1 Aba Kolinti 16 - Ulufingo Ulupya

Ivya kubasangulila abantu aba Chala

¹ Ukunena nivya kubasangulila abantu aba Chala: Mubaghiye mubombaye vivyo inkavibuzya ivipanga ivya muchigaba icha Galatiya.

² Isiku ilyakwanda ilya sabata, umuntu wesi asabulepo indalama zimo, ukuyana na mumo akabila, nukuzisunga, umwakuti kutakabeko nakumo ukusanguzya bo nafika.

³ Bo nafika, inkwiza pakubatuma abantu babo mwabasala pakubapa abakalata ukuti babukaye ni vyabupi vyinyu mu Yelusalemu.

⁴ Nanti zimbaghiye pakuti nane imbuke, po bangabuka poka nane.

Imbatiko izya Pabuli

⁵ Bo nadumusannya muchigaba icha Makedoniya, inkwiza kukwinyu pakuti nkwinong'ona ukudumusannya muchigaba icha Makedoniya.

⁶ Lumo inkwiza pakwikala namwe akabalilo kamo, pamo akabalilo kosi aka lupepo, umwakuti munganyavwa ukwendelela nu bulendo bwane, kosi kuko nkulonda pakubuka.

⁷ Intakulonda ukuti imbennye mumwanya-mwanya bulo, awe, loli indi nu lusubilo ulwakuti inkwiza pakwikala namwe akabalilo akatali, nanti u Mwene angitikizya.

⁸ Loli inkwiza pakwikala mu Efeso muno mupaka pisiku ilya Pentekositi.

⁹ Pakuti izila zyighukite ukuti ningabomba imbombo inkulu nkani, napapo balipo abantu abinji babo bakunsusya.

¹⁰ Nanti u Timoti akwiza, mwenelezye ukuti mwamupokela akiza pakuti akumubombela u Mwene ngati mumo imbeleye.

¹¹ Polelo atakabeko nayumo umuntu uwakumusamula, loli mubaghiye pakumwavwa ukuti endelele nu bulendo bwache mumutende, umwakuti anyokele kukwane; pakuti inkumulindilila ukuti akwiza na bakamu bitu.

¹² Loli nizya mukamu witu u Apolo, namulambilizya nkani akabalilo akinji ukuti abendele poka na bitiki abanji, loli atakalondagha ukuti angabuka akabalilo kalakala. Po akwiza nanti angalwagha ulusako.

Amazyu aghabumalilo

¹³ Mubanje maso, mwimaye nkani palwitiko. Mubanje bajivu nkani, sona mubanje bamaka.

¹⁴ Vyosi vivyo mukubomba, mubombaye nu lughano.

¹⁵ Muzimenye nizya Sitefanasi ni nyumba yache, babo bakaba bakwanda pakuba bakilisitu muchigaba icha Akaya, sona biyipiye bene pakubabombela abantu abazelu aba Chala. Inkubalaba amwe mwe bakamu bane

¹⁶ ukuti mubivwilaye abantu banaba, sona nu muntu wesi yuyo akubomba umwakwiyipa poka nabo.

¹⁷ Ihobokite nkani nukwiza kwa Sitefanasi, nu Fotunata, sona nu Akayiko pakuti zizyo bambombela, babomba mubuzilo bwinyu.

¹⁸ Abene bansangalusya nkani, ukuyana na mumo bakabasangalusizya amwe. Abantu banaba bakulonda ukuchindikiwa.

Ukulamuka ukwabumalilo

¹⁹ Ivipanga ivya muchigaba icha Asiya vikubalamuka. U Akwila nu Pulisika poka ni chipanga chicho chikukomana munyumba zyabo chikubalamukila mwa Mwene.

²⁰ Abakamu bosi kuno bakubalamuka. Mulamunkanaye nu lughano ulwenecho.

²¹ Ane ne Pabuli, ni nyobe yane inkusimba ukuti, “Mwaghona.”

²² Umuntu wesi yuyo atakumughana u Mwene, ichighune chibanje papache! Malanata kokuti Mwene witu, zagha!

²³ Ichisa icha Mwene witu u Yesu chibanje namwe.

²⁴ Ulughano lwane lubanje namwe mwebosi mwa Kilisitu Yesu. Ameni.