1 Aba Kolinti 8 - Ulufingo Ulupya

Nizya vyakulya vivyo vyabikiwa ku vifwani

¹ Pakunena nizya vyakulya vivyo vyabikiwa ku vifwani ukuti chibanje chakwiyipa, momumo ukuti twebosi tuli na mahala. Amahala aghakumupela umuntu pakuba wamituvyo, loli ulughano lukuzenga.

² Nanti umuntu akwinong'ona ukuti amenye chimo, kokuti achili bulo atachimenye ukuyana na mumo abaghiye pakuchimanyila.

³ Loli umuntu yuyo amughanite u Chala, amanyikitwe nu Chala.

⁴ Polelo nizya vyakulya vivyo vyabikiwa ku vifwani ukuti chibanje chakwiyipa, tuzimenye ukuti ichifwani kate kantu napo panandi, sona tuzimenye ukuti atalipo u Chala uyunji, loli weka mpela.

⁵ Napapo vingabapo ivintu vimo vivyo abantu bakuti, “Aba chala”, manyi kumwanya, manyi pachisu ichapasi, sona napapo vingabapo ivintu vimo ivyinji vivyo abantu bakuti, “Bachala”, pamo “Bamwene”,

⁶ loli aswe u Chala alipo weka mpela, we Tata, yuyo mupeli uwa vintu vyosi, sona we yuyo naswe twenizyeko amaso. Alipo u Mwene weka mpela, u Yesu Kilisitu, yuyo ukwendela mumwache ivintu vyosi vikapeliwa, sona ukwendela mumwache aswe tuli nubumi.

⁷ Loli ate wesi yuyo azimenye zinizi. Abantu bamo bachili bizubiye pakwiputa ivifwani, umwakuti bo bakulya ichakulya chicho chibikiwe ku vifwani ukuti chibanje chakwiyipa, mumabyebye wabo bakwinong'ona ukuti ichakulya chilachila chibikiwe ku vifwani ukuti chibanje chakwiyipa, umabyebye wabo akuvulungana, pakuti mudedebazu.

⁸ Loli ivyakulya vitakwiza pakutupalamizya kupipi nu Chala. Tutakutaghapo nachimochimo nanti tutakuvilya, sona tutakukabapo nachimochimo nanti tukuvilya.

⁹ Loli muchebaye ukuti ubusatuke bwinyu ubwakubombela vivyo mukulonda butakabanje chipunulo ichakuwisya abantu abadedebazu.

¹⁰ Pakuti nanti umuntu yuyo ali nu mabyebye umudedebazu, akukwennya awe, wewe ukuti uzimenye zinizi, ukulya munyumba iyakwiputilamo ivifwani, nkimba ichi chitangamukazya umuntu yulayula ukuti alyanje ichakulya chicho chibikiwe ku vifwani ukuti chibanje chakwiyipa?

¹¹ Polelo umuntu umudedebazu yula, yuyo u Kilisitu akamufwila, akwiza pakuzimila pachifukwa icha mahala ghako.

¹² Bo mukubanangila abakilisitu abamwinyu bunubu nukumuvulazya umabyebye wabo umudedebazu, kokuti mukumunangila nu Kilisitu bulo.

¹³ Polelo nanti ivyakulya vikumupelela umukamu wane ukwipunula, ntakwiza pakulya nalumolumo sona inyama, umwakuti intakamupunuzye umukamu wane.