Yoweli 3 - IBAYIBOLO 2024

U Chala akuzilonga inko

¹ U Mwene akuti, “Mumasiku ghalaghala, sona na pakabalilo kalakala, bo nkubanyosezya ubwiza abantu aba mu Yuda, na mu Yelusalemu,

² nkwiza pakuzibungannya inko zyosi, nukwika nazyo kwikombe ilya Yehoshafati. Nkwiza pakuzipa inongwa inko ukuyana ni mpyana iya bantu bane aba Izilayeli, pachifukwa ichakuti babanyampanizye abantu bane pakasi pa inko, sona bagabana ichisu chane.

³ Bakapanga amayele na bantu bane sona bakaghulizannya abalumendo nu bwamalaya sona abalindu nu vinyo umwakuti bakolwe.

⁴ “Nkimba u Tile nu Sidoni poka ni chigaba chosi icha Filisiti, muli na mbombo yoni nane? Nkimba mukuntanizya pa zizyo nabomba? Nanti naloli mukuntanizya, nane bulo nkwiza pakubatanizya lubilolubilo pa zizyo mwabomba.

⁵ Pachifukwa ichakuti mukasenda usiliva nu golide wane sona mukanyamula ubukabi bosi nukubwinjizya munyumba zyinyu izya kwiputilamo.

⁶ Mukabaghulizya aba Yuda, naba bantu aba mu Yelusalemu kuchisu icha ba Giliki, ukuti babuke kubutali ni chisu chabo.

⁷ “Loli nkwiza pakughanyamusya amoyo ghabo ukuti bepemo muchisu ichakubutali, kuko mukabaghulizya, nane nkwiza pakumubombela u Tile nu Sidoni sona nu Filisiti pazizyo mwababombela.

⁸ Nkwiza pakubaghulizya abana bako abalumendo na balindu kuba Yuda, po abene bakwiza pakubaghulizizya aba Sabe kuchisu icha kubutali nkani.” Ane ne Mwene nanena.

⁹ “Fumusya zinizi pakasi pa inko: Iyannya pakulwa ubwite! Bavundumusye pakulwa ubwite! Abantu bosi abakulwa ubwite bize papipi pakulwa.

¹⁰ Syana amajembe ghinyu pakuba wepanga, zyope isengo zyinyu pakuba zyo mpalala. Abadedebazu banenaye ukuti, ‘Najimba u moyo!’

¹¹ Zagha lubilolubilo, amwe mwe inko zyosi ukufuma kunkuto zyosi, bungana kulakula.” Wee Mwene tuma abasilikali bako!

¹² U Mwene akuti, “Abantu aba inko zyosi biyannye, nukwiza kwikombe ilya Yehoshafati, pakuti kulakula nkwiza pakuzilonga inko izyakufuma kunkuto zyosi.

¹³ Senda ichikwakwa, pakuti akabalilo aka nyinulo kafikila. Zagha kanyankila amampesya, pakuti ichakukanyilamo amampesya chizuye. Isonta izya kusungilamo uvinyo zikufuluka, pakuti ububibi bwabo bukulu nkani!”

¹⁴ Ivilundilo ni vilundilo vili mwikombe ilya bulongi! Pakuti isiku ilya Mwene lili papipi mwikombe ilya bulongi.

¹⁵ Izuba nu mwezi vikwiza pakuba bulo fii, zyope intondwa zitakwiza pakulama na lumo.

¹⁶ U Mwene akwiza pakubuluma mu Ziyoni, sona akwiza pakupaya mu Yelusalemu. Kumwanya ni chisu ichapasi vikwiza pakuyingana. Loli u Mwene akwiza pakuba chakuponelamo abantu bache, sona akwiza pakuba lilinga ilya ba Izilayeli.

Ulusayo ulwa bantu aba Chala

¹⁷ Po ukwiza pakumanya ukuti, “Ane ne Mwene u Chala wako akwikala mu Ziyoni, ighamba lyane izelu. Akaya aka Yelusalemu kakwiza pakuba kazelu, abayeni batakwiza pakukapota sona nalumo.

¹⁸ “Pisiku linilyo amaghamba ghakwiza pakutonya uvinyo umunoni umupya, tope utughamba tukwiza pakwenda ulukama. Isoko zyosi izya mu Yuda zikwiza pakwizula na mizi. Imbwibwi zikwiza pakwenda ukufuma mu Nyumba iya Mwene mupaka nukufika mwikombe ilya Akasiya.

¹⁹ Loli u Ijiputi akwiza pakuba chisami, wepe u Edomu akwiza pakuba nkolongo, pachifukwa icha kulwa ubwite na bantu aba mu Yuda nukukupula ibanda ilya bantu babo bate ninongwa muchisu chabo.

²⁰ Mu Yuda mukwiza pakwikalamo abantu bwila na bwila, sona inkulilo zyosi izya bantu zikwiza pakwikala mu Yelusalemu.

²¹ Nkwiza pakubatanizya aba Edomu naba Ijiputi pachifukwa icha libanda lilyo bakupula, ntakwiza pakubaleka bulo. Ane ne Mwene nkwikala mu Ziyoni!”