Zekaliya 8 - IBAYIBOLO 2024

U Mwene akumulayizya u Yelusalemu

¹ U Mwene Uwamaka Ghosi akanena nane.

² Zinizi zyo zizyo u Mwene Uwamaka Ghosi akambuzya ukuti, “Ane indi nubuzuba nu Ziyoni, nkwaka nubuzuba papache.”

³ Po u Mwene Uwamaka Ghosi akuti, “Nkwiza pakunyokela mu Ziyoni nukwikala mu Yelusalemu. Po u Yelusalemu akwiza pakwitiziwa ukuti Akaya Akakulu Nkani Akasubiliwa sona kakwiza pakwitiziwa ukuti ighamba ilya Mwene Uwamaka Ghosi, likwiza pakwitiziwa ukuti Ighamba Izelu.”

⁴ U Mwene Uwamaka Ghosi akuti, “Abanavuli na bakolo abaghosi bakwiza pakwikala mumisebo iya kaya aka Yelusalemu, umuntu wesi akwiza pakuba ni ndisa iyakwendela pachifukwa icha bughosi bwache.

⁵ Imisebo iya mukaya akakulu nkani yikwiza pakwizula na balumendo na balindu, babo bakwiza pakwangalagha mulamula.”

⁶ U Mwene Uwamaka Ghosi akuti, “Napapo chingaboneka ngati chakuhobosya mumaso agha abakusyalako pakabalilo kalakala, po nkimba chingaba chakunhobosya nkani nane bulo?”

⁷ U Mwene Uwamaka Ghosi akuti, “Nkwiza pakubapoka abantu bane aba kuvyisu ivyakubufumilo bwizuba sona naba kubwinjililo bwizuba.

⁸ Nkwiza pakubanyosezya sona ukuti bikalaye mu Yelusalemu. Bakwiza pakuba bantu bane, ane nkwiza pakuba musubiliwa sona mugholosu kukwabo pakuba ne Chala wabo.”

⁹ U Mwene Uwamaka Ghosi akuti, “Amwe mwe ilelo mukwivwa amazyu ghagho abalaghuzi bakunena, babo bakabapo bo bakwanda pakwala ulwalo ulwa Nyumba iya Mwene Uwamaka Ghosi, po mubanje na maka nkani, umwakuti Inyumba iya Mwene yingazengiwa sona.

¹⁰ Bo akabalilo kalakala katakwanite, patakabapo nayumoyumo umuntu uwakukabapo umuvwalo pa mbombo pamo pachitekwa chimo. Patakabapo umuntu nayumo yuyo akaghula nukughulizya mumutende, pachifukwa icha balwani bache, pakuti nkamupela umuntu wesi pakuba mulwani uwa muntu uyunji.

¹¹ Loli ilelo ntakwiza pakubabombela ichintu chimo abakusyalako bala, ukuyana namumo nkabombela kale.” U Mwene Uwamaka Ghosi anena.

¹² “Imbeyu zikwiza pakukula akiza, amampesya ghakwiza pakwela ivikomwa vyache, itope likwiza pakumezya ivibyalwa, sona yope inganda yikwiza pakuwa. Nkwiza pakubapa ivintu vyosi vinivi pakuba mpyana iya bantu abakusyalako banaba.

¹³ Mwee ba Yuda naba Izilayeli, ukuyana namumo mukabela mwe nguno pakasi pa inko, po nkwiza pakubapoka sona mukwiza pakuba mwe lusayo. Mutakanyilaye, loli mubanje na maka.”

¹⁴ U Mwene Uwamaka Ghosi akuti, “Ukuyana namumo nkalondelagha pakubabombela ichintu ichibibi, bo abanyenya binyu bankalalizya, intakalonda pakubapelela ichisa,

¹⁵ po ilelo nkulonda pakumubombela sona ubwiza u Yelusalemu nu Yuda, mutakanyilaye.

¹⁶ Ivintu vivyo mubombaye vyo ivi: Umuntu wesi anenaye ubwanaloli kuwamwabo, sona mulongelaye inongwa mubwanaloli na mumutende,

¹⁷ mutakamwinong'onelaye umupalamani winyu ichintu ichibibi, sona mutakalapilaye mubumyasi. Ane invibengite nkani ivintu vinivi.” U Mwene anena.

¹⁸ U Mwene Uwamaka Ghosi akambuzya sona amazyu aghakuti,

¹⁹ U Mwene Uwamaka Ghosi akuti, “Mutuzyanje pakulya umwezi uwafolo nu mwezi uwafayivi nu mwezi uwaseveni, po u mwezi uwa 10, gho ghubanje mwezi uwa ba Yuda uwalusekelo nukuhoboka. Polelo mubughanaye ubwanaloli sona nu mutende.”

²⁰ U Mwene Uwamaka Ghosi akuti, “Akabalilo kakwiza kako inko inyinji izyakufuma mutwaya utwinji utukulu nkani sona na bantu babo bakwikala mulamula bakwiza pakwiza mu Yelusalemu.

²¹ Abantu babo bakwikala mukaya mula bakwiza pakubuka kukaya akanji nukubabuzya ukuti, ‘Leka tubukaye kwa Mwene pakumulaba ichisa nukumulondalonda u Mwene Uwamaka Ghosi. Nane bulo nkubuka.’

²² Abantu abinji sona ninko inyinji bakwiza pakwiza ku Yelusalemu pakumulondalonda u Mwene Uwamaka Ghosi nukumulaba ukuti abapelele ichisa.”

²³ U Mwene Uwamaka Ghosi akuti, “Pakabalilo kalakala, abanavuli 10 abakufuma mu neno zyosi sona naba mu inko izinji, bakwiza pakuyilema nkani inkazo iya mu Yuda yumo nukuti, ‘Tubukaye nawe, pakuti twivwa ukuti u Chala ali nawe.’ ”