Yoshwa 8 - IBAYIBOLO 2024

Akaya akakulu nkani aka Ayi kafyuliwa

¹ Po u Mwene akamubuzya u Yoshwa akati, “Utakanyilaye pamo ukuwa amaka. Senda abasilikali bosi nukubuka nabo ku Ayi pakulwa ubwite pakuti namubika munyobe zyako u mwene wamu Ayi poka na bantu bache bosi, nakaya kache akakulu nkani sona ni chisu chache.

² Umubombele u mwene poka nakaya kache ukuyana namumo ukakabombela akaya aka Yeliko. Loli mungafyula ukatundu wabo wesi, poka ni vitekwa vyabo ukuti vibanje vyinyu. Mwiyannye pakulwa nakaya kala umwakuchenusya bulo bo muli kwisinda ukwa kaya kala.”

³ Po u Yoshwa poka na basilikali bosi bakabuka ku Ayi pakulwa ubwite. U Yoshwa akabasenda abasilikali abajivu nkani 30,000 nukubatuma pabusiku.

⁴ Akabalamula akati, “Ivwa kuno. Mubavwamilile abantu banaba kwisinda papipi nakaya kabo. Mutakabukaye kubutali nkani nakaya kala, sona mwebosi mubanje maso.

⁵ Po ane na basilikali babo bali poka nane twe tukwiza pakwanda ukulwa nakaya kala. Bo abantu bakwepamo pakulwa naswe ubwite ngati mumo bakabombela pakwanda, aswe tukwiza pakubachimbila.

⁶ Bakwiza pakutuchimbizya mupaka twennye ukuti baba kubutali nkani nakaya kabo, pakuti bakwiza pakunena ukuti, ‘Bakutuchimbila ukuyana namumo bakatuchimbilila pakwanda pala.’

⁷ Po bo tukubachimbila, amwe muvundumuke mubuzilo bwinyu nukukafyula akaya kala. U Mwene, u Chala winyu akwiza pakukabika munyobe zyinyu.

⁸ Nanti mwakafyula akaya kala mukoche numoto. Bombagha vivyo u Mwene akabalamula. Agha gho malamulo ghagho nkubapa.”

⁹ U Yoshwa akabatuma abasilikali bala, po bakabuka pakuvwamilila mubuzilo bwabo, pakasi pa kaya aka Beteli naka Ayi. Loli u Yoshwa akasyalikila poka na basilikali bache muvisakasa mulamula ubusiku bula.

¹⁰ Indabi yache pandabindabi nkani, u Yoshwa akababungannya poka abasilikali bache, po yuyo na balongozi aba Izilayeli bakabuka ku Ayi.

¹¹ Abasilikali bosi babo bakaba poka nu Yoshwa bakabuka kukaya kala kupipi nu mulyango uwa lupaso. Bakazenga ivisakasa vyabo kulubazu ulwa kumitu, pakasi pa kaya akakulu nkani kala ni kombe.

¹² U Yoshwa akabasendapo abasilikali 5,000 ukuti bavwamilile pakasi pa kaya aka Beteli naka Ayi, kubwinjililo bwizuba.

¹³ Abasilikali bakaba mubuzilo bwabo ubwa bwite na bantu babo bakaba muvisakasa kumitu ukwa kaya akakulu nkani, po abantu abanji bakaba kubwinjililo bwizuba. Ubusiku bulabula u Yoshwa akaghona mwikombe.

¹⁴ Bo u mwene wamu Ayi abennya abasilikali aba Yoshwa, akepamo mukaya akakulu nkani kala pandabindabi nkani, poka na bantu bache pakulwa ubwite naba Izilayeli pa Alaba. Loli atakazimanya ukuti abasilikali bamo bali kwisinda, babo bakiyannya pakulwa nabo ubwite.

¹⁵ U Yoshwa poka naba Izilayeli bakaba ngati po bakubachimbila, po bakachimbilila kunkolongo.

¹⁶ Po abantu bosi aba mukaya kala bakitiziwa ukuti babakonke, bakamukonka u Yoshwa poka na basilikali bache, kubutali nkani nakaya kala.

¹⁷ Atakabapo nayumoyumo umuntu uwakusyalikila mu Ayi pamo mu Beteli ukusita ukubuka pakubachimbizya aba Izilayeli. Po bakakaleka bwazi akaya akakulu nkani kala nukubuka pakubachimbizya aba Izilayeli.

¹⁸ Po u Mwene akamubuzya u Yoshwa akati, “Sonta impalala yiyo yili munyobe yako kukaya aka Ayi, pakuti akaya kanaka nakabika munyobe zyako.” U Yoshwa akasonta impalala yache ku Ayi.

¹⁹ Bo abomba bulo zinizi, abantu babo bakavwamilila bakavundumuka mubuzilo bwabo, nukuchimbilila mukaya akakulu nkani kala pakukafyula. Po panapo na panapo bakakocha.

²⁰ Bo abantu aba mu Ayi baghalabuka, bakennya ilyosi likusuka mukaya akakulu nkani, loli kutakabako nakumokumo ukwakuponela pachifukwa ichakuti aba Izilayeli babo bakaba ngati po bakubachimbila bala bakanyokela pakulwa nabo ubwite.

²¹ Bo u Yoshwa naba Izilayeli bosi, bennya ukuti abantu babo bakavwamilila bakafyula akaya akakulu nkani kala, nukulyennya ilyosi likusuka, bakanyokela pakulwa ubwite nakaya aka Ayi.

²² Bope abantu babo bakavwamilila mukaya akakulu nkani bala bakavundumuka pakulwa ubwite, umwakuti abantu aba mu Ayi bakaba pakasi, bo aba Izilayeli babazyunguliye. Po bakabaghogha bosi ukusita ukumulekapo nayumoyumo umuntu uwakupona pamo uwakuchimbila.

²³ Loli bakamulema u mwene uwamu Ayi nukwiza nawe kwa Yoshwa.

²⁴ Bo aba Izilayeli bamala pakubaghogha abalwani babo mwikombe na munkolongo kuko bakabachimbizizyako, bosi bakanyokela ku Ayi nukubaghogha abantu bosi babo bakasyalikila mulamula.

²⁵ Abantu bosi babo bakaghoghiwa pisiku lilalila, kokuti abanavuli na bakolo bakabapo 12,000.

²⁶ U Yoshwa akendelela pakusonta impalala yache ku Ayi kula mupaka umuntu wesi mukaya aka Ayi akaghoghiwa.

²⁷ Aba Izilayeli bakasenda ivitekwa nu katundu wesi uwa mukaya kala ukuyana namumo u Mwene akamulamulila u Yoshwa.

²⁸ Po u Yoshwa akakocha akaya aka Ayi nukukaleka chisami mupaka nilelo bulo.

²⁹ U mwene uwa mukaya kala akapayikiwa pikwi nukumuleka palapala mupaka pachamabwila. Bo izuba likwinjila, u Yoshwa akabalamula abantu ukuti bisye umuvimba ghula pikwi pala nukughusumbila pamulyango uwa kaya akakulu nkani kala. Po bakalundikapo amabwe, ghagho ghachili ghalipo mupaka nilelo bulo.

Ukufinga ichipyachipya pighamba ilya Ebala

³⁰ Po u Yoshwa akamuzengela ichighemo u Mwene, u Chala uwa ba Izilayeli pighamba ilya Ebala.

³¹ U Yoshwa akabomba vivyo u Mozesi, umubombi uwa Mwene akabalamula aba Izilayeli, sona akachizenga ukuyana namumo zisimbiliwe mu Ndaghilo izya Mozesi pakubombezya amabwe ghagho ghatakadumuliwa ni chela. Palapala akabika kwa Mwene ivyakwiyipa ivyakocha ni vyakwiyipa ivyabupoka.

³² Po palapala pamaso paba Izilayeli, u Yoshwa akasimba pamabwe amalamulo agha Mozesi, ghagho u Mozesi akaghasimba.

³³ Aba Izilayeli bosi poka na bayeni na benekaya na balongozi babo na basongo babo sona na balongi babo bakimilila kumbazu zibili izya Bokosi ilya Lufingo ilya Mwene umwakwenannya na baputi babo bakaba ba Levi bakanyamula Ibokosi lila. Ichigaba chimo icha bantu chikimilila kuntazi ukwa lighamba ilya Gelizimu sona ichigaba ichinji chikimilila kuntazi ukwa lighamba ilya Ebala ukuyana namumo akabalamulila u Mozesi umubombi uwa Mwene, bo akubalamula izyakubomba pakubasaya aba Izilayeli.

³⁴ Pisinda pache u Yoshwa akabelenga amalamulo ghosi umwakwivwika akiza nkani akabelenga sona ulusayo ni vighune ukuyana namumo vikasimbililiwa Mwibuku ilya Malamulo.

³⁵ U Yoshwa akabelenga amalamulo ghosi agha Mozesi pamaso pa chilundilo chosi icha ba Izilayeli. Palapala pakabapo abakolo na bana na bayeni babo bakikalagha pakasi papabo.