Zefaniya 3 - IBAYIBOLO 2024

Imbibi iya Yelusalemu nukutabuliwa

¹ Chighune kukaya akakulu nkani, akasambuke na kanyazu, kako kakubayivya abantu bache!

² Katakumwivwila nayumoyumo, sona katakwitika ukuchemeliwa. Katakumusubila u Mwene, katakupalamila kwa Chala wache.

³ Amakambala ghache ghakubuluma ngati nkalamu, abalaghili bache bali ngati bo bakambwe babo bakwenda pachamabwila, batakuchilekapo nachimochimo ichakulya icha pandabindabi.

⁴ Abalaghuzi bache bakwituvya sona te basubiliwa. Abaputi bache bakubunyazya Ubuzilo Ubuzelu nukuzinangannya indaghilo.

⁵ U Mwene umugholosu ali mukaya, atakunangapo nakamokamo. Indabindabi ni ndabindabi akuvumbula ubwanaloli bwache, sona kubuche bosi atakupotwapo, loli babo te bagholosu bate ni soni.

⁶ U Mwene akakabuzya akaya kala akati, “Nazinangannya inko zyosi, sona amalinga ghabo naghamongolannya. Imisebo yabo nayinangannya atalipo nayumoyumo umuntu uwakudumusannyamo. Utwaya twabo twananganika sona mute nu muntu nayumoyumo.

⁷ Nkakabuzya akaya akakulu nkani nkati, ‘Naloliloli ukwiza pakunnyila nukwitika ukuchemela kwane!’ Po akaya kache katangananganika, pamo ukuti ulufundo lwane lukawile. Loli pope bulo bakaba bengo nkani pakubomba ivyamabeko vyabo vyosi.

⁸ Mundindilile pisiku lilyo nkwiza pakubikila ubwakaboni pakuti nadumula pakuzibungannya inko, nukububungannya ubumwene. Pakubapungulila ubukali bwane ubwakoghofya. Ichisu chosi ichapasi chikwiza pakulungulila numoto uwa buzuba bwane.” U Mwene anena.

⁹ “Pakabalilo kalakala nkwiza pakuyiswefya imilomo iya inko umwakuti abantu bosi balichindikaye itabwa ilya Mwene, nukumubombela nu moyo ghoka.

¹⁰ Ukwandila ko kwisila ilya lusoko ulwa Etiyopiya, abantu bane abakunyiputa na bakunyampana bakwiza pakubika ivyakwiyipa kukwane.

¹¹ Pisiku lilalila mutakwiza pakukoziwa isoni, pachifukwa ichakuti munsambukiye, pakuti nkwiza pakubefyamo mukaya kinyu, abantu babo bakwikwezya. Mutakwiza pakwituvya sona pighamba lyane izelu.

¹² Loli nkwiza pakubaleka pakasi papinyu abololo na bakwiyisya, babo bakuchimbilila kukwane, kune Mwene.

¹³ Abakusyalako aba Izilayeli batakwiza pakunanga, batakwiza pakunena ubumyasi, pamo ubuzimbuli ukuti bwaghiwe mumilomo yabo. Bakwiza pakulya nukulambalala, sona atalipo nayumoyumo yuyo akwiza pakuboghofya.”

Ulwimbo ulwa lusekelo

¹⁴ Wee Ziyoni, imbagha nkani! Wee Izilayeli, kolomokagha nkani! Wee Yelusalemu, hobokagha nukusekela nu moyo wako ghosi!

¹⁵ U Mwene efyapo ulufundo lwinyu, nukubachimbizya abalwani binyu. U Mwene, umulaghili uwa ba Izilayeli ali namwe, mutakwiza pakunyila sona intamyo zimo.

¹⁶ Pisiku lilalila bakwiza pakumubuzya u Yelusalemu ukuti, “Wee Ziyoni, utakanyilaye utakawanje amaka.

¹⁷ U Mwene u Chala winyu ali namwe, wamaka nkani pakupoka. Akwiza pakuhoboka nkani namwe mulughano lwache akwiza pakubapa ubumi ubupya, akwiza pakusekela namwe pakwimba inyimbo.”

¹⁸ “Pa masiku agha lusekelo nkwiza pakwefya intamyo kukwinyu, umwakuti mutakakoziwanje isoni nalumolumo.

¹⁹ Pakabalilo kalakala nkwiza pakubafunda babo bakabayivyanga. Nkwiza pakubapoka abalemazu, nukubabungannya babo banyampanite. Nkwiza pakubapala nukubachindika muchisu chosi ichapasi mumo bakakoziwa isoni.

²⁰ Pakabalilo kalakala nkwiza pakubabungannya, nukubabwezya kukaya. Nkwiza pakubachindika nukubapala, pakasi pabantu bosi aba muchisu ichapasi. Nkwiza pakubanyosezya ubwiza bwinyu, bo mukwennya na maso ghinyu.” U Mwene anena.