1 Timoti 6 - Ulufingo Ulupya

¹ Abantu bosi babo bazya babachindikaye nkani abamwene babo, umwakuti nayumo umuntu atakalisamule itabwa ilya Chala, sona ni vimanyisyo vyitu.

² Abazya babo abamwene babo bitiki, batakabapepulaye, pachifukwa chakuti bakamu babo mwa Yesu. Loli bababombelaye akiza nkani, pakuti bo bitiki, babo bakukabapo ni mbombo yabo, sona babaghanite. Ubaghiye umanyizye nukulumbilila ivintu ivi.

Nizya chimanyisyo icha bumyasi nu bukabi ubwanaloli

³ Nanti umuntu yumo akumanyizya ichimanyisyo ichakulekana ni vintu ivi, sona atakwivwana na mazyu aghanaloli agha Mwene, u Yesu Kilisitu ni vimanyilo ivya chiputo chitu.

⁴ Umuntu wesi yuyo akumanyizya ivintu vinivi wamituvyo, sona atamenye nachimochimo. Umoyo wache mubine, akudalinkana-dalinkana nizya mazyu, zizyo zikwiza na kabini, ni vyongo, ni ntuko, nukwinong'onelana ivibibi.

⁵ Abantu banaba bakudalinkana na bantu babo inyinong'ono zyabo nyonganu, sona babo batabumenye ubwanaloli. Bakwinong'ona ukuti ukwiputa kwa Chala yo zila yimo iyakukabilapo indalama.

⁶ Ukwiputa kwa Chala, naloliloli kukumupela umuntu pakuba mukabi, nanti akwikuta na vivyo ali navyo.

⁷ Pakuti tutakiza nacho chimo muchisu ichapasi, po tutangasenda nachimochimo, bo tukwepamo muchisu ichapasi.

⁸ Loli nanti tuli ni chakulya na menda, vyo twikutisiwanje navyo.

⁹ Loli abantu babo bakulonda ubukabi, bakuwila munjelo, sona na muchipingo icha chinyonywa icha bupunganu ni chakuvulazya, chicho chikubabika abantu mukunanganika na mukuzimila.

¹⁰ Pakuti ukuzighana indalama yo mpenya iya mbibi izya kulekana-lekana. Pachifukwa icha kuzighana indalama, abantu bamo baluleghuka ulwitiko lwabo, nukwivulazya mumoyo ghabo ni vyakubaba ivikulu nkani.

Ukulwa inkondo inyiza iya lwitiko

¹¹ Loli awe, we mubombi uwa Chala uvileghuke ivintu vyosi vinivi. Ubanje nu moyo uwakubulondelezya ubugholosu, nukumunyila u Chala, nu lwitiko, nu lughano, nu bufisalyoyo, sona nu bololo.

¹² Lwanga inkondo inyiza iya lwitiko, mupaka upokele ubumi ubwa bwila na bwila, bubo ukitiziwako, bo witika ulwitiko lwako pamaso pa bakaboni abinji.

¹³ Pantazi pa Chala, yuyo akupa ubumi ivintu vyosi, sona na pamaso pa Kilisitu u Yesu, yuyo akitika ulwitiko pamaso pa Pontiyo Pilati, nkukulamula ukuti

¹⁴ ukonke indaghilo zyosi zinizi, sona nukuzisunga akiza mupaka papo u Mwene witu u Kilisitu u Yesu aboneka sona.

¹⁵ Ukuboneka kwache kukwiza pakulanjiziwa pakabalilo kache akiza, kako kakayaniziwa nu Chala, umusayiwa, sona yuyo Mulaghili mwene, Usongo uwa basongo, sona nu Mwene uwa bamwene.

¹⁶ U Chala mwene bulo atakufwapo nalumo, sona akwikala mu lukozyo lulo nayumo umuntu angapalamilako. Nayumo umuntu yuyo amwenizyepo pamo angamwennya. Kukwache kubanje umuchizi na maka bwila na bwila. Ameni.

¹⁷ Ubabuzye babo bakabi muchisu ichapasi ukuti batakituvyanje, pamo ukubika ulusubilo lwabo mu bukabi ubwa muchisu ichapasi, bubo butakumanyikwa bwiza. Loli babike ulusubilo lwabo mwa Chala, yuyo akutupa ivintu vyosi umwakusita ukumamilizya ukuti twilaghaye navyo.

¹⁸ Ubabuzye ukuti babombaye imbombo inyiza, nukuba bakabi mumbombo inyiza, nukusita pakuba bamama, sona nu kwiyannya pakugabana ivintu vyabo na bantu abanji.

¹⁹ Pakubomba bunubu bakwiza pakwilundikila bene ubukabi bubo bukwiza pakuba lwalo ulukafu nkani, sona nu lusita ukumala, lulo lukwiza pakubavwa muntazi ukuti bapokele ubumi ubwenecho.

²⁰ Wee Timoti, usunge akiza vivyo ukapeghiwa ukuti usunge. Ughaleghuke amazyu amasita mbombo, sona nukudalinkana kwa bupunganu, vivyo abantu abamyasi bakuti gho mahala.

²¹ Pakuti abantu bamo banenite ukuti bali na mahala ghanagha, po cho chifukwa baluleghuka ulwitiko lwabo. Ichisa icha Chala chibanje namwe mwebosi.