Yoweli 2 - IBAYIBOLO 2024

Isiku ilya bulongi ilya Mwene

¹ Lizya ipati pamwanya pa Ziyoni, kolomoka pighamba lyane izelu pakubasoka. Leka abantu bosi babo bakwikala muchisu batetemaye, pakuti isiku ilya Mwene lili papipi, sona lili pampuno bulo.

² Isiku ilya chisi sona nilya chitima, isiku ilya mabingu sona nilya chisi ichakoghofya. Abasilikali abamaka nkani bakwiza, ngati ko kubuche kuvwinkite mumaghamba mosi. Banaba batabonekitepo nalumo, napapo mo muntazi batakwiza pakuboneka.

³ Kuntazi kukwabo umoto ghukulungulizya ivintu vyosi, sona kwisinda kukwabo indimi izya moto zikocha vivyo vyasyala. Kuntazi kukwabo ichisu chila chili ngati mughunda uwa Edeni, sona kwisinda kukwabo chikanduka pakuba nkolongo, patakabapo nachimochimo ichakusyalamo.

⁴ Bakuboneka ngati falasi, bakuchimbila ngati falasi izya bwite.

⁵ Ukunyelanyela kwabo kuli ngati zyo ngolo mumaghamba, ngati moto ghugho ghukupanta ghukulungulizya ivisinko, ngati musilikali uwamaka yuyo iyanizye pakulwa ubwite.

⁶ Inko zikunyila pakubennya, ivyeni vyabo visulumanizye.

⁷ Bakulefuka ngati bo basilikali ababwite, sona bakukwela amalinga ngati basilikali. Umuntu wesi ali pamuzele, sona atakupulumpa.

⁸ Batakusunkilizannya, umuntu wesi akulefuka ukubuka kuntazi, bakukomana nutulasilo, loli pope bulo chitalipo ichakubakanizya.

⁹ Bakunyelela mukaya akakulu nkani, bakunyela amalinga, sona bakukwela panyumba, ngati mwiba akwinjilila pibwindo.

¹⁰ Ichisu chikuyingana pantazi papabo, kope kumwanya kukutetema. Izuba nu mwezi vyaba bulo fii, sona zyope intondwa zitakulama nalumo.

¹¹ Izyu ilya Mwene likujilimisya pamaso pabasilikali bache, abasilikali bache binji nkani ukuchilapo. Bamaka babo bakubomba zizyo u Mwene akulonda. Isiku ilya Mwene likulu nkani, sona lyakoghofya nkani. Nkimba wewenu yuyo angajimba?

Abantu bakubuziwa ukuti bapinduke

¹² Nilelo bulo u Mwene akuti, “Nyokela kukwane na moyo ghinyu ghosi, mutuzyanje pakulya, mulilaye, sona mufwifwitilaye.”

¹³ Zepula amoyo ghinyu, mutakazepulaye inkazo zyinyu. Nyokela kwa Mwene u Chala winyu, pakuti wachisa sona wachililizi. Akuzyela pakukalala, akuzibomba zizyo alayizya, akubahobokela imbibi abantu, sona atakulonda pakubafunda.

¹⁴ Lumo anganyosyako umoyo wache, nukululeka ulusayo kwisinda, ichakwiyipa icha busu sona ni cha vinyo, ivyakubika kwa Mwene u Chala winyu.

¹⁵ Lizya ipati mu Ziyoni, mubanje nukutuzya ukuzelu, sona mubanje ninkomano izelu.

¹⁶ Babungannye abantu sona mubaswefye, mubabungannye abasongo, bope abana babo bakonka mubabungannye. Umwenesendwa epayemo muchipinda chache, sona wepe yuyo akusendwa epayemo muchipinda chache.

¹⁷ Muleke umuputi yuyo akubomba pamaso pa Mwene, alilaye pakasi pa bwinjililo ubwa Nyumba iya Chala ni chighemo. Baleke banenaye ukuti, “Wee Mwene ubapelele ichisa abantu bako. Utakachipele ichilingo chako ukuti chisamuliwe. Nkimba choni chicho banenaye pakasi pa inko izinji ukuti, ‘Nkimba u Chala winyu ali ko kwiyi?’ ”

U Chala akunyosezyamo umuvundo muchisu

¹⁸ Po u Mwene akwiza pakuba nu buzuba pachifukwa icha chisu chache, sona akwiza pakubapelela ichisa abantu bache.

¹⁹ U Mwene akwiza pakubamula ukuti, “Nkubatumila ingano, nu vinyo umupya, sona na mafuta, vivyo vikwiza pakubakwana, Po ntakwiza pakubasamula sona pakasi pa inko.

²⁰ “Nkwiza pakubachimbizizya kubutali nkani abasilikali abakumitu, nukubachimbizizya kuchisu ichumizu sona chicho chite ni mboto. Abantu bache babo balongoleye nkwiza pakubachimbizizya ku Nyanja Imfwe iyakubufumilo bwizuba, bope abakwisinda nkwiza pakubachimbizizya ku Nyanja iya Medeteleniya. Amabili ghabo ghakwiza pakununka, naloliloli nkwiza pakubanangannya, pachifukwa icha vintu ivikulu vivyo babomba.

²¹ “Wee chisu, utakanyilaye awe hobokagha sona sekelagha. Pakuti u Mwene abomba ivintu ivikulu nkani.

²² Mwee vinyamana ivyamunkolongo mutakanyilaye, pakuti isote lyanda pakulemba. Amakwi ghanda pakwela ivikomwa vyache, ghope amakuyu na mampesya ghela nkani.

²³ Mwee bantu aba mu Ziyoni hobokagha, sona sekelagha mwa Mwene u Chala winyu, pakuti abapa ivula iyakwanda, sona abapa ivula inyinji, ivula iya chisiku niya lupepo ngati yakale.

²⁴ Apakukomelapo inyinulo pizulaye ni ngano, sona isonta izyakusungilamo uvinyo umupya na mafuta zifulukaye.

²⁵ “Nkwiza pakubanyosezya papo, pamaka ghosi ghagho umakanta anangannyanga, umakanta umukulu nkani sona nu kanta umunandi, impazi izinji izyakunangannya, sona nu pyela. Banaba bo basilikali babo nkabatuma ukuti babavwe.

²⁶ Mukwiza pakulya ivyinji nkani mupaka mwikute, po mulipalaye itabwa ilya Mwene u Chala winyu, yuyo ababombela iviswigho, bope abantu bane batakwiza pakukoziwa isoni.

²⁷ Po mukwiza pakumanya ukuti indi mu Izilayeli, ukuti ane ne Mwene u Chala winyu, sona nukuti atalipo uyunji, awe. Abantu bane batakwiza pakukoziwa sona isoni.

Isiku ilya Mwene

²⁸ “Pisinda pache nkwiza pakupungulila Umuzimu wane pabantu bosi. Abana binyu abalumendo na balindu bakwiza pakulaghula, abaghosi bakwiza pakulota ivilota, bope abalumendo bakwiza pakwennya ivisetuka.

²⁹ Pakabalilo kalakala nkwiza pakupungulila Umuzimu wane, pa bambombo bane abanavuli na bakolo bulo.

³⁰ Nkwiza pakubomba iviswigho kumwanya na pachisu ichapasi, kokuti ibanda, numoto sona ni lyosi vikwiza pakuba ngati libingu.

³¹ Izuba likwiza pakwanduka chisi, ghope umwezi ghukwiza pakwanduka libanda, bo litizite isiku ikulu nkani ilya Mwene sona ni lyakoghofya.

³² Umuntu wesi yuyo akulabila mwitabwa ilya Mwene akwiza pakupokiwa. Pakuti pighamba ilya Ziyoni na mu Yelusalemu mukwiza pakuba ubupoki, ukuyana namumo u Mwene anenela pakasi pabantu abakupona, pakwiza ukwaghiwapo babo u Mwene akubitizya.”