Zekaliya 14 - IBAYIBOLO 2024

U Yelusalemu ninko

¹ Isiku ilya Mwene likwiza, lilyo ivintu vivyo vikafyuliwa kukwako vikwiza pakugabiwa pakasi papinyu.

² Nkwiza pakuzibungannya inko zyosi umwakuti zilwe ubwite nu Yelusalemu. Akaya akakulu nkani kakwiza pakulemiwa sona inyumba zikwiza pakufyuliwa, bope abakolo bakwiza pakulemiwa pamaka. Abantu bamo abanandi bulo bakwiza pakuba bazya, loli abantu abanji bosi batakwiza pakubefyamo mukaya akakulu nkani.

³ Po u Mwene akwiza pakwepamo nukulwa ubwite ninko zinizyo, ukuyana namumo akulwila pisiku ilya bwite.

⁴ Pisiku lilalila akwiza pakwimilila Pighamba ilya Misyunguti kubwinjililo bwizuba ubwa Yelusalemu, po ighamba lilalila likwiza pakugabiwa pabili, lyoka kubufumilo bwizuba ilinji kubwinjililo bwizuba. Likwiza pakupela ikombe ikulu nkani, u hafu uwa chigaba choka akwiza pakubuzila kuchigaba icha kumitu sona u hafu uwa chigaba ichinji akwiza pakubuzila kuchigaba icha kuntende.

⁵ Mukwiza pakupona pachifukwa icha likombe lilyo lili pakasi pamaghamba mabili, pakuti likwiza pakufika mupaka ku Azeli. Mukwiza pakuchimbila ngati mumo mukachimbilila akasenyenta, bo u mwene Uziya akulaghila mu Yuda. Po u Mwene u Chala wane akwiza pakwiza poka na bantu bache bosi abazelu.

⁶ Pisiku lilalila kutakwiza pakubako ukukatala pamo ukabefu.

⁷ Ukulama kukwiza pakubako bwila na bwila, umusanya pamo ubusiku butakwiza pakubangako. Isiku linilyo we Mwene mpela alimenye. Pachamabwila kukwiza pakuba ulukozyo.

⁸ Pisiku linilyo amizi amapela bumi ghakwiza pakwendagha ukufuma mu Yelusalemu, u hafu ghakwiza pakwendagha kubufumilo ubwa Nyanja Imfwe, sona u hafu uyunji ghakwiza pakwendagha kubwinjililo ubwa Nyanja iya Medeteleniya pachisanya napa chisiku.

⁹ U Mwene akwiza pakuba we mwene uwa chisu chosi ichapasi. Pisiku lilalila akwiza pakubako u Mwene weka, sona akwiza pakumanyikwa ni tabwa lyoka mpela.

¹⁰ Ichisu chosi chikwiza pakuba likombe ukwanda ku Geba mupaka ku Limoni, kuntende ukwa kaya akakulu nkani aka Yelusalemu. Loli u Yelusalemu akwiza pakuba buzilo ubwakukwela ukwanda pa Mulyango uwa Benjamini mupaka pa Mulyango Uwakwanda, mupaka pa Mulyango Uwapakunto, sona ukwanda pa Chitembe icha Hananeli mupaka pachakukanyilamo amampesya icha mwene.

¹¹ Abantu bakwiza pakwikala mukaya kalakala, pakuti mutakwiza pakubamo sona inguno nukunanganika. U Yelusalemu akwiza pakwikala umwakufwasa.

¹² Ichi cho chiwaya chicho u Mwene akwiza pakuzifunda nacho inko zyosi, zizyo zikalwa ubwite nu Yelusalemu: Amabili ghabo ghakwiza pakubola bo bimiliye, amaso ghabo ghakwiza pakubola, sona zyope indimi zyabo zikwiza pakubola mumalomo ghabo.

¹³ Pisiku lilalila u Mwene akwiza pakubavulungannya abantu nubogha, umuntu wesi akwiza pakuyilema inyobe iya muntu uyunji nukwanda pakulwa.

¹⁴ Bope aba Yuda bakwiza pakulwa ubwite nu Yelusalemu. Po ubukabi bosi ubwakuzyungulila inko bukwiza pakufyuliwa kokuti u golide nu siliva sona na menda aminji.

¹⁵ Ichiwaya ichakoghofya nkani ichakuyana na chilachila chikwiza pakuzighogha ifalasi ni mpunda ni ngamila sona ni vinyamana ivinji vyosi muvisakasa vilavila.

¹⁶ Po abantu bosi abakusyala bumi pakasi pa inko, babo bakalwanga ubwite nu Yelusalemu, bakwiza pakubukagha pakumwiputa u Mwene, umwaka nu mwaka u Mwene Uwamaka Ghosi nukuba nu Lusekelo ulwa Visakasa.

¹⁷ Nanti uluko lumo ulwa muchisu ichapasi lutakubukako ku Yelusalemu pakumwiputa u Mwene, u Mwene Uwamaka Ghosi, ivula yitakwiza pakutima muchisu chabo.

¹⁸ Nanti abantu aba muchisu icha Ijiputi batakubukako nukubapo, batakwiza pakuba ni vula. U Mwene akwiza pakuziwisizya inko ichiwaya chicho akaziyivya inko zizyo zikukana pakubukako nukuba nu Lusekelo ulwa Visakasa.

¹⁹ Lunulu, lukwiza pakubanga lufundo ulwa bantu aba muchisu icha Ijiputi sona nu lufundo ulwa inko zyosi, babo batakubukako ku Lusekelo ulwa Visakasa.

²⁰ Pisiku lilalila amajovu agha falasi ghakwiza pakusimbiwapo ukuti, “Vipaghuliwa kwa Mwene.” Isonta izyakupiyila mu Nyumba iya Mwene zikwiza pakuba zelu ngati nyinga pantazi pachighemo.

²¹ Po isonta yosi mu Yelusalemu ya mu Yuda yikwiza pakuba zelu kwa Mwene Uwamaka Ghosi, sona abantu bosi babo bakwiza pakubika ivyakwiyipa bakwiza pakusenda isonta zimo nukupiyilamo. Pisiku linilyo mutakwiza pakubamo yumo uwakughula nukughulizya mu Nyumba iya Mwene Uwamaka Ghosi.