Zekaliya 1 - IBAYIBOLO 2024

Abantu bitiziwa pakunyokela kwa Mwene

¹ Mumwezi uwa eyiti umwaka uwabubili, bo u Daliyasi akulaghila mu Peleziya u Mwene akamubuzya u mulaghuzi u Zekaliya u mwana uwa Belekiya umwizukulu uwa Ido ukuti,

² “U Mwene akabakalalila nkani abanyenya binyu.

³ Polelo babuzye abantu ukuti: U Mwene Uwamaka Ghosi ati, ‘Nyokela kukwane, po nane nkwiza pakunyokela kukwinyu.’ U Mwene Uwamaka Ghosi anena.

⁴ Mutakabanje ngati bo banyenya binyu, babo kale abalaghuzi bakababuzyanga amazyu ghane. Bakababuzyanga ukuti, ‘Baleke ububibi bwabo sona ni mbibi zyabo loli batakanteghelezya pamo ukunyivwila.’ U Mwene Uwamaka Ghosi anena.

⁵ ‘Nkimba ilelo abanyenya binyu bali ko kwiyi? Nkimba abalaghuzi baliko bwila na bwila?

⁶ Loli abantu batakaghivwila amazyu ghane ni ndaghilo zyane, zizyo nkabapa ababombi bane abalaghuzi.’ “Po bakapinduka nukuti, ‘U Mwene Uwamaka Ghosi atubombela ukuyana ni zila zyitu sona ni mbombo zyitu.’ ”

U Mulaghuzi akwennya ifalasi muchisetuka

⁷ Pisiku ilya 24 umwezi uwa 11, mumwezi uwa Shebati, mumwaka uwabubili bo u mwene u Daliyasi akulaghila, u Mwene akamubuzya umulaghuzi u Zekaliya, umwana uwa Belekiya, umwizukulu uwa Ido akati:

⁸ Pabusiku nkennya ichisetuka, pakaba uwakwendezya ifalasi inchesamu. Akimililagha pakasi pa makwi ghamo agha ntumbusya mwikombe. Po kwisinda kwache kukaba abakwendezya ifalasi inchesamu, ni yamabala sona ni swepu.

⁹ Nkamulalusya nkati, “Wee songo, nkimba banaba bo bawenu?” Uwantumi yuyo akanenagha nane akanyamula akati, “Nkwiza pakukulanjizya mumo babeleye.”

¹⁰ Umuntu yuyo akimililagha pakasi pa makwi agha ntumbusya akandingannya akati, “Banaba bo babo u Mwene abatuma pakuchitendela ichisu chosi ichapasi.”

¹¹ Bakamubuzya sona uwantumi uwa Mwene, yuyo akimililagha pakasi pa makwi agha ntumbusya akati, “Twachitendela ichisu chosi ichapasi, po twagha ukuti abantu bosi bakutuzya sona bali nu mutende.”

¹² Po uwantumi uwa Mwene akamula akati, “Wee Mwene Uwamaka Ghosi, nkimba utakwiza pakumupelela ichisa mupaka liyi u Yelusalemu nutwaya utwa mu Yuda tuto watukalaliye amaka 70?”

¹³ U Mwene akamwamula uwantumi yula ni chisa sona na mazyu aghalukazyo.

¹⁴ Po uwantumi yuyo akanenagha nane akambuzya akati, “Fumusya ukuti u Mwene Uwamaka Ghosi ati, ‘Ubuzuba bwane bukwaka pa Yelusalemu, sona na pighamba izelu ilya Ziyoni,

¹⁵ loli inzikalaliye nkani inko zizyo zili pamutende. Nazikalaliye panandi bulo, loli ilelo babafunda nkani abantu bane.’

¹⁶ “Polelo u Mwene akuti, ‘Nanyokela ku Yelusalemu nu moyo uwa chililizi, po palapala inyumba yane yikwiza pakuzengiwapo sona.’ U Mwene Uwamaka Ghosi ati, ‘Nkwiza pakugholosezya ulukusa ulwakupimila pa Yelusalemu.’

¹⁷ “Endelela pakufumusya bulo ukuti: U Mwene Uwamaka Ghosi ati, ‘Utwaya twane utukulu nkani tukwiza pakwizula ni vintu ivyiza, po u Mwene akwiza pakumusangalusya sona u Ziyoni nukumusala u Yelusalemu.’ ”

Ichisetuka icha mpembe folo

¹⁸ Po nkatalankannya, pamaso papane pakaba impembe folo!

¹⁹ Nkamulalusya uwantumi yuyo akanenagha nane nkati, “Nkimba vinivi vyo vyoni?” Akanyamula akati, “Zinizi zyo mpembe zizyo zikamunyampannya u Yuda nu Izilayeli, sona nu Yelusalemu.”

²⁰ Po u Mwene akandanjizya abasyani folo.

²¹ Nkalalusya nkati, “Nkimba biza pakubomba ichoni?” Akamula akati, “Zinizi zyo mpembe zizyo zikamunyampannya u Yuda, umwakuti atakabepo umuntu uwakusosonkela. Loli abasyani banaba biza pakuboghofya nukuzipota impembe izya inko, zizyo zikalwanga ni chisu icha Yuda nukubanyampanizizya kubutali nkani abantu bache bala.”