Biblia Todo Logo
Bìoball air-loidhne

- Sanasan -

1 Aba Tesalonika 4 - Ulufingo Ulupya


Ubumi bubo bukumuhobosya u Chala

1 Pabumalilo, bakamu bane, mukamanyila kukwitu mumo mubaghiye mwikalilaye, umwakuti mumuhobosye u Chala ukuyana na mumo naloli mukwikalila. Po ilelo tukubalaba, nukubalambilizya nkani mwitabwa ilya Mwene u Yesu ukuti mubombaye bunubu ukuchilapo pakwanda.

2 Pakuti muzimenye indaghilo zizyo tukabapa, zikafuma kwa Mwene u Yesu.

3 Chicho u Chala akulonda cho ichi: Mubanje bantu abapaghuliwa, nu kubwepuka ubwamalaya.

4 Umuntu wesi amanye pakughulamula umubili wache ukuti ghubanje muzelu, sona muchindikiwa.

5 Mutakabanje ni vinyonywa ivinyazu ukuyana na mumo bakubombela abantu abakuzi, babo batamumenye u Chala.

6 Pafundo yiniyi, umuntu wesi atakamunangilaye umukamu wache, pamo ukusendelapo ulusako papache. U Mwene akwiza pakumufunda umuntu wesi yuyo akubomba bunubu, ukuyana na mumo tukababuzizya kale nukubasoka.

7 U Chala atakatwitizya aswe ukuti tubombaye ubunyazu, loli ukuti tubanje bantu abazelu.

8 Po umuntu wesi yuyo akukana ichimanyisyo chinichi, atakumukana umuntu, loli akumukana u Chala, yuyo akubapa u Muzimu wache Umuzelu.

9 Pakunena nizya lughano pakasi pa amwe mwe bitiki, chite chakulondiwa ukuti tubasimbile, pakuti u Chala umwenecho akabamanyizya mumo mubaghiye pakughananilanagha.

10 Naloli mubaghanite abakamu bosi aba muchigaba icha Makedoniya. Po tukubalaba amwe bakamu bitu, pakubomba bunubu ukuchilapo pakwanda.

11 Muyezye nkani pakuba nubumi ubwabuchimyeka. Umuntu wesi amanye izyache ni zyache, sona abombaye imbombo ni nyobe zyache ukuyana na mumo tukababuzizya pakwanda.

12 Bunubu abantu abakuzi bakwiza pakubachindika, po sona mutakwiza pakumusubila nayumo umuntu pavintu vivyo mukusobelwa.


Ukwiza sona kwa Mwene

13 Bakamu bitu, tukulonda mumanye ubwanaloli nizya bantu babo bafuye, umwakuti mutakabe ni chitima ukuyana na bantu babo bate nu lusubilo.

14 Tukusubila ukuti u Yesu akafwa nu kuzyuka sona kubufwe, tukusubila sona ukuti u Chala akwiza pakubazyusya poka nu Yesu, abantu babo bakafwila mumwache.

15 Chicho tukubamanyizya ilelo cho chimanyisyo icha Mwene. Aswe twe tuchili twe bumi pisiku ilyakwiza sona kwa Mwene tutakwiza pakulongolela pamaso pa bantu babo bafuye.

16 Pakuti u Mwene umwenecho akwiza pakwika kumwanya nu kukolomoka ukukulu nkani, nizyu ilya wantumi usongo, sona nukulila kwa ipati ilya Chala. Po abantu babo bakafwila mwa Kilisitu bakwiza pakuba bakwanda pakuzyuka.

17 Pisinda pache aswe twe tuchili twe bumi, sona twe twasyala, tukwiza pakubungana poka nabo mu mabingu pakukomana nu Mwene mumwanya. Po tukwiza pakuba nu Mwene bwila na bwila.

18 Polelo mukazannyanje na mazyu ghanagha.

The copyright is jointly and equally held by: ©️ The Bible Society of Malawi, 2014 ©️ The Word for the World International, 2014 Bible Society of Malawi
Lean sinn:



Sanasan