Yoweli 1 - IBAYIBOLO 2024

¹ Agha gho mazyu ghagho u Mwene akamubuzya u Yoweli umwana uwa Petiweli.

Umakanta akunangannya ivyakulya

² Mwee basongo, ivwa kuno, mwebosi mwe mukwikala muchisu, teghelezya. Nkimba ichintu chinichi chikabombiwapo lumo pakabalilo kinyu, pamo pakabalilo aka banyenya binyu?

³ Mubabuzye chinichi abana binyu, bope abana binyu bababuzyanje abana babo, sona bope abana babo bababuzyanje abana babo, mupaka inkulilo iya muntazi.

⁴ Chicho impazi inandi zyachileka, impazi inkulu nkani zyalyacho, chicho impazi inkulu nkani zyachileka, umakanta umunandi alyacho. Chicho umakanta umunandi achileka, umakanta umukulu alyacho.

⁵ Mwe baching'wela, lamusya sona lilagha! Mwee baching'wela aba vinyo, fwifwitilagha, pachifukwa icha vinyo umupya, pakuti afyuliwa pa milomo yinyu.

⁶ Umakanta umwinji nkani aghuye muchisu chane, wamaka nkani sona atangabelengiwa. Ali na mino ngati gha nkalamu inyanavuli, ghope amino ghache matali sona ghakwete nkani, ngati gha nkalamu inkolo.

⁷ Avinangannya ivibyalwa ivya mampesya ghane, sona aghapyolannya amakwi ghane agha makuyu. Nukwefya amakambi sona nukughasumba, mupaka isamba zyache zikaba bulo swee.

⁸ Fwifwitilagha ngati mulindu, bo avwalite amasaka, pakumulila umulumendo yuyo amuzingiliye.

⁹ Ivyakwiyipa ivya busu ni vya vinyo, vyefiwamo mu Nyumba iya Mwene. Abaputi bakulila, babo bakubomba pamaso pa Mwene.

¹⁰ Amaghunda ghananganika, sona chope ichisu chumiye. Ingano yananganika, amampesya ghumiye, sona imisyunguti yafoka.

¹¹ Mwe balimi, banga ni chitima, mwe balimi aba mampesya, lilagha. Lilagha pachifukwa icha ngano, sona na mapemba ghinyu, pakuti inyinulo yinyu yananganika.

¹² Amampesya ghumiye, amakwi agha makuyu ghafoka. Amanyele na mabale na bamulebe, sona na makwi ghosi agha mumaghunda ghumiye. Naloliloli ukwilagha ukwa muntu kwafoka.

Abantu bitiziwa ukuti bapinduke

¹³ Mwe baputi, vwalagha amasaka nukulila, mwe mukubomba pachighemo, lilagha. Mwe mukubomba pamaso pa Chala, zagha vwalagha amasaka busiku bosi, pakuti ivyakwiyipa ivya busu ni vyakung'wela vyimiwa mu Nyumba iya Chala winyu.

¹⁴ Lamula ukuti mutuzye pakulya, itizya ulukomano uluzelu, babungannye abasongosongo, sona na bantu bosi babo bakwikala muchisu, mu Nyumba iya Mwene u Chala winyu, po balilaye kwa Mwene.

¹⁵ Mwee, chighune pisiku lilalila! Pakuti isiku ilya Mwene lili papipi, sona likwiza ngati kunanganika, ukufuma ku Wamaka Ghosi.

¹⁶ Ichakulya chitu chikumala bo tukwennya na maso ghitu, kope ukuhoboka nukusekela, kutalimo mu Nyumba iya Chala witu.

¹⁷ Imbeyu zyatunkana bulo, pachifukwa ichakuti iching'wezi chitalipo pasi. Ivipinda ivyakusungilamo ivyakulya vyananganika, zyope intamba zyamongonkana, pachifukwa ichakuti inyinulo nayimo.

¹⁸ Ivitekwa vikukoloma, pachifukwa icha zala. Umudimo uwa ng'ombe ghukwendakwenda bulo, pachifukwa ichakuti isote nalimo, zyope ing'ozi zikuyimba nkani.

¹⁹ Wee Mwene, tukulila kukwako, pachifukwa icha moto ghugho ghocha apakudimilapo ivitekwa, zyope indimi izya moto zyocha amakwi ghosi.

²⁰ Ni vinyamana vyope bulo ivya muzi vikukulilila, pachifukwa ichakuti utusoko twapwa, sona umoto ghocha apakudimilapo ivitekwa.