Zekaliya 9 - IBAYIBOLO 2024

Ubulongi pa inko impalamani

¹ Agha gho mazyu aghabulaghuzi agha Mwene ghagho ghakuchisusya ichisu icha Hadilaki, poka nakaya aka Damasika, pakuti abantu bosi muchisu ichapasi ba Mwene, sona zyope inko izya Izilayeli zya Mwene.

² U Hamati wepe apakanite nako, napapo u Tile nu Sidoni bo bafundi nkani.

³ U Tile izengeye mwene ilinga, abunganika u siliva ngati lo lufumbi, sona ugolide ngati musesenga uwa mumusebo.

⁴ Loli u Mwene akwiza pakumufyula ivintu vyache, sona akwiza pakubusumbila munyanja ubukabi bwache, pisinda pache akwiza pakochiwa numoto.

⁵ Akaya akakulu nkani aka Ashikeloni kakwiza pakuvyennya nukunyila, u Gaza akwiza pakunyongoloka nububavu, wepe bulo u Ekiloni akwiza pakufwa, sona abantu bakwiza pakukatoloka.

⁶ Abantu abakupapiwa ninko izinji, bo babo bakwiza pakwikala mukaya aka Ashidodi. Po nkwiza pakumazya ukwikwezya ukwa ba Filisiti.

⁷ Batakwiza pakulya inyama iya libanda, sona ni vyakulya ivinji ivyamwiko. Abantu abakusyalako bakwiza pakuba ba Chala witu, nukuba luko ulwa chisu icha Yuda, sona u Ekiloni akwiza pakuba ngati boba Yebusi.

⁸ Ane nkwiza pakuba ne mulindilili uwa chisu, umwakuti atakabepo uwakwendamo. Nayumoyumo umuyivyi akwiza pakubapota abantu bane, pakuti ilelo nkubenelezya.

U mwene uwamuntazi

⁹ Mwee bantu aba mukaya akakulu nkani aka Ziyoni, sekelagha nkani! Mwee bantu ba mu Yelusalemu, hobokagha! Ennya, u mwene winyu akwiza kukwinyu, mugholosu sona ali nubupoki, mololo sona akwelite pampunda inyanavuli, umwana wampunda.

¹⁰ U Mwene akuti, “Nkwiza pakuzyefya ingolo izya bwite kwa Efulayimu, sona ifalasi izya bwite kwa Yelusalemu, bope ubwele ubwakulwila ubwite bukwiza pakupyoliwa. U mwene winyu akwiza pakufumusya umutende pakasi pa inko zyosi. Ubulaghili bwache bukwiza pakwandila kunyanja mupaka kunyanja iyinji, ukwandila sona kulusoko ulwa Yufuleti mupaka kubumalilo ubwa chisu.

Ukunyokelamo ukwa bantu aba Chala

¹¹ “Wee Yelusalemu, pachifukwa icha libanda lyane ilya lufingo lwane, nkwiza pakubasatula abakayidi binyu muchiliba chicho chite namizi.

¹² Mwee bakayidi, nyokela kwilinga lyinyu, amwe mukalindililagha nulusubilo, ilelo nkufumusya ukuti nkwiza pakubanyosezyamo kabili kosi.

¹³ Nkwiza pakumupeta u Yuda ngati bwele, sona u Efulayimu akwiza pakuba tulasilo twache. Wee Ziyoni, nkwiza pakubanyamusya abana bako, umwakuti balwe na bantu aba ku Gilisi, nkwiza pakukupela pakuba wepanga uwa balwabwite abamaka nkani.”

¹⁴ Po u Mwene akwiza pakubabonekela, akwiza pakusumba utulasilo ngati kamesya. U Mwene Uwamaka Ghosi akwiza pakulizya ipati, akwiza pakulefuka mukankungu uwakuntende,

¹⁵ akwiza pakubavighilila. Bakwiza pakubapota nukubanangannya pakubasumba na mabwe. Bakwiza pakung'wela nukukolomoka ngati po bakolizwe nu vinyo. Bakwiza pakwizula ni banda ngati nyinga, izyakubombezya pakunyafila inkuto izya chighemo.

¹⁶ Pisiku lilalila u Mwene u Chala wabo akwiza pakubapoka, ngati zyo ng'ozi izya bantu bache. Bakwiza pakulama ngati mabwe aghamutengo, agha pa mpumpu.

¹⁷ Mwee, nkimba bo bwiza boni nukuboneka akiza ukwa chisu chinichi Ingano yikwiza pakubapela abalumendo pakuba bamaka? Sona uvinyo umupya akwiza pakubapela abalindu pakuba bamaka.