Zekaliya 6 - IBAYIBOLO 2024

Ichisetuka icha ngolo folo

¹ Nkatalankannya sona, nkazyennya ingolo folo zikufuma pakasi pamaghamba mabili, ghagho maghamba agha mukuba uwa chela.

² Ingolo iyakwanda yikaba ni falasi inchesamu, iyabubili yikaba ni falasi ifitu,

³ iyabutatu yikaba ni falasi iswepu, po iyafolo yikaba ni falasi iyamabalamabala, loli zyosi zikaba zyamaka nkani.

⁴ Po nkamulalusya uwantumi yuyo akanenagha nane nkati, “Wee songo wane, nkimba vinivi vikung'anamula ichoni?”

⁵ Uwantumi akanyamula akati, “Zinizi zyo mpepo folo izya kumwanya, zyafuma bulo pamaso pa Mwene uwa chisu chosi ichapasi.

⁶ Ingolo yiyo yili ni falasi ifitu yikubuka kuchigaba ichakumitu, sona ingolo iya falasi iswepu yikubuka kuchigaba icha kubwinjililo bwizuba, yope ingolo iya falasi iyamabalamabala yikubuka ku chigaba icha kuntende.”

⁷ Bo ifalasi izyamaka zikwepamo zikalondagha nkani pakuchitendela ichisu chosi ichapasi. Uwantumi akababuzya akati, “Bukagha pakuchitendela ichisu chila!” Po bakachitendela ichisu ichapasi.

⁸ Po uwantumi akanyitizya akati, “Ennya ifalasi zizyo zikubuka kuchigaba icha kumitu, zyabwisya ubukali ubwa Mwene.”

Nizya kumuvwika u Yoshwa impumpu

⁹ U Mwene akambuzya akati,

¹⁰ “Senda u siliva nu golide kwa Helidayi nu Tobiya, sona nu Yedaya, babo bakaba bakayidi kuchisu icha Babiloni. Ubuke isiku linilyo kunyumba iya Yosiya umwana uwa Zefaniya.

¹¹ Senda u siliva nu golide yula nukuyannya impumpu, mumuvwike u Yoshwa umwana uwa Yehozadaki pakuba muputi usongo.

¹² Po umubuzye ukuti: U Mwene Uwamaka Ghosi ati, ‘Ennya umuntu yuyo itabwa lyache we Lusamba, pakuti akwiza pakumela papo ali, sona akwiza pakuzengapo Inyumba iya Mwene.

¹³ Weyuyo akwiza pakuzenga Inyumba iya Mwene sona akwiza pakuvwinkiwa nu buchindamu, akwiza pakulaghila bo ikaye pachitengo chache. Akwiza pakubapo sona umuputi papipi ni chitengo icha bumwene. Abantu babili banaba bakwiza pakubomba imbombo nu moyo ghoka.’

¹⁴ Impumpu yiniyi yikwiza pakupeghiwa kwa Helidayi nu Tobiya, sona nu Yedaya nu Heni umwana uwa Zefaniya pakuba chikumbusyo mu Nyumba iya Mwene.

¹⁵ Abantu bosi babo bali kubutali, bakwiza pakwavwa pakuzenga Inyumba iya Mwene, po bakwiza pakumanya ukuti u Mwene Uwamaka Ghosi antuma pakasi papabo. Zinizi zikwiza pakubombiwa nanti naloli mukughivwila amazyu agha Mwene u Chala winyu.”