivyo mukampa, awe. Loli chicho nkulonda chakuti mupokele ulusayo pachifukwa icha chisa chinyu.

¹⁸ Naloli napokela vyosi, sona indi navyo ivyinji. Ilelo indi navyo vyosi ivyakusobelwa, pakuti u Epafulodito ampiye vivyo mukantumila. Viyanite bulo ni chakwiyipa ichamunusi umwiza, ghugho ghukumuhobosya nkani u Chala.

¹⁹ U Chala wane akwiza pakubapa ivyakusobelwa vyinyu vyosi ukuyana nu bukabi bwache ubwabuchindamu mwa Kilisitu Yesu.

²⁰ Ubuchindamu bubanje kwa Chala u Tata bwila na bwila! Ameni.

Ukulamuka ukwabumalilo

²¹ Mubalamuke abantu bosi abazelu aba Chala mwa Kilisitu u Yesu. Abakamu babo bali poka nane kuno bakubalamuka.

²² Abantu bosi abazelu aba Chala kuno, nkani-nkani aba munyumba iya Kesale bakubalamuka.

²³ Ichisa icha Mwene u Yesu Kilisitu chibanje namwe mwebosi bwila na bwila.