1 Pitala 3 - Ulufingo Ulupya

Nizya bachi na balume

¹ Umwakuyana bulo, namwe mwe bachi mubalambilaye abalume binyu, umwakuti nanti balipo abantu bamo babo batakusubila amazyu agha Chala, badebiwanje ni nkalo iya bachi ukuti basubile,

² pakuti bakwiza pakwennya inkalo yinyu inyiza ni zelu.

³ Akabonekele kinyu akiza katakabanje kakuzi kene, ngati ukuyannya isisi lyinyu, pamo ukuvwala indelebele izya golide, pamo ukuvwala amenda aghamutengo.

⁴ Loli akabonekele kinyu akiza kabanje ka muntu uwa mukasi. Aka ko kabonekele akiza akenecho kako katakuchuja, aka muzimu umololo, sona nu wamyee, ghugho wamutengo nkani pamaso pa Chala.

⁵ Pakuti umu mo mumo abakolo abazelu abakali babo bakamusubila u Chala bakipelagha bene pakuboneka akiza pakubalambila abalume babo.

⁶ Umu mo mumo u Sala akabela, akamwivwila u Abulahamu nukumwitizya ukuti umwene wache. Ilelo amwe mwe bana bache abalindu nanti mukubomba ingolosu, sona mutakunyila nachimochimo.

⁷ Umwakuyana bulo, namwe bulo mwe balume mubaghiye mwikalaye akiza na bachi binyu. Mubachindikaye pakuti bantu abadedebazu, sona nukuti bakwiza pakupyana ichilingo poka namwe, chicho chabupi icha bumi ubwa Chala. Bombagha chinichi, umwakuti chitakabepo nachimochimo ichakuvulungannya inyiputo zyinyu.

Ukuyimba pachifukwa icha kubomba ubugholosu

⁸ Amazyu aghabumalilo gho agha: Mwebosi mubanje nu moyo ghoka; mupazikizannyanje, sona mughananaye mwebenebene pakuti mwe bakamu. Mubanje bachisa, sona na bakwiyisya.

⁹ Mutakatanizannyanje ububibi pa bubibi, pamo intuko pantuko, awe. Loli mutanizannyanje nu lusayo, pakuti u Chala akabitizya ukuti mupokele ulusayo lunulu.

¹⁰ Amasimbo ghakuti, “Umuntu wesi yuyo akulonda pakwilagha nubumi sona nukuti ennyanje amasiku amiza, alukanizye ululimi lwache pakunena ububibi. Aleke pakunena ubumyasi.

¹¹ Azileghuke imbibi, sona abombaye ubwiza, sona aghulondelondaye umutende nu moyo wache ghosi.

¹² Pakuti amaso agha Mwene ghakwenelezya abantu abagholosu, sona amakutu ghache ghakuteghelezya inyiputo zyabo. Loli icheni icha Mwene chitakubalamila abantu ababibi.”

¹³ Nkimba we wenu angababombela ichibibi nanti muli nu lweke pakubomba chicho chiza?

¹⁴ Loli napapo mungayimba pachifukwa ichakubomba chicho chigholosu, mwe basayiwa nkani. Mutakamunyilaye nayumo umuntu, sona mutakapasyanje.

¹⁵ Mumunyilaye u Kilisitu mumoyo ghinyu pakuti we Mwene winyu. Akabalilo kosi mwiyannye pakumwamula umuntu wesi yuyo akubalalusya nizya lusubilo lwinyu lulo amwe muli nalo, loli mumwamulaye mubololo, sona na mumuchizi.

¹⁶ Umabyebye winyu abanje mololo, umwakuti abantu babo bakubatuka pachifukwa icha nkalo yinyu inyiza mwa Kilisitu bakoziwe isoni pa vivyo bakunena.

¹⁷ Chizapo pakuyimba pachifukwa ichakubomba imbombo inyiza, nanti bo bwighane ubwa Chala nukuchila pakuyimba pachifukwa ichakubomba ububibi.

¹⁸ Pakuti u Kilisitu akafwa lyoka mpela pachifukwa icha mbibi izya bantu bosi, umugholosu pakubafwila abasita bugholosu, umwakuti atufisye pamaso pa Chala. Pakunena nizya mubili wache akafwa, loli akazyuka kubufwe mu muzimu.

¹⁹ Ukwendela mu Muzimu Umuzelu, akabuka pakufumusya pakasi pa mizimu yiyo yikaba mujele.

²⁰ Imizimu yiniyi yikaba iya bantu babo batakamwivwilagha u Chala, bo u Chala akulindilila mubufisalyoyo, mumasiku ghagho u Nowa akazengelagha ubwato. Abantu eyiti, abanandi bulo mubwato mulamula, bo babo bakapokiwa na mizi ghalaghala.

²¹ Amizi ghanagha cho chimanyilo icha lozyo, lulo ilelo lukubapoka ukwendela mukuzyuka kubufwe kwa Yesu Kilisitu. Ulozyo lute ko kusuka ichiko icha mu mubili, awe. Loli lilayizyo lilyo likapangiwa kwa Chala pachifukwa icha mabyebye umwiza.

²² Ilelo u Yesu abuka kumwanya, kuko ali pachitengo icha buchindamu kunyobe indilo iya Chala. Kulakula abantumi bosi poka na balaghili na bamaka bosi bakumulambila.