Zekaliya 3 - IBAYIBOLO 2024

Ichisetuka icha muputi usongo

¹ Po u Mwene akandanjizya u Yoshwa umuputi usongo, yuyo akimilila pamaso pa wantumi uwa Mwene nu Satana, akimililagha kunyobe indilo iya Yoshwa ukuti amususye.

² Uwantumi uwa Mwene akamubuzya u Satana akati, “U Mwene akuchemele! U Mwene yuyo amusala u Yelusalemu akuchemele! Nkimba umuntu yunuyu ate ngati chizinka ichakwaka ichakuzompoliwa pamoto?”

³ Po u Yoshwa akavwala amenda amanyazu, bo imiliye pamaso pa wantumi yula.

⁴ Uwantumi akababuzya abantu babo bakimilila pamaso papache akati, “Muvule amenda amanyazu agha.” Po akamubuzya u Yoshwa akati, “Ennya nazyefya imbibi zyako, nakuvwika amenda amiza amapya agha.”

⁵ Ane ne mulaghuzi nkati, “Muvwike impumpu yiyo yiswepite kumutu wache.” Po bakamuvwika impumpu yila, bakamuvwika sona amenda bo uwantumi yula imiliye palapala.

⁶ Uwantumi uwa Mwene yula akamubuzya u Yoshwa akati,

⁷ “U Mwene Uwamaka Ghosi ati, ‘Nanti ukwiza pakuzyivwila indaghilo zyane nukubomba zyizyo nkakubuzya ukuti ubombe, ukwiza pakubalaghila abamunyumba yane. Ukwiza pakuba nubulaghili mu Nyumba iya Chala sona nuwakwenelezya ulubinjilo lwache, nkwiza pakukwitikizya pakwikala poka na bantu babo bimiliye pano.

⁸ “ ‘Wee Yoshwa umuputi usongo poka na bamanyani bako, babo bikaye pamaso papako, ivwa kuno, awe we chimanyilo icha vintu ivyamuntazi. Nkwiza nu mubombi wane, yuyo we Lusamba.

⁹ Ennya ibwe, nkulibika pamaso pa Yoshwa, pibwe lyoka linili pali amaso seveni, u Mwene Uwamaka Ghosi anena, sona nkwiza pakusimbapo amazyu nukwefya imbibi izya chisu chinichi pisiku lyoka bulo.

¹⁰ “ ‘Pisiku linilyo, umuntu wesi uwa amwe akwiza pakumwitizya umupalamani wache ukuti ikale mukazundila aka mampesya ghache sona naka ikuyu.’ ” U Mwene Uwamaka Ghosi anena.