Aba Filipi 1 - Ulufingo Ulupya

¹ Ane ne Pabuli poka nu Timoti, aswe twe babombi aba Kilisitu u Yesu. Ukubasimbila abantu bosi abazelu aba Chala aba mu Filipi, babo ubumi bwabo bwamamatilana poka nu Kilisitu Yesu, nkani-nkani abalongozi aba chipanga, sona na bavwilizi babo.

² Ichisa nu mutende ivyakufuma kwa Chala u Tata witu, sona ni vyakufuma kwa Mwene u Yesu Kilisitu vibanje namwe.

U Pabuli akubiputila aba Filipi

³ Nkumupalizya u Chala wane akabalilo kosi kako nkubakumbuka.

⁴ Akabalilo kosi kako nkubiputila mwebosi, nkubiputila nu buhobosu.

⁵ Imbaghiye mbapalizye pachifukwa chakuti mwanyavwanga pakulumbilila Amazyu Amiza ukwandila ko kubwandilo mupaka ilelo.

⁶ Intakwilamwa napo panandi ukuti u Chala, yuyo akanda imbombo inyiza iyi mumwinyu, akwiza pakuyimalizya mupaka pisiku ilyakufika kwa Kilisitu Yesu.

⁷ Chiza nkani ukuti mbinong'onelaye bunubu, pachifukwa chakuti mwebosi muli pamoyo wane. Pakuti mwagabana nane ulusako lulo u Chala ampiye pakughimila, sona nukughikazya Amazyu Amiza, manyi indi mujele, manyi ne muntu umusatuke.

⁸ U Chala we kaboni wane ukuti nkunena ubwanaloli, bo nkunena ukuti inkubasamba nkani, sona we kaboni wane ukuti imbaghanite nkani ukuyana na mumo u Kilisitu u Yesu abaghaniye.

⁹ Nkwiputa ukuti ulughano lwinyu lwendelelaye pakukulila-kulila mukivwisizye akakufikapo, sona na muchililizi,

¹⁰ umwakuti mumanye pakusala chicho chiza. Po mukwiza pakuba mwe bantu abazelu, sona na basita chilema nachimochimo mupaka pisiku ilya Kilisitu.

¹¹ Ubumi bwinyu bukwiza pakwizula ni nkalo inyiza nkani yiyo yikwizila mwa Yesu Kilisitu. Pachifukwa chinichi abantu bakwiza pakumuchindika nukumupala u Chala.

Pakuba nubumi we Kilisitu

¹² Mwee bakamu bane, nkulonda mumanye ukuti zizyo zikangwila zikavwa nkani pakufumusya Amazyu Amiza.

¹³ Po bunubu abalindilili bosi aba munyumba iya mwene, sona na bantu bosi abanji bulo bazimenye ukuti indi mujele pachifukwa chakuti ne mubombi uwa Kilisitu.

¹⁴ Pachifukwa chakuti indi mujele, abakamu bane abinji bakujimba nkani mwa Mwene, sona bakulumbilila amazyu agha Chala umwakusita ubogha nabumo-bumo.

¹⁵ Momumo abantu bamo bakumulumbilila u Kilisitu pachifukwa chakuti bali na kabini nane, sona bakulonda ukudalinkana nane. Loli abantu bamo bakulumbilila pachifukwa icha nyinong'ono inyiza.

¹⁶ Abantu banaba bakubomba bunubu pachifukwa icha lughano pakuti bazimenye ukuti u Chala ampiye imbombo iyakughimila Amazyu Amiza.

¹⁷ Abanji batakumulumbilila u Kilisitu ni nyinong'ono inyiza, loli bakulumbilila nu moyo uwakwiyighana. Bakwinong'ona ukuti bakwiza pakumpelela intamyo inyinji nkani bo indi mujele.

¹⁸ Chite ni mbombo! Manyi bakulumbilila mubumyasi, manyi mubwanaloli, chicho chikulondiwa bulo chakuti u Kilisitu akulumbililiwa. Ihobokite bulo nacho.

¹⁹ Pakuti izimenye ukuti ukwendela munyiputo zyinyu, sona nu bwavwilizi ubwa Muzimu uwa Yesu Kilisitu, inkwiza pakusatuliwa.

²⁰ Polelo inkulindilila nu kumusubila nkani ukuti ntakwiza pakubombapo nachimo chicho chingankozya isoni. Loli inkusubila ukuti inkwiza pakujimba umoyo, umwakuti ilelo ngati bwila, u Kilisitu akwiza pakuchindikiwa mumwane, manyi mubumi, manyi mu bufwe.

²¹ Pakuti ane, ubumi we Kilisitu, sona ubufwe bope ko kukaba.

²² Loli nanti ukwendelela kwane pakuba nubumi muchisu ichapasi chikumpa ulusako ulwakuti imbombe imbombo iyakwavwa abantu abanji, po ntakuchimanya chicho ningasala.

²³ Inkuwesiwa kumbazu zyosi zibili. Kulubazu loka nkulonda nkani ukuti ngali nabuka pakwikala poka nu Kilisitu, chicho chintu chapamwanya nkani.

²⁴ Loli kulubazu ulunji, chintu chakulondiwa nkani ukuti imbanje nubumi pachifukwa icha mwemwe.

²⁵ Umwakusita ukwilamwa izimenye ukuti inkwiza pakuba nubumi. Inkwiza pakwendelela pakubavwa mwebosi ukuti ulwitiko lwinyu lukulaye nukubapa ubuhobosu ukuchila kale,

²⁶ umwakuti bo indi namwe sona, mukwiza pakuba ni vifukwa ivyakukwana ivyakwituvikizya nane mubumi bwinyu ubwakumamatilana poka nu Kilisitu u Yesu.

²⁷ Ichintu ichapamwanya chakuti, inkalo yinyu yiyane na Mazyu Amiza aghakunena nizya Kilisitu. Napapo nize kukwinyu pakubennya, pamo imbanje kubutali, nkulonda ukwivwa ukuti mukwiyula nkani nu moyo ghoka. Nkulonda ukwivwa sona ukuti umwakwivwana, sona nu mwakwavwana mukulwa inkondo pachifukwa icha kusubila Amazyu Amiza.

²⁸ Mutakabanyilaye abalwani binyu. Mubanje bajivu nkani bwila, po ichi chikwiza pakubasimikizya ukuti bakwiza pakupotwa, sona amwe mukwiza pakupota, pakuti u Chala we yuyo akubapa ubupoti.

²⁹ Pakuti mupeghiwe ulusako ulwa kumubombela u Kilisitu, te kumusubila kwene, awe, loli nukuyimba bulo pachifukwa icha yuyo.

³⁰ Namwe bulo mukulwa inkondo yilayila yiyo mukanyennya inkulwa, sona yo yiyo mukivwa ukuti inchili inkulwa mupaka nilelo bulo.