Zekaliya 13 - IBAYIBOLO 2024

Ukuswefiwa kumbibi

¹ U Mwene Uwamaka Ghosi akuti, “Pisiku lilalila imbwibwi yikwiza pakubighukila abamunyumba iya Devedi, sona na bantu babo bakwikala mu Yelusalemu, ukuti yibaswefye kumbibi zyabo naku bunyazu bwabo.

² “Pisiku lilalila, nkwiza pakughazimya amatabwa agha vifwani ivya muchisu, batakwiza pakughakumbuka sona. Nkwiza pakubefyamo bosi babili abalaghuzi ni mizimu iminyazu iya muchisu chilachila. U Mwene anena.

³ Nanti umuntu yumo achili akumulaghula, uwise pamo unyina, babo bakamupapa, umubuzye ukuti, ‘Utakabanje we mumi, abaghiye afwanje, pachifukwa ichakuti akumutamantila u Mwene.’ Nanti akulaghula, abapapi bache bakwiza pakumughogha.

⁴ “Pisiku linilyo, umulaghuzi wesi akwiza pakukoziwa isoni pachifukwa icha chisetuka ichabulaghuzi bwache chicho akachennya. Atakwiza pakuvwala sona inkazo iya meya iya balaghuzi umwakuti abazimbulaye abantu.

⁵ Akwiza pakunena ukuti, ‘Ane tene mulaghuzi awe, ane ne mulimi, pakuti name ne mulimi ukwanda kubwana bwane.’

⁶ Nanti umuntu yumo akumulalusya akuti, ‘Nkimba choni chicho uli ni vilonda vinivi mumubili wako?’ Akwiza pakwamula ukuti, ‘Nkavulala munyumba iya mumanyani wane.’ ”

Ilamulo ilyakumughoghela umudimi uwa Chala

⁷ U Mwene Uwamaka Ghosi akuti, “Wee panga, nyamuka! Lwanga nu mudimi wane! Lwanga nu muntu yuyo ali papipi nane! Ghogha umudimi, po ing'ozi zikwiza pakunyampana. Nkwiza pakulwa ubwite na bantu bane.”

⁸ U Mwene akuti, “Muchisu chosi ivigaba vibili ivyavigaba vitatu, ivya bantu vikwiza pakughoghiwa, loli ichigaba choka ichavigaba vitatu chikwiza pakuba nubumi.

⁹ Ichigaba ichabutatu nkwiza pakuchisumbila mumoto. Nkwiza pakubaswefya ngati we siliva, sona nukubayela ngati we golide. Bakwiza pakulyiputa itabwa lyane, nkwiza pakubamula po nkwiza pakunena ukuti, ‘Bantu bane.’ Abene bakwiza pakwamula ukuti, ‘U Mwene we Chala witu.’ ”