Zekaliya 5 - IBAYIBOLO 2024

Ichisetuka icha ibuku ilyakubuluka

¹ Nkatalankannya sona, po nkennya ibuku ilyakubuluka.

² Akandalusya akati, “Nkimba ukwennya ichoni?” Nkamwamula nkati, “Nkwennya ibuku ilyakubuluka ubutali bwache lili amamita nayini sona mububaba lili amamita folo nu hafu.”

³ Po akambuzya akati, “Yiniyi yo nguno yiyo nkuyipungulila pachisu chosi ichapasi. Ukuyana namumo likunenela kulubazu loka, pakuti umwiba wesi akwiza pakwefiwapo. Zisimbiwe sona ukuti umuntu wesi yuyo akulapa ivyabumyasi wepe efiwanjepo ukuyana na zizyo zisimbiwe ulubazu ulunji lula.

⁴ U Mwene Uwamaka Ghosi akuti, ‘Nkwiza pakutuma ichighune, chikwiza pakwinjila munyumba iya mwiba wesi yula sona na munyumba iya muntu wesi yuyo akulapa umwabumyasi. Chikwiza pakubanga munyumba yache, nukubaleka bo chinanganizye vyosi vibili amatabwa na mabwe.’ ”

Ichisetuka icha mukolo muchidudunga

⁵ Uwantumi yuyo akanenagha nane akiza nukumbuzya ukuti, “Talankannya, ennya ichintu chicho chikuboneka.”

⁶ Nkalalusya nkati, “Nkimba cho choni?” Akamula akati, “Cho chidudunga ichakupimila.” Akanena sona akati, “Zinizi zyo mbibi izya bantu aba mu Yuda.”

⁷ Po ichikupikizyo chache icha chela iching'wamu chikefiwamo. Mulamula mukabamo umukolo!

⁸ Uwantumi akati, “Yunuyu bo bubibi.” Sona akamusunkilizizya muchidudunga. Pisinda pache akakupikilapo.

⁹ Po nkatalankannya, nkabennya abakolo babili pamaso papane, muvipapande vyabo bakaba ni mpepo, bakaba nivipapande ngati vya inyangenyange. Bakazompola ichidudunga chila nukubulukila pakasi pachisu ichakumwanya ni chisu ichapasi.

¹⁰ Nkamulalusya uwantumi yuyo akanenagha nane nkati, “Nkimba bakubuka nacho kwiyi ichidudunga?”

¹¹ Uwantumi yula akanyamula akati, “Bakubuka nacho kuchisu icha Babiloni pakuchizengela inyumba yache. Nanti bamala pakuchizengela inyumba, po bakwiza pakuchibika pabuzilo bwache ukuti bachichindikaye.”