2 Aba Kolinti 7 - Ulufingo Ulupya

¹ Mwee bamanyani bane abaghaniwa, pakuti twaba na malayizyo ghosi ghanagha, zagha twisuke twebene ku vintu vyosi vivyo vikunyazya umubili pamo amoyo ghitu, nukwipela twebene pakuba bantu abazelu, sona nukuba bantu abakumunyila u Chala.

U Pabuli ahoboka

² Twighulile amoyo ghinyu. Tutamunangiyepo nayumo umuntu, pamo ukumunyazyapo nayumo umuntu, pamo ukumuchevya nayumo umuntu.

³ Intakunena zinizi pakubasusya, awe. Pakuti ukuyana na mumo ineneye pakwanda, amwe mwe baghaniwa bitu, umwakuti tuli bwila poka namwe, manyi tuli nubumi pamo twafwa.

⁴ Imbasubiye nkani, nkwituvikizya nkani mumwinyu! Muntamyo zyitu zyosi inchili nizuye nu bujivu nkani, sona ihobokite nkani.

⁵ Napapo bulo bo twafika mu Makedoniya, tutakatuzyapo. Loli tukakomana ni ntamyo posi na posi, ivyongo na bantu, sona ubogha bukaba mumoyo ghitu.

⁶ Loli u Chala, yuyo akusangalusya abantu babo bawa amaka, akatusangalusya nukwiza kwa Titi.

⁷ Kutakaba ukwiza kwache kwene kuko kukatusangalusya, loli pachifukwa icha kumusangalusya kwinyu. Akatubuzya namumo mukansambila, ichitima chicho mukuba nacho, sona na mumo mukiyanizya pakumpoka ane, po cho chifukwa ihobokite nkani.

⁸ Napapo ukalata wane akabapela pakuba ni chitima, inte ni chitima ukuti inkasimba ukalata yula. Inkaba ni chitima bo nennya ukuti ukalata yula akubapela pakuba ni chitima akabalilo akanandi.

⁹ Loli ilelo ihobokite nkani—te pachifukwa chakuti inkabapela pakuba ni chitima, awe, loli pachifukwa chakuti ichitima chinyu cho chicho chikabapela ukuti mupinduke. Pakuti mukaba ni chitima ukuyana na mumo u Chala akalondelagha, po bunubu tutakabavulazyapo.

¹⁰ Pakuti ichitima chicho chikubombeziwa nu Chala chikubapela ukuti mupinduke nukupokiwa. Loli ichitima icha muchisu ichapasi chikupela ubufwe.

¹¹ Ennya mumo ivikomwa ivya chitima icha mwa Chala zikabombela mumwinyu. Chabapa ulweke ulukulu, chabapa amaka nkani pakusimikizya ukuti mutanangitepo, chabakalalizya nkani, sona chabapelela ubogha ubukulu. Chabapa inyota ukuti munyennye, sona chabapa ulweke ukuti munzighilile, sona ukufunda abambibi. Pabuyo bosi mwisimikila mwebene ukuti inongwa iyi yitakubapalamasya.

¹² Po napapo inkabasimbila amwe ukalata yula, chite chifukwa icha yuyo akananga, pamo chifukwa icha yuyo akamunangila, awe. Loli inkabasimbila ukalata yula, umwakuti imbalanjizye pamaso pa Chala ichisa chinyu ichikulu papitu.

¹³ Polelo twasangalusiwa nkani. Ukonjelezya pa busangalusu bwitu tukahoboka nkani nu busangalusu ubwa Titi pakuti mwebosi mukamusangalusya.

¹⁴ Pakuti nkituvikizyanga kukwache nizya amwe, sona nukuti mutankozya isoni. Zyosi zizyo tukanena namwe zyanaloli, po ukwituvya kwitu nizya amwe kwa Titi kwalanjizya pakuba kwanaloli.

¹⁵ Nkani-nkani ulughano lwache lukulu nkani papinyu, bo akukumbuka ukwivwila kwinyu mwebosi, sona nukuti mukamupokela nu bogha, sona nukutetema.

¹⁶ Ihobokite nkani pachifukwa chakuti imbasubiye nkani.