3 Yohani 1 - Ulufingo Ulupya

¹ Ane ne songo uwa chipanga. Inkumusimbila umumanyani wane umughaniwa u Gayi, yuyo imughanite nkani.

² Wee mumanyani wane umughaniwa, nkwiputa ukuti vyosi vikwendele akiza, sona nukuti umubili wako ghubanje akiza ukuyana na mumo ubeleye mumuzimu.

³ Inkahoboka nkani, bo abakamu bamo biza nukundingannya ukuti ukwendelela pakuba musubiliwa nukukonka ubwanaloli.

⁴ Chitalipo nachimo ichintu chicho chikunhobosya nkani ukuchila ukwivwa ukuti abana bane bakukonka ubwanaloli.

U Gayi akupaliwa

⁵ Wee mughaniwa wane, we musubiliwa nkani ni mbombo yiyo ukubabombela abakamu bako, napapo bakaba bayeni.

⁶ Abene bakachibuzya ichipanga kuno nizya lughano lwako. Chizapo ukuti ubavwe pakwendelela nu bulendo bwabo umwakumuhobosya u Chala.

⁷ Pakuti bakanyamuka ubulendo bwabo pachifukwa icha mbombo iya Kilisitu, ukusita ukupokela ivyabupi ivya bantu abakuzi.

⁸ Po, aswe twe bakilisitu tubavwe abantu banaba, umwakuti tungasendepo ichigaba mumbombo yabo iyakufumusya ubwanaloli.

Nizya Diyotilefesi nu Demetiliyo

⁹ Inkachisimbila ichipanga ukalata umupimpa bulo, loli u Diyotilefesi yuyo ighanite nkani pakuba mulongozi, atakulonda pakutwivwila.

¹⁰ Po nanti niza, inkwiza pakukumbusya imbombo zizyo akubomba, iyebo na mazyu aghabumyasi mupaka nukufika pakukana ukubapokela abakamu bitu. Akubakanizya abantu babo bakulonda pakubapokela nukubepusyamo muchipanga.

¹¹ Mwee bamanyani bane abaghaniwa, mutakeghelelaye chicho chibibi, loli mweghelelaye chicho chiza. Umuntu wesi yuyo akubomba ichiza mwana uwa Chala. Loli umuntu wesi yuyo akubomba ichibibi atamwenizyepo u Chala.

¹² Umuntu wesi akumupala u Demetiliyo. Zizyo akubomba zikumusimikizizya ukuti zizyo abantu bakunena zyanaloli.

Amazyu aghabumalilo

¹³ Indi navyo ivyinji ivyakukubuzya, loli intangavisimba mwakalata uyu.

¹⁴ Inkusubila pakukwennya losi ulu, sona tukwiza pakunenezannya pamaso na pamaso.

¹⁵ Umutende ghubanje nawe. Abamanyani bosi kuno bakukulamuka. Ubalamukeko abamanyani bosi kunuko pakubatambula amatabwa ghabo.