Aba Efeso 3 - Ulufingo Ulupya

Imbombo iya Pabuli pakasi pa bantu babo bate ba Yuda

¹ Pachifukwa chinichi nkubiputila amwe kwa Chala. Ane ne Pabuli indi mujele pachifukwa icha Kilisitu u Yesu, sona pachifukwa icha mwemwe mwe bantu babo bate ba Yuda.

² Naloli mwivuye ukuti u Chala muchisa chache ampiye imbombo ukuti imbombaye pakasi papinyu.

³ U Chala akanvumbulila izya kubusyefu ukuyana na mumo nasimbila kale mubupimpa.

⁴ Bo mukubelenga zinizi, mukwiza pakuzyaghannya ukuti ane nkwivwisya nizya kubusyefu ubwa Kilisitu,

⁵ zizyo zitakavumbuliwa ku bantu abankulilo izinji ukuyana na mumo zyavumbuliliwa ilelo mwa Muzimu Umuzelu, sona na batumiwa bache abazelu na balaghuzi.

⁶ Izyakubusyefu zinizi zyakuti ukwendela mu Mazyu Amiza, abantu babo bate ba Yuda bope bapokelaye ulusayo ulwa Chala poka naba Yuda. Poka sona naba Yuda bali vigaba ivya mubili ghoka, sona mwa Kilisitu u Yesu bakupokela ilayizyo ilya Chala.

⁷ Muchisa chache u Chala akampela mubombi uwa Mazyu Amiza, po pakubomba bunubu akandanjizya amaka ghache.

⁸ Napapo ne munandi nkani ukuchila abantu bosi abazelu aba Chala, pope bulo ichisa ichi chikalanjiziwa kukwane ukuti indumbilile pakasi pa bantu babo bate ba Yuda nizya bukabi ubusita impaka ubwa Kilisitu

⁹ sona nukuti imbalingannye akiza abantu bosi nizya kubusyefu zinizi, zizyo ku nkulilo inyinji zyafisiwe mwa Chala, yuyo akapela ivintu vyosi,

¹⁰ umwakuti ukwendela mu chipanga abamwene na balaghili bosi aba kumwanya baghamanye amahala aghakulekanalekana agha Chala.

¹¹ U Chala akabomba zinizi ukuti imbatiko zyache izya bwila na bwila zibombiwanje, zizyo akayanizya zila mwa Kilisitu u Yesu u Mwene witu.

¹² Ukwendela mwa Kilisitu, sona nu kwendela mulwitiko lwitu mumwache tungajimba pakupalamila kwa Chala umwakusita ukwilamwa.

¹³ Po losi ulu inkubalaba ukuti mutakanyokele kwisinda pachifukwa ichakubayimbila, chicho buchindamu bwinyu.

Ulughano ulwa Kilisitu

¹⁴ Pachifukwa ichi, losi ulu inkumufughamilila u Tata,

¹⁵ yuyo akalwita itabwa lyache uluko losi ulwa kumwanya ni chisu ichapasi.

¹⁶ Nkwiputa ukuti ukufuma mu bukabi bwache ubwa buchindamu angabapa amaka mwa Muzimu wache Umuzelu ukuti amoyo ghinyu ghabanje na maka

¹⁷ umwakuti u Kilisitu ikale mumoyo ghinyu ukwendela mu lwitiko, nkwiputa sona ukuti mwisimike na magululuzi ghinyu nukuti mwikalane mulughano.

¹⁸ Nkwiputa ukuti amwe poka na bantu abazelu aba Chala mubanje na maka aghakwivwisya mumo bubeleye ubukulu nu butali, sona nu bwibizu ubwa lughano ulwa Kilisitu.

¹⁹ Naloli nkwiputa ukuti mumanye ulughano lula ulwa Kilisitu, lulo lwapamwanya nkani ukuchila amahala agha bantu, ukuti mwizuziwe umwakufikapo nubumi ubwa Chala.

²⁰ Ubuchindamu bubanje kwa Chala, yuyo na maka ghache, ghagho ghali pambombo mumwitu angabomba ivintu ivyinji ivisita kubelengiwa nukuchila vivyo tungalaba pamo ukuvyinong'ona.

²¹ U Chala apokele umuchizi ughu muvipanga, sona na mwa Kilisitu u Yesu ku nkulilo zyosi, bwila na bwila! Ameni.