2 Aba Kolinti 11 - Ulufingo Ulupya

U Pabuli na batumiwa abamyasi

¹ Nalondagha ukuti ngali mwanfisilagha ilyoyo panandi nu bupunganu bwane ubu. Nalamba munfisile ilyoyo!

² Indi nu buzuba namwe ukuyana na mumo u Chala abeleye namwe nu buzuba. Pakuti inkabazingilila kwa Kilisitu ngati mulindu yuyo atamumenye nalumo umwanavuli.

³ Indi nu bogha ukuti inyinong'ono zyinyu zikwiza pakuzimbuliwa ukuyana na mumo u Eva akazimbuliliwa nu buchevu ubwa njoka ukuti mutakabe bantu aba bwanaloli, sona nukwiyipa kwa Kilisitu.

⁴ Pakuti nanti yumo akwiza kukwinyu nukulumbilila u Yesu uyunji, yuyo alekanite nu Yesu yuyo tukalumbilila, pamo nanti mwapokela umuzimu ghugho ghulekanite nu Muzimu Umuzelu yuyo mukapokela, pamo amazyu aghanji ghagho ghalekanite na Mazyu Amiza ghagho mukaghitika, mukughivwila lubilolubilo nkani.

⁵ Naloli izimenye ukuti ane inte ne munandi uwabumalilo napo panandi pa batumiwa babo abantu bakuti bapamwanya nkani.

⁶ Napapo ne mwana mukanenele, loli amahala ghalimo. Twabalanjizya akiza nkani zinizi muvintu vyosi.

⁷ Nkimba yikaba mbibi kukwane ukwiyisya nemwene, umwakuti imbakwezye amwe pakulumbilila Amazyu Amiza agha Chala kukwinyu ukusita ukundipilapo indalama yimo?

⁸ Nkabombagha ngati po nkuvifyula ivipanga ivinji pakupokela ubwavwilizi bwabo, umwakuti imbavwe amwe.

⁹ Pakabalilo kako inkaba namwe, sona bo nasobelwa, intakamutamyapo nayumo umuntu, pakuti abakamu babo bakafuma mu Makedoniya bakampa ivyakusobelwa vyane. Po inkikanizya nemwene, sona inkwiza pakwikanizya nemwene ukuti ntakabatamyepo nalumo.

¹⁰ Pakuti ubwanaloli ubwa Kilisitu buli mumwane, amituvyo ghane agha ghatakwiza pakukaniziwapo nalumolumo muvigaba ivya Akaya.

¹¹ Po choni? Nkimba chifukwa ichakuti ntabaghanite? U Chala umwenecho azimenye ukuti imbaghanite.

¹² Sona chicho nkubomba inkwiza pakwendelela pakuchibomba, umwakuti ntakabape ulusako abatumiwa abanji bala ulwakwituvikizya nukuti bakubomba vivyo aswe tukubomba.

¹³ Pakuti abantu banaba batumiwa abamyasi, abambombo abazimbuli, babo bakwifwanikizya bene ngati po batumiwa ba Kilisitu.

¹⁴ Sona chite chakuswighizya nkani, awe, pakuti nu Satana bulo akwifwanikizya mwene ngati po wantumi uwa lukozyo.

¹⁵ Po chite chiyeni nanti ababombi bache bope bakwifwanikizya bene ngati po bambombo ba bugholosu. Ubumalilo bwabo bukwiza pakuyana bulo ni mbombo zyabo.

U Pabuli akwituvya nizya butumiwa bwache

¹⁶ Inkwandizya pakunena nkuti: Nayumo umuntu atakampimaye pakuba ne mupunganu. Loli nanti amwe mukumpima ngati po ne mupunganu, mumpokelaye pakuba ne mupunganu, umwakuti ningituvya panandi bulo.

¹⁷ Zizyo nkunena losi ulu ntakunena nu bulaghili ubwa Mwene, awe, loli inkwituvya bulo ngati po ne mupunganu.

¹⁸ Loli pakuti balipo abinji nkani babo bakwituvya ni vintu ivya muchisu ichapasi, po nane inkwiza pakwituvya.

¹⁹ Amwe mukuti mwe bantu abamahala nkani, loli mukubennya bulo abapunganu bakubomba zizyo bakulonda.

²⁰ Pakuti mukwennya bulo nanti umuntu akubapima ngati po mwe bazya, pamo pakubafyula ivintu vyinyu, pamo pakubachevya, pamo pakubayivya, pamo pakubakoma kumaso.

²¹ Indi ni soni ukwitika ukuti aswe tutakaba bajivu nkani ukuti tungabomba zinizi. Loli nanti umuntu wesi akujimba nkani ukwituvya ni chintu chimo—ane nkunena ngati po ne mupunganu—nane bulo ne mujivu ukwituvya ni chintu chilachila.

²² Nkimba abene Bahebeli? Po nane ne mu Hebeli. Nkimba abene ba Izilayeli? Po nane ne mu Izilayeli. Nkimba abene baluko ulwa Abulahamu? Po nane ne waluko ulwa Abulahamu.

²³ Nkimba abene babombi aba Kilisitu? Nkunena ngati po ne chipena, ane ne mutumiwa ukubachila abene. Nabomba nkani imbombo ukubachila abene, sona akabalilo akinji nighaliliwa mujele. Inkasyempiwa ni nkomwa izyakusita kubelengiwa, sona nukukomana ni ntamyo izya bufwe kabilikabili.

²⁴ Inkafundiwa naba Yuda ka fayivi pakusyempiwa ni nkomwa 39.

²⁵ Inkafundiwa naba Loma katatu pakukomiwa ni ndisa, sona koka nkasumbiwa na mabwe. Ubwato bwitu ubukulu nkani bukapangunkana mumizi katatu, pamusanya na pabusiku inkambama pakasi panyanja.

²⁶ Mu mabulendo ghane aminji nakomana ni ntamyo izya ukwizula kwa soko, na mavyondongo. Nkakomana ni ntamyo pachifukwa icha abantu abaluko ulwane nu lwane, sona pachifukwa icha abantu babo bate ba Yuda. Nakomana ni ntamyo mutwaya na munkolongo, sona nakomana ni ntamyo panyanja. Nkakomana ni ntamyo izya bamanyani abamyasi.

²⁷ Nakomana ni ntamyo izyakulekanalekana. Kabili-kabili nkabomba nu kwiyula nkani, sona inkachelezya ubusiku bosi. Inkaba ni zala ni nyota, sona akabalilo akinji nkikalagha ukusita ichakulya. Impepo yankatazizye, sona inkaba nkule.

²⁸ Ukonjelezyapo pavintu vyosi vinivi, isiku ni siku nkutamiwa ni mbombo iyakusungilila ivipanga vyosi.

²⁹ Nanti umuntu yumo mudedebazu, nkimba nane bulo ntakuba mudedebazu? Nanti umuntu yumo akupeliwa pakunanga, nkimba nane bulo chitakumbaba mumoyo?

³⁰ Nanti imbaghiye pakwituvya, inkwiza pakwituvya ni vintu vivyo vikulanjizya ubudedebazu bwane.

³¹ U Chala, sona Uwise uwa Mwene witu u Yesu, yuyo abaghiye pakuchindikiwa bwila na bwila, azimenye ukuti ane ntakutamanta.

³² Bo indi mu Damasika, umwimilili uwa chigaba chila, yuyo akaba pasi pa bulaghili ubwa Mwene u Aleta akabika abalindilili pamilyango iya kaya akakulu nkani ukuti bandeme.

³³ Loli bakanyisizya muchidudunga ukwendela pibwindo lilyo likaba palubumba ulwa lupaso nukufyuntumuka munyobe zyache.