Yoshwa 9 - IBAYIBOLO 2024

Aba Gibeyoni bakumuzimbula u Yoshwa

¹ Abamwene bosi babo bakikalagha kubwinjililo bwizuba ubwa lusoko ulwa Yolodani bakivwa zinizi, kokuti abantu bosi aba mumaghamba na mumakombe sona naba muntende mumaghamba kubwinjililo bwizuba naba mulubazu ulwa Nyanja iya Medeteleniya mupaka ku Lebanoni kumitu. Banaba bakaba bamwene aba ba Hiti naba Amoli naba Kenani naba Pelezi naba Hivi sona naba Yebusi.

² Bosi bakabungana poka ukuti balwe ubwite nu Yoshwa, poka naba Izilayeli.

³ Loli bo aba Gibeyoni bivwa zizyo u Yoshwa akakabombela akaya aka Yeliko naka Ayi,

⁴ bakinong'ona izya kumuzimbula. Po bakamutumila intumi ni mpunda zyabo, bo zinyamuye ichakulya mumasaka amazepuke, sona nu vinyo munyambi igambike nkani.

⁵ Intumi zila zikavwala inkwato izyakale sona igambike nukuvwala amenda aghakale. Ivibama vivyo bakapaya vikaba vyumizu, sona vikaba ni chuku.

⁶ Po bakabuka kwa Yoshwa bo ali muvisakasa pa Giligali nukunena nu Yoshwa poka naba Izilayeli ukuti, “Aswe twafuma kuchisu icha kubutali nkani, polelo tukulonda tufingane namwe ulufingo.”

⁷ Loli aba Izilayeli bakamula bakati, “Lumo mukwikala papipi naswe. Nkimba tungafingana bulibuli ulufingo namwe?”

⁸ Bakamubuzya u Yoshwa bakati, “Aswe twe babombi bako.” Po u Yoshwa akabalalusya akati, “Nkimba mwe bawenu, mwafuma kwiyi?”

⁹ Bakamwamula bakati, “Aswe twe babombi bako twafuma kuchisu icha kubutali nkani, pachifukwa ichakuti twivuye ipangwi ilya Mwene, u Chala wako. Twivuye zyosi zizyo akabomba muchisu icha Ijiputi,

¹⁰ na zyosi zizyo akababombela abamwene babili aba ba Amoli, abakubufumilo bwizuba ubwa lusoko ulwa Yolodani, u Sihoni uwamu Heshiboni nu Ogi uwamu Bashani, yuyo akalaghilagha mu Ashitaloti.

¹¹ Po abalongozi bitu poka na bantu bosi babo bakwikala muchisu chitu bakatubuzya bakati, ‘Mwiyannye mwebene pakubuka ubulendo ubutali nkani. Bukagha mukomane naba Izilayeli nukubabuzya ukuti, “Aswe twe babombi binyu, zagha tufingane ulufingo.” ’

¹² Bo tukunyamuka ubulendo bwitu, ivibama vivyo tukapaya vikaba vichili vitukizu. Loli ilelo ennya vyumite, sona vili ni chuku.

¹³ Inyambi zinizi zikaba mpya bulo bo tukupungulilamo uvinyo, loli ilelo ennya zyazepunkana. Amenda ghitu poka ni nkwato vyaba visepe bulo pachifukwa icha bulendo ubutali bunubu.”

¹⁴ Po aba Izilayeli bakaghonjako impayo zyabo, loli batakamubuzikizyapo u Mwene.

¹⁵ Po u Yoshwa akafingana nabo ulufingo lwamutende ukuti batakwiza pakubaghogha, sona bope abalongozi aba chilundilo bakalusimikizya ulufingo lula ni chilapo.

¹⁶ Bo ghachilapo amasiku matatu ukwandila pakabalilo kako bakafingana ulufingo naba Gibeyoni, aba Izilayeli bakivwa ukuti abantu bakaba bapalamani babo.

¹⁷ Po aba Izilayeli bakabuka pakubuzikizya nukwagha ukuti utwaya twabo tula tukaba to utu: Akaya aka Gibeyoni naka Kefila naka Beloti sona naka Kiliyati Yeyalimu.

¹⁸ Loli aba Izilayeli batakalwa nato ubwite utwaya tula, pachifukwa ichakuti abalongozi aba chilundilo bakalapa mwitabwa ilya Mwene, u Chala uwa ba Izilayeli. Po ichilundilo chosi chikilumbusya na balongozi babo bala.

¹⁹ Loli abalongozi bakabamula bakati, “Aswe tukalapa mwitabwa ilya Mwene u Chala uwa ba Izilayeli, po tutangabapalamasya.

²⁰ Tubitikizye ukuti babanje nubumi, umwakuti u Chala atakatukalalile nukutufunda.

²¹ Tubitikizye ukuti babanje nubumi, loli babanje bambombo bitu abakututenyela inkwi nukutusembela amizi.” Po izi zyo zizyo abalongozi bala bakanena.

²² Po u Yoshwa akabitizya aba Gibeyoni bala nukubalalusya ukuti, “Nkimba choni chicho mukatuzimbula ukuti amwe mukafuma kubutali nkani, bo mukwikala papipi bulo naswe?

²³ Bunubu amwe mwaghuniwa. Amwe mukwiza pakuba mwe bambombo abakutenya inkwi na bakusemba amizi agha mu Nyumba iya Chala wane.”

²⁴ Abantu bala bakamwamula u Yoshwa bakati, “Twe babombi bako tukabuziwa akiza nkani namumo u Mwene u Chala winyu akamulamulila umubombi wache u Mozesi ukuti abape ichisu chosi chinichi nukuzimizyamo abenekaya bosi pamaso papinyu. Po tukabomba bunubu pachifukwa ichakuti tukabanyilagha.

²⁵ Losi ulu aswe tuli munyobe zyako. Bombagha bulo chosi chicho chingakuhobosya.”

²⁶ Panapo u Yoshwa akabapoka munyobe izya ba Izilayeli, po batakabaghogha.

²⁷ Loli pisiku lilalila u Yoshwa akabapela aba Gibeyoni ukuti babanje bambombo abakubatenyela inkwi nukubasembela amizi abantu, sona nagha pachighemo icha Mwene pabuzilo bosi bubo u Mwene akabusala, sona bachili bali bulabula mupaka nilelo bulo.