1 Yohani 2 - Ulufingo Ulupya

U Kilisitu we Mufusya witu

¹ Mwe bana bane, inkubasimbila zinizi umwakuti mutakabombaye imbibi. Loli nanti umuntu yumo akubomba imbibi, tuli nawe Umufusya yuyo akutunenela kwa Tata mubuzilo bwitu, yuyo we Yesu Kilisitu, umugholosu.

² Umwene we chakwiyipa ichakuhobokeleliwamo imbibi zyitu. Atakutuhobokela imbibi zyitu zyene, awe, loli ni mbibi zyope izya bantu bosi aba muchisu ichapasi.

³ Nanti tukukonka amalamulo agha Chala, kokuti chikulanjizya ukuti tuli nu lusubilo ulwakuti tumumenye.

⁴ Umuntu wesi yuyo akuti, “Imumenye u Chala” loli atakukonka amalamulo ghache, kokuti umuntu yula mumyasi, sona mumwache butalimo ubwanaloli.

⁵ Loli nanti umuntu akwivwila amazyu agha Chala, kokuti ulughano ulwa Chala lwaba lwakufikapo mumwache. Ichi cho chicho chikutusimikizya ukuti tumamatilanite poka nu Chala.

⁶ Umuntu wesi yuyo akwinena mwene ukuti ali mwa Chala, endaye ukuyana na mumo u Yesu akendelagha.

Ilamulo Ilipya

⁷ Mwe baghaniwa bane amwe, ilamulo lilyo indi pakubasimbila lite lipya, awe, loli lilamulo likali ukwandila ko kubwandilo. Ilamulo ilikali gho mazyu ghagho mughivuyepo kale ukwandila ko kubwandilo.

⁸ Loli indi pakubasimbila ilamulo ilipya. Ubwanaloli bwache bukuboneka mumwache sona mumwinyu, pakuti ichisi chikumala, ulukozyo ulwenecho lwandite kale pakulama.

⁹ Umuntu wesi yuyo akwinena mwene ukuti ali mulukozyo, loli amubengite umukamu wache, kokuti achili ali muchisi.

¹⁰ Umuntu wesi yuyo amughanite umukamu wache, kokuti ali mu lukozyo, sona mumwache chitalimo nachimochimo chicho chingamupunuzya.

¹¹ Loli nanti umuntu amubengite umukamu wache, kokuti achili ali muchisi. Akwenda muchisi sona atakumanya na kuko akubuka, pachifukwa chakuti ichisi chamupela pakuba mufwamaso.

¹² Inkubasimbila amwe mwe bana bane, mwe imbibi zyinyu zyahobokeliwa pachifukwa icha vivyo u Kilisitu akabomba.

¹³ Nkubasimbila amwe mwe batata, pachifukwa chakuti mumumenye yuyo akabako ukwandila ko kubwandilo. Nkubasimbila amwe mwe balumendo, na mwe balindu pachifukwa chakuti mwamupota Umubibi yula.

¹⁴ Nkubasimbila amwe mwe bana pachifukwa chakuti mumumenye u Tata. Nkubasimbila amwe mwe batata, pachifukwa chakuti mumumenye yuyo akabako ukwandila ko kubwandilo. Nkubasimbila amwe mwe balumendo na mwe balindu, pachifukwa chakuti muli na maka. Amazyu agha Chala ghali mumwinyu, sona mwamupota Umubibi yula.

¹⁵ Mutakachighanaye ichisu chapasi, pamo ichintu chosi chicho icha muchisu ichapasi. Nanti muchighanite ichisu chapasi, kokuti mutamughanite u Tata.

¹⁶ Vilipo ivintu ivyinji ivya muchisu ichapasi vivyo vyo ivi: Ivinyonywa ivibibi ivya buntu, ivintu vivyo amaso ghakuvyennya nukuvinyonywa, ukwitutumula nu bukabi bubo tuli nabo. Ivintu vyosi vinivi vite vya kwa Tata, loli vintu bulo ivya muchisu ichapasi.

¹⁷ Ichisu chapasi na vyosi vivyo abantu bakuvinyonywa vikumala. Loli umuntu wesi yuyo akubomba ubwighane ubwa Chala akuba nubumi ubwa bwila na bwila.

Umulwani uwa Kilisitu

¹⁸ Bana bane ubumalilo buli papipi! Amwe mukivwa ukuti Umulwani uwa Kilisitu akwiza. Losi ulu abalwani abinji aba Kilisitu baboneka kale, po zinizi zikutusimikizya ukuti ubumalilo buli papipi.

¹⁹ Naloli abantu banaba batakaba ba kabukatila kitu, cho chifukwa bakatuchimbila. Nanti bakabanga ba kabukatila kitu, ngali batakatuchimbila. Loli bakatuchimbila umwakuti chiboneke pabuzelu ukuti naloli atakabapo nayumo umuntu yuyo akaba uwa kabukatila kitu.

²⁰ Loli amwe mukapakaziwa nu Muzimu Umuzelu, polelo mwebosi mubumenye ubwanaloli.

²¹ Inkubasimbila, chite chifukwa ichakuti mutabumenye, ubwanaloli, awe, loli pachifukwa chakuti mukubumanya, sona muzimenye ukuti ubumyasi butangaghiwa mubwanaloli.

²² Polelo nkimba we wenu umuntu umumyasi? Umuntu umumyasi we yuyo akunena ukuti u Yesu ate we Mupoki umusaliwa yula. Umuntu yunuyu we mulwani uwa Kilisitu, pakuti akumukana u Wise nu Mwana bulo.

²³ Pakuti umuntu wesi yuyo akumukana u Mwana, akumukana nu Wise bulo. Umuntu yuyo akumwitika u Mwana, akumwitika nu Wise bulo.

²⁴ Polelo mwendelele pakughasunga amazyu ghagho mukivwa ukwandila ko kubwandilo. Nanti mukughasunga amazyu ghagho mukivwa ukwandila ko kubwandilo, kokuti mukwiza pakwikala pakumamatilana poka nu Mwana nu Tata bulo.

²⁵ Chicho akatulayizya aswe bo bumi ubwa bwila na bwila.

²⁶ Inkubasimbila amwe zinizi ukuti imbasoke nizya bantu babo bakuyezya pakubasovya.

²⁷ Loli amwe mukapakaziwa nu Muzimu Umuzelu. Pene papo Umuzimu Umuzelu yuyo ikwikala mumwinyu umwakuti chitakulondiwa sona ukuti umuntu yumo abamanyizye. Pakuti u Muzimu wache Umuzelu akubamanyizya nizya vintu vyosi, sona vivyo akumanyizya vyanaloli, vite vyabumyasi, awe. Po ivwila ubumanyisi ubwa Muzimu ukuti mwikale mukumamatilana poka nu Kilisitu.

²⁸ Polelo bana bane, mumamatilane poka nawe, umwakuti bo akuboneka, tubanje bajivu nkani, sona nukuti tutakakoziwe isoni, bo akwiza sona.

²⁹ Nanti muzimenye ukuti u Kilisitu mugholosu, kokuti muzimenye sona ukuti umuntu wesi yuyo akubomba ubugholosu, mwana uwa Chala.