Zekaliya 10 - IBAYIBOLO 2024

U Mwene akulayizya pakubatabula abantu bache

¹ Mulabaye ivula kwa Mwene pakabalilo aka chisiku, yuyo akutuma amabingu aghavula, sona akubapa abantu ivula iyakusalasata, akumezya ivibyalwa mumaghunda agha muntu wesi.

² Ivifwani vikunena ubumyasi, bope abalaghuzi bakwennya ivisetuka ivyabumyasi, bakunena ivilota ivyabumyasi, ukusangalusya kwabo kwabulo. Polelo abantu bakwendakwenda bulo ngati ng'ozi izyakuyivyiwa zizyo zite nu mudimi.

³ U Mwene Uwamaka Ghosi akuti, “Ukukalala kwane kukwaka pabadimi, sona nkwiza pakubafunda abalongozi. Pakuti nkwiza pakuzisungilila ing'ozi zyane, abantu aba mu Yuda, nkwiza pakubapela pakuba bamaka nkani ngati falasi izya bwite.

⁴ Pakasi papabo akwiza pakubonekapo weka, yuyo akwiza pakuba ngati libwe ilya pankuto, nutwakukomelela ichisakasa, nubwele ubwakulwila ubwite, sona na balaghili bosi.

⁵ Bosi poka bakwiza pakuba ngati bantu abamaka, abakubakanyankila mumatope abalwani babo. Bakwiza pakulwa nkani, pachifukwa ichakuti u Mwene ali nabo, bakwiza pakubapota abakukwela pafalasi.

⁶ “Nkwiza pakubapela abantu aba mu Yuda, pakuba bamaka nkani, nukulupoka uluko ulwa Yosefu. Nkwiza pakubanyosezyamo, pachifukwa ichakuti indi nabo ni chililizi. Bakwiza pakuba ngati po intabakanitepo nalumo, pakuti ane ne Mwene u Chala wabo, sona nkwiza pakubamula.

⁷ Aba Efulayimu bakwiza pakuba ngati bantu abamaka nkani, bakwiza pakuhoboka nkani mumoyo ngati bantu babo bakolizwe u vinyo. Abana babo bakwiza pakuchennya nukusekela, amoyo ghabo ghakwiza pakuhoboka mwa Mwene.

⁸ Nkwiza pakubafyunizya abantu bane nukubabungannya. Naloliloli nkwiza pakubatabula, po bakwiza pakuba binji nkani pamaso papane.

⁹ Napapo nkabanyampanizizya pakasi pa inko, loli pope bulo bakwiza pakunkumbuka ku vyisu ivyakubutali. Abene poka na bana babo bakwiza pakuba bumi, sona bakwiza pakunyokela.

¹⁰ Nkwiza pakubefyamo muchisu icha Ijiputi nukubwela nabo. Nkwiza pakubabungannya ukufuma nabo ku Asiliya, nukufika nabo ku Giliyadi nu Lebanoni, patakwiza pakubapo ubuzilo ubwakubakwana.

¹¹ Abantu bane bakwiza pakudumusannya munyanja iya ntamyo, nkwiza pakughamazya amayigha agha panyanja. Ubwibizu ubwa lusoko ulwa Nayilo bukwiza pakupwa, kope ukwituvya ukwa ba Asiliya kukwiza pakwisiwa, indisa iya bumwene iya ba Ijiputi yikwiza pakupyoka.

¹² Nkwiza pakubakazya abantu bane mwa Mwene, sona mwitabwa lyache bakwiza pakwenda.” U Mwene anena.