1 Aba Kolinti 5 - Ulufingo Ulupya

Nizya bwamalaya muchipanga

¹ Ilelo imbili yivwika ukuti mumwinyu muli ubwamalaya ubupalapala nkani, ubwamalaya ubwakuti butakubombiwa nalumolumo na bantu abakuzi. Nivwa ukuti umuntu yumo akughonana nu muchi uwa wise!

² Po, nkimba choni chicho muchili mukwitutumula mwebene? Loli mubaghiye pakuba ni chitima, sona nukumwefyamo mumwinyu umuntu yuyo abombite zinizi.

³ Napapo ane indi kubutali namwe ku mubili, loli indi namwe mubuzimu. Po mwitabwa ilya Mwene u Yesu namulongela zila umuntu yuyo abombite ichintu icha mwiko ichi, ngati po indi poka namwe kunuko.

⁴ Bo mukukomana poka mwitabwa ilya Mwene witu u Yesu, nane indi poka namwe mubuzimu, sona amaka agha Mwene witu u Yesu ghali palapala,

⁵ mubaghiye mumubikaye umuntu yunuyu munyobe izya Satana, umwakuti umubili wache ghunanganike, kokuti umuzimu wache ghungapokiwa pisiku ilya Mwene witu u Yesu.

⁶ Ukwitutumula kwinyu kute kwiza. Nkimba mutachimenye ichili chicho chikuti, “Ichilungo ichinandi bulo chikututumula indobo yosi iya ichinyenya.”

⁷ Amwe mubaghiye pakwefyamo ichilungo ichikali icha mbibi, kokuti mubanje chinyenya ichipya, ukuyana na mumo mubeleye. Pakuti u Kilisitu, u Mwana uwa ng'ozi witu uwa Lusekelo ulwa Pasa aboliwe kale ukuti chibanje chakwiyipa.

⁸ Polelo zagha tusekelaye Ulusekelo lwitu ulwa Pasa ni chibama chicho chite ni chilungo ichikali icha mbibi, sona ni chinyazu chila, loli ni chibama chicho chite ni chilungo, ichibama ichiza, sona ni chanaloli.

⁹ Mwakalata wane yuyo inkabasimbila amwe, inkababuzya ukuti mutakangalilanaye poka na bamalaya.

¹⁰ Loli ntakanenagha nizya bantu aba muchisu ichapasi, babo bo bamalaya, pamo abapafu, pamo amavyondongo, pamo abantu babo bakwiputa ivifwani, awe. Nanti mwalondagha pakubaleghuka abantu banaba, ngali mwepitemo losi muchisu ichapasi.

¹¹ Chicho inkanenagha chikaba chakuti mutakangalilanaye poka nu muntu yuyo akwinena mwene ukuti mukilisitu, loli we malaya, pamo umupavu, pamo yuyo akwiputa ivifwani, pamo umuntu uwiyebo, pamo uching'wela, pamo umwiba. Mutakikalaye pasi nukulya nawe umuntu yunuyu napo panandi.

¹² Po yite mbombo yane iyakubalonga abantu abakuzi. Nkimba mutangabalonga abantu aba muchipanga?

¹³ U Chala akwiza pakubalonga abantu abakuzi. Pakuti Amasimbo ghakuti, “Mumwefyemo mumwinyu umuntu umubibi.”