Zekaliya 7 - IBAYIBOLO 2024

U Mwene akususya pakutuzya ukulya ukwa buzimbuli

¹ Mumwaka uwafolo uwa bulaghili ubwa mwene u Daliyasi u Mwene akanena nu Zekaliya, pisiku ilyafolo ilya mwezi uwa nayini, ghugho mwezi uwa Kisilevi.

² Abantu aba ku Beteli bakamutuma u Shalezeli sona nu Legemu Meleki ku Nyumba iya Mwene, poka na bantu babo, pakumulambilizya u Mwene ukuti abape ulusayo,

³ pakubalalusya abaputi aba mu Nyumba iya Mwene Uwamaka Ghosi sona na balaghuzi ukuti, “Nkimba infwifwitilaye nukutuzya pakulya mumwezi uwafayivi, ukuyana namumo nkabombelagha amaka aminji?”

⁴ Po u Mwene Uwamaka Ghosi akambuzya amazyu aghakuti,

⁵ “Balalusye abantu bosi aba muchisu poka na baputi ukuti, ‘Nkimba bo ukutuzya pakulya nukufwifwitila, mumwezi uwafayivi nu mwezi uwaseveni amaka 70 ghagho ghachilapo, nkimba mukatuzya pakulya pachifukwa icha ane?

⁶ Sona bo mukulya nukung'wela, nkimba mutakasekelagha pachifukwa icha mwebene?

⁷ Nkimba te mazyu ghagho u Mwene akalumbilila ukwendela mubalaghuzi abavula intazi bala, bo akaya aka Yelusalemu poka nutwaya utukulu tuto tukazyunguliye tuli pamutende sona, kuchigaba icha kuntende sona na mumaghamba, kuko bakikalagha?’ ”

Ubuzya pachifukwa icha ukusita ukwivwila

⁸ Po u Mwene akamubuzya sona u Zekaliya amazyu aghakuti,

⁹ “U Mwene Uwamaka Ghosi akuti, ‘Wenelezye ukuti ubwanaloli bukubombiwa, ubapelelaye ichisa abantu sona mubanje nichililizi ku weka na weka.

¹⁰ Mutakabayivyanje abafwilwe pamo abalanda, abayeni pamo abapina. Mutakinong'onelanaye ivintu ivibibi mumoyo ghinyu.’

¹¹ “Loli namoyo amakafu abantu banaba bakakana pakuteghelezya, bakampa inkonto zyabo sona bakighalila amakutu ghabo umwakuti batakivwanje.

¹² Bakakazya nkani amoyo ghabo ngati libwe, umwakuti batakivwanga ululaghilo sona na mazyu agha Mwene Uwamaka Ghosi ghagho akababuzya abalaghuzi abavula intazi bala pakwendela mwa Muzimu. Po u Mwene Uwamaka Ghosi akakalala nkani.

¹³ “U Mwene Uwamaka Ghosi akuti, ‘Bo nkubitizya batakivwanga, bo bope bakunyitizya, intakabateghelezya.

¹⁴ Nkabanyampannya nu kankungu pakasi pa inko zyosi, kuko bakaba bayeni. Ichisu chabo chikaba chisami umwakuti nayumoyumo umuntu angikalamo. Umu momumo bakachipelela ichisu ichiza pakuba chisami.’ ”