1 Pitala 2 - Ulufingo Ulupya

Nizya libwe ilyumi nu luko ulusaliwa

¹ Po muleke ububibi bosi; muleke ubumyasi, pamo ubuzimbuli, pamo akabini, pamo intuko.

² Mubanje ngati mwe babonda, munyonywanje ulukama ulwenecho, sona ulwabuzimu, umwakuti pakung'wela ulukama ulu mungakula nukupokiwa,

³ pakuti mwayezya nukuzyaghannya ukuti u Mwene mwiza.

⁴ Zagha kwa Mwene, yuyo libwe ilyumi, lilyo likakaniwa na bantu, loli likasaliwa nu Chala pakuba libwe ilyamutengo.

⁵ Namwe bulo mubanje ngati gho mabwe amumi, aghakuti u Chala azengele inyumba iya buzimu, umwakuti mubanje mwe baputi abapaghuliwa, pakubika ivyakwiyipa ivyabuzimu vivyo vikumuhobosya u Chala ukwendela mwa Yesu Kilisitu.

⁶ Pakuti Amasimbo ghakuti, “Inkasala ibwe ilyamutengo, lilyo inkubika mu Ziyoni pakuba ilya pankuto. Po umuntu wesi yuyo akusubila mumwache atakwiza pakukoziwa isoni.”

⁷ Amwe mwe mukusubila, ibwe ili lyamutengo nkani, loli abantu babo batakusubila, “Ibwe lilyo abazengi bakalikana ukuti lite ni mbombo, ilelo lyaba lyakulondiwa nkani ukuchila amabwe ghosi.”

⁸ Amasimbo aghanji ghakuti, “Ili lyo libwe lilyo likubapunuzya abantu, ilyalabwe lilyo likubawisya.” Abene bakipunula pachifukwa chakuti batakaghasubila amazyu agha Chala, ichi chikabombiwa kukwabo ukuyana na mumo u Chala akabatikila.

⁹ Loli amwe mwe luko ulusaliwa, abaputi aba bumwene, abantu abache na bache aba Chala. Akabasala ukuti mulumbilile imbombo izyakuswighizya izya Chala, yuyo akabefyamo muchisi nukubinjizya mu lukozyo lwache ulwakuswighizya nkani.

¹⁰ Kale amwe mutakaba bantu aba Chala, loli ilelo mwe bantu bache. Pakabalilo kamo amwe mutakachimanya ichisa icha Chala, loli ilelo mwachipokela ichisa chache.

Mubanje ngati bo bazya aba Chala

¹¹ Mwee bamanyani bane abaghaniwa, inkubalaba amwe pakuti mwe bayeni, sona na bendazila muchisu ichapasi ukuti muvileghuke ivinyonywa ivya mubili, vivyo akabalilo kosi vili pankondo nu muzimu winyu.

¹² Inkalo yinyu pakasi pa bantu abakuzi yibanje nyiza nkani, umwakuti bo bakubatamantila ukuti mwe bantu ababibi, bazyaghannye imbombo zyinyu inyiza. Po bakwiza pakumuchindika u Chala pisiku ilya kwiza kwache.

¹³ Pachifukwa icha Mwene, mumulambilaye umulaghili wesi yuyo akubalaghila, nkani-nkani umulaghili uwa chisu.

¹⁴ Mubalambilaye abalaghili aba muchisu, babo basaliwe ukuti babafunde ababomba mbibi nukubapala abantu babo bakubomba inyiza.

¹⁵ Pakuti u Chala akulonda ukuti mubombaye imbombo inyiza. Pakubomba bunubu mukwiza pakupumizya ineno imbibi iya bantu abapunganu.

¹⁶ Amwe mwe basatuke, loli ubusatuke bwinyu butakabanje chintu chimo ichakukupikila ububibi, po mubanje ngati po mwe bazya aba Chala.

¹⁷ Mumuchindikaye umuntu wesi, sona mubaghanaye abitiki abamwinyu. Mumunyilaye u Chala, sona mumuchindikaye umulaghili uwa chisu.

Ichifwanikizyo ichakuyimba kwa Kilisitu

¹⁸ Mwe bazya, mubalambilaye abamwene binyu, sona mulanjizyanje umuchizi ghosi, bate bene babo bachisa na bololo, awe, loli sona na babo bakali.

¹⁹ Pakuti chintu chizapo nanti umuntu akujimba nkani intamyo zizyo atabaghiye pakukomana nazyo, pachifukwa chakuti abwaghannya ubwighane ubwa Chala.

²⁰ Nanti mukujimba bo mwakomiwa pachifukwa ichakubomba ububibi, nkimba mwakabapo choni? Loli nanti mukujimba pachifukwa ichakubomba inyiza, u Chala akwiza pakubasaya pachifukwa icha zinizi.

²¹ U Chala akabitizya ukuti mukomane na zinizi, pakuti u Kilisitu umwenecho akayimba pachifukwa icha mwemwe nukubalekela ichifwanikizyo, umwakuti mukonke munyayo zyache.

²² Umwene atakabombapo nayimoyimo imbibi, sona nayumo umuntu yuyo akamwivwapo akunena ubumyasi pamulomo wache.

²³ Bo bakumutuka, atakatanizyapo ni ntuko. Bo akuyimba atakanenapo nalimolimo izyu ilyakoghofya. Loli akavibika vyosi munyobe izya Chala, yuyo we mulongi umugholosu.

²⁴ U Yesu Kilisitu umwenecho akanyamula imbibi zyitu mumubili wache pachipinjika, umwakuti aswe tufwe ku mbibi nukuba bumi pakubomba ubugholosu. Mwapola pachifukwa icha vilonda vyache.

²⁵ Amwe mukaba ngati zyo ng'ozi zizyo zisobelite, loli ilelo mwanyokela kwa Mudimi yuyo Musungilili uwa bumi bwinyu.