Zefaniya 1 - IBAYIBOLO 2024

¹ Pakabalilo aka bulaghili ubwa Yosiya umwana uwa Amoni, yuyo akaba we mwene uwa chisu icha Yuda, u Mwene akamubuzya u Zefaniya umwana uwa Kushi, umwizukulu uwa Gedaliya umwana uwa Amaliya, yuyo akaba waluko ulwa Hezekiya akati,

Isiku ilya bulongi ubwa Mwene

² “Nkwiza pakuvipyela ivintu vyosi ivya pachisu ichapasi.” U Mwene anena.

³ “Nkwiza pakubazimizya abantu ni vinyamana, nkwiza pakuvinangannya iviyuni sona niswi, nivifwani vivyo vikubapela abantu ababibi pakwipunula. Nkwiza pakubanangannya abantu ababibi bo nkubazimizya abantu pachisu ichapasi.” U Mwene anena.

⁴ “Nkwiza pakubafunda abantu aba muchisu icha Yuda, sona na bosi babo bakwikala mu Yelusalemu. Nkwiza pakubazimizya pabuzilo ubu aba Baala bosi abakusyala, sona nkwiza pakughazimya amatabwa agha bantu, sona na baputi babo bakuchiputa ichifwani icha Baala.

⁵ Nkwiza pakubanangannya babo bakukwela pavisonje ivya nyumba pakwiputa izuba nu mwezi sona ni ntondwa. Nkwiza pakubazimizya babo bakufughama pasi, nukulapila mwitabwa ilya Mwene sona pakabalilo kanako bakulapila mwitabwa ilya chala u Moleki.

⁶ Nkwiza pakubanangannya abantu babo bakukana pakumukonka u Mwene sona babo batakumulondelezya pamo pakumubuzikizya u Mwene.”

⁷ Ubanje myee pamaso pa Mwene Uwamaka Ghosi, pakuti isiku ilya Mwene lili papipi. U Mwene ayannya ichakwiyipa, sona abapaghula abantu babo abitizizye.

⁸ “Pisiku ilyachakwiyipa icha Mwene, nkwiza pakughafunda amakambala nabana bamwene, sona nabantu babo bakubomba inyiho injeni.

⁹ Pisiku lilalila nkwiza pakubafunda, bosi babo bakubiputa aba chala abanji, abantu babo bakwizuzya inyumba izya bachala babo, ni vyongo sona nu bumyasi.

¹⁰ Pisiku lilalila ukulila kukwiza pakwivwika pa Mulyango Uwaswi. Ukufwifwitila kukwiza pakwivwika ukufuma Muchigaba Ichipya, ukukoma kukwiza pakwivwika mutughamba.” U Mwene anena.

¹¹ “Lilagha, amwe mwe mukwikala muminalo, abaghulizi binyu bosi bakwiza pakuzimila, sona bosi babo bakughulizya u siliva bakwiza pakunangika.

¹² “Pakabalilo kalakala, nkwiza pakumulondelezya u Yelusalemu ni nyale nukubafunda babo bakwituvya, sona abantu babo bali navyo vyosi nukwisubila. U Mwene anena. “Abantu banaba bakwinong'ona ukuti, ‘U Mwene atakwiza pakubombapo chimo, ichiza pamo ichibibi.’

¹³ “Ubukabi bwabo bukwiza pakufyuliwa, sona inyumba zyabo zikwiza pakumongoliwa. Bakwiza pakuzenga inyumba, loli batakwiza pakwikalamo. Bakwiza pakubyala amampesya, loli batakwiza pakung'wela uvinyo.”

¹⁴ Isiku ikulu ilya Mwene lili papipi sona likwiza umwalubilolubilo. Teghelezya! Ukulila pisiku ilya Mwene kukwiza pakubaba nkani, kulakula bope abasilikali abajivu nkani bakwiza pakukolomoka.

¹⁵ Isiku lila likwiza pakuba lisiku ilya bukali, isiku ilya mayimba sona nilya kubaba. Likwiza pakuba lisiku ilya ntamyo nukunanganika, likwiza pakuba lisiku ilya chisi nichitima, likwiza pakuba lisiku ilya mabingu ni chisi ichakoghofya,

¹⁶ pisiku linilyo kukwiza pakwivwika ukulila ukwa mapati, ni chongo icha bwite ukulwana nutwaya utukulu nkani utwa malinga sona ni vitembe ivya pankuto.

¹⁷ “Nkwiza pakubawisizya abantu intamyo sona bakwiza pakwenda ngati bafwamaso, pachifukwa ichakuti bamunangila u Mwene. Ibanda lyabo likwiza pakukupuka ngati lufumbi sona imivimba yabo yikwiza pakuba ngati vintu ivinyazu.”

¹⁸ Usiliva pamo ugolide wabo vitakwiza pakubapoka pisiku ilya kukalala ukwa Mwene. Mumoto wache uwakabini ichisu chosi ichapasi chikwiza pakulungulila, pakuti akwiza pakubamala umwalubilolubilo abantu bosi babo bakwikala mulamula.