1 Timoti 2 - Ulufingo Ulupya

Nizya kwiputa muchipanga

¹ Po ichakwanda, inkubalaba ukuti mubiputilaye, mubalambilizizyanje, mubalabilaye, nukumupa amapalo u Chala pachifukwa icha abantu bosi.

² Pakuti umu mo mumo tubaghiye tubiputilaye aba mwene, sona na balaghili bosi umwakuti twikalaye nubumi ubwakufwasa nu mutende, nukumuchindika u Chala muvintu vyosi, sona ni nkalo inyiza.

³ Ichi chiza, sona chikumuhobosya nkani u Chala Umupoki witu,

⁴ yuyo akulonda ukuti abantu bosi bapokiwe, sona nukuti babumanye ubwanaloli.

⁵ Pakuti pali u Chala weka, nu Mufusya weka bulo, yuyo akusayannya abantu nu Chala, umuntu yunuyu we Kilisitu Yesu.

⁶ Akiyipa mwene ukuti abasatule abantu bosi. Ichi chikaba chisimikizyo pakabalilo kache akiza.

⁷ Ichi cho chifukwa inkasaliwa pakuba ne mulumbilili, nu mutumiwa, sona nu mumanyisi uwa lwitiko ulwanaloli uwa bantu babo bate ba Yuda. Nkunena ubwanaloli, ntakutamanta, awe.

⁸ Nkulonda ukuti posi na posi abanavuli babo bapaghuliliwe kwa Chala, biputaye umwakukwezya inyobe zyabo izelu mumwanya umwakusita ukukalala, pamo ukususannya.

⁹ Nkulonda sona ukuti abakolo bavwalaye umwakwichindika, nu mwamahala, sona akiza. Batakilanjizyanje pakuluka isisi zyabo, pamo pakuvwala ivya golide, pamo pakuvwala amambo aghamutengo, pamo amenda agha pamwanya.

¹⁰ Loli bilanjizyanje bene ni mbombo inyiza zizyo bakubomba, pakuti abakolo babo bakumwiputa u Chala babombaye bunubu.

¹¹ Abakolo bateghelezyanje, nukumanyila umwachimyemye bulo, sona nu mwakwiyisya.

¹² Intakubitikizya abakolo pakumanyizya, pamo pakuba nu bulaghili pa banavuli, loli babanje bulo myee.

¹³ Pakuti u Adamu we yuyo akaba wakwanda pakupeliwa, po pakiza u Eva.

¹⁴ Po atakaba we Adamu yuyo akazimbuliwa, loli akaba mukolo yuyo akazimbuliwa nu kunanga indaghilo izya Chala.

¹⁵ Loli umukolo akwiza pakupokiwa ukwendela pakupapa abana nanti akwendelela pakuba nu lwitiko, nu lughano, nu moyo umuzelu, sona nu wakwichindika.