2 Aba Kolinti 6 - Ulufingo Ulupya

¹ Pakuti tukubomba imbombo poka nu Chala, tukubalaba ukuti mutakachipokelaye ichisa icha Chala ngati po chintu chicho chite ni mbombo.

² U Chala akuti, “Pakabalilo kane akakubapokela, inkabivwa. Sona pisiku ilya bupoki inkwiza pakubavwa.” Teghelezya! Aka ko kabalilo akakupokelela ichisa icha Chala. Ilelo lisiku ilya bupoki.

³ Aswe tutakubika ichipunulo muzila iya muntu nayumo, awe, umwakuti mumbombo yitu mutakaghiwemo ichibibi nachimochimo.

⁴ Loli muvintu vyosi tukulanjizya ukuti aswe twe babombi aba Chala pakujimba muntamyo, na mumayimba, sona na mububavu.

⁵ Twakomiwa, twighaliliwa mujele nukuvulaziwa muvyongo. Twabomba ukuchila amaka ghitu nukusita ukughona utulo pamo ukulya.

⁶ Aswe twalanjizya nu moyo witu umwiza, nu bumanyi bwitu, nu bufisalyoyo bwitu, sona ni chisa chitu, ukuti twe babombi aba Chala. Twalanjizya na maka agha Muzimu Umuzelu, sona nu lughano lwitu ulwanaloli,

⁷ na mazyu ghitu aghanaloli, sona na maka agha Chala. Twalanjizya ni vilwilo ivigholosu kunyobe indilo, sona na kumongo.

⁸ Twalanjizya ukwendela mu buchindamu nu musamu; ukwendela mu ntuko na mapalo, loli pope bulo tukunena ubwanaloli.

⁹ Napapo tutamanyikitwe, loli tumanyikitwe. Napapo tuyanite na bantu abafwe, loli twe bumi ukuyana na mumo mukutwenezezya. Napapo tukufundiwa, loli tutakughoghiwa.

¹⁰ Napapo bakutupela pakuba ni chitima bwila na bwila, loli tukuhoboka nkani. Napapo tuyanite bulo na bantu abapina, loli tukubapela abantu abinji pakuba bakabi. Napapo tuyanite bulo na bantu abapotwe, loli tuli navyo vyosi.

¹¹ Mwe bantu aba mu Kolinti mwee! Twanena mubusatuke bosi kukwinyu, sona twighula amoyo ghitu.

¹² Tute sweswe twighalila amoyo ghitu kukwinyu, awe, loli amwe mwemwe mwighalila amoyo ghinyu kukwitu.

¹³ Nkunena namwe ngati po nkunena na bana bane ukuti namwe bulo mwighule amoyo ghinyu.

Muchebaye na bantu abakuzi

¹⁴ Mutakangalilanaye na bantu abakuzi. Nkimba bukamu boni bubo bulipo pakasi pa bugholosu nu bubibi? Fwandi, bumanyani boni bubo bulipo pakasi pachisi nu lukozyo?

¹⁵ Nkimba u Kilisitu nu Satana bangayana buli-buli? Pamo umuntu umukilisitu nu muntu yuyo ate mukilisitu bali nacho choni chicho chiyanite bulo?

¹⁶ Nkimba Inyumba iya Chala yingayana buli-buli ni vifwani? Pakuti aswe twe Nyumba iya Chala umumi, ukuyana na mumo u Chala umwenecho akanenela akati, “Inkwiza pakwikalana mumwabo, sona nukwikala pakasi papabo. Inkwiza pakuba we Chala wabo, po abene bakwiza pakuba bantu bane.”

¹⁷ Polelo u Mwene akuti, “Fumako kukwabo sona mwipaghule. Mutakapalamasyanje nachimo ichintu chicho chinyazu, po inkwiza pakubapokela.

¹⁸ Nkwiza pakuba ne ghuso, amwe mukwiza pakuba mwe bana bane abalumendo na balindu, momumo akunenela u Mwene u Chala Uwamaka Ghosi.”