Zefaniya 2 - IBAYIBOLO 2024

Ukubabuzya abantu aba mu Yuda ukuti bapinduke

¹ Wee luko, lulo lute ni soni bungana poka, bungana poka,

² bo uchili pakupupuziwa ngati lyelelo, bo ubukali ubwa Mwene ubwakoghofya butakwiziye sona bo ubukali bwache butakuwiliye.

³ Mumulondaye u Mwene mwebosi mwe mukwiyisya, mwe muli muchisu, amwe mwe mukubomba zizyo akubalamula. Mubulondaye ubugholosu, sona nukwiyisya. Lumo mungapona pisiku ilya kukalala ukwa Mwene.

Ubulongi paba Filisiti

⁴ Akaya aka Gaza kakwiza pakulekiwa, sona akaya aka Ashikeloni kakwiza pakuba chisami. Akaya aka Ashidodi kakwiza pakulekiwa pakasi pamusanya, sona akaya aka Ekiloni kakwiza pakunyunkuliwa.

⁵ Chighune ku mwe mukwikala mulubazu ulwa nyanja amwe mwe luko ulwa ba Keleti, amazyu agha Mwene ghakubasusya, wee Kenani, ichisu icha ba Filisiti. “Nkwiza pakukunangannya, sona atalipo nayumoyumo yuyo akwiza pakusyalapo.” U Mwene anena.

⁶ Ichisu icha mulubazu ulwa nyanja mumo aba Keleti bakwikala chikwiza pakuba buzilo ubwa badimi sona ni vibagha ivya ng'ozi.

⁷ Chikwiza pakuba cha bakusyalako icha Yuda, kulakula bakwiza pakwagha apakudimilapo. Pachamabwila bakwiza pakughona munyumba izya Ashikeloni. U Mwene u Chala wabo akwiza pakubasungilila, po akwiza pakubanyosezya ubwiza bwabo.

Ubulongi paba Mowabu naba Amoni

⁸ “Nivuye intuko izya ba Mowabu, sona nu musamu uwa ba Amoni, babo bakubasamula abantu bane, nukuboghofya ukuti bakwiza pakuchifyula ichisu chabo.

⁹ Polelo, ane ne Mwene Uwamaka Ghosi u Chala umumi uwa Izilayeli nkulapa nkuti, ‘Naloliloli ichisu icha Mowabu chikwiza pakuba ngati cha Sodomu, sona bope aba Amoni bakwiza pakuba ngati chisu icha Gomola. Vikwiza pakuba vibanka ivya mbeya ni visami bwila na bwila. Abantu bane abakusyalako bakwiza pakuchifyula ichisu chabo, abakupona aba inko yane bakwiza pakupyana ichisu chabo.’ ” U Mwene anena.

¹⁰ Ulu lo lukwiza pakuba lufundo lwabo, pachifukwa icha kwituvya kwabo. Pakuti bakubatuka nukubobezya abantu aba Mwene Uwamaka Ghosi.

¹¹ U Mwene akwiza pakuboghofya, bo akubanangannya abachala bosi aba chisu ichapasi. Inko zyosi zikwiza pakumwiputa, inko yosi muchisu chache.

Ubulongi paba Etiyopiya

¹² “Namwe bulo, mwe bantu aba mu Etiyopiya mukwiza pakughoghiwa nupanga wane.” U Mwene anena.

Ubulongi paba Asiliya

¹³ U Mwene akwiza pakulanjizya amaka ghache pakulwana nichigaba icha kumitu nukumunangannya u Asiliya, akwiza pakukapela akaya aka Ninive pakuba chisami, sona chikwiza pakuba chumizu ngati nkolongo.

¹⁴ Ivitekwa vikwiza pakulambalala mulamula, ivinyamana ivya luko losi ivya munkolongo. Umpughulu ni nkitwa vikwiza pakulila muvisami. Ichongo chabo chikwiza pakwivwika mumabwindo, po abachigobe bakwiza pakulila mumilyango, amatabwa agha mwale ghakwiza pakuba pabuzelu bulo.

¹⁵ Kanaka ko kaya akakulu nkani kako katakupasya kakikalagha umwakufwasa. Kakinong'onagha ukuti, “Ane ne nene, sona atalipo uyunji uwakunchila.” Ilelo kaba chisami, akaya kavinyamana ivya munkolongo! Bosi babo bakudumusannya palapala bakukaseka, bakwiza pakuchenuka nukupukunnya imitu yabo.