Yoshwa 6 - IBAYIBOLO 2024

Akaya akakulu nkani aka Yeliko kafyuliwa

¹ Imilyango iya kaya akakulu nkani aka Yeliko yikighaliliwa pachifukwa ichakubanyila aba Izilayeli. Atakabapo nayumoyumo umuntu uwakwinjila pamo uwakwepamo mukaya mula.

² Po u Mwene akamubuzya u Yoshwa akati, “Nakabika akaya aka Yeliko munyobe zyako, poka nu mwene, sona na basilikali bache.

³ Awe poka na basilikali bako mukazyungulile akaya akakulu nkani kanaka koka pisiku. Loli mubombaye bunubu amasiku sikisi.

⁴ Abaputi seveni balongolele kuntazi ukwa Bokosi ilya Lufingo, bo umuntu wesi anyamuye ipati ilya lupembe ulwadubi munyobe yache. Pisiku ilyaseveni, mukazyungulile akaya akakulu nkani kala akaseveni, bo abaputi bakulizya amapati ghabo.

⁵ Bo balizya amapati ghabo lyoka, loli pakabalilo akatali, sona na maka nkani abantu bosi bakolomokaye. Bunubu ulupaso lwakaya akakulu nkani kala lukwiza pakumongoka, sona panapo na panapo abasilikali bakwiza pakwinjila mukaya mulamula.”

⁶ Po u Yoshwa umwana uwa Nuni akabitizya abaputi nukubalamula ukuti, “Nyamula Ibokosi ilya Lufingo ilya Mwene, sona abaputi seveni balongolele kuntazi ukwa bokosi lila, bo banyamuye amapati.”

⁷ U Yoshwa akabalamula abantu bala akati, “Andako pakukazyungulila akaya kanaka, bo abasilikali babo banyamuye ivilwilo ivya bwite balongoleye kuntazi ukwa Bokosi ilya Lufingo ilya Mwene.”

⁸ Bo u Yoshwa anena amazyu ghanagha, abaputi seveni babo bakanyamula amapati seveni bakalongolela pamaso pa Mwene, bo bakulizya amapati ghabo, sona Ibokosi ilya Lufingo likabakonka mwisinda.

⁹ Abasilikali babo bakaba ni vilwilo ivya bwite bakaba kuntazi ukwa baputi babo bakalizyanga amapati, sona kwisinda ukwa Bokosi lila kukaba abasilikali. Pakabalilo kosi kanaka amapati ghakalilagha.

¹⁰ Loli u Yoshwa akabalamula abantu akati, “Mutakakolomokaye, pamo ukuzuma ichongo mupaka papo nabalamula.”

¹¹ Po abaputi babo bakanyamula Ibokosi ilya Lufingo ilya Mwene lila, bakakazyungulila akaya kala lyoka. Pisinda pache abasilikali bala bakanyokela kuvisakasa vyabo nukughona.

¹² Indabi yache, u Yoshwa akalamusya pandabindabi nkani, po bope abaputi bakanyamula Ibokosi ilya Lufingo ilya Mwene.

¹³ Abaputi seveni babo bakanyamula amapati seveni akalongolela kuntazi ukwa Bokosi lila, bo bakulizya amapati ghabo. Abasilikali babo bakaba ni vilwilo ivya bwite bakaba kuntazi kukwabo, sona kwisinda ukwa Bokosi lila kukaba sona abasilikali babo bakaba ni vilwilo ivya bwite, bo amapati ghakulila.

¹⁴ Pisiku ilyabubili bakakazyungulila sona akaya akakulu nkani kala lyoka, po bakanyokela kuvisakasa vyabo. Bakabomba bunubu amasiku sikisi.

¹⁵ Pisiku ilyaseveni bakalamusya pandabindabi nkani, bakakazyungulila akaya akakulu nkani kala akaseveni ukuyana namumo bakabombelagha bwila. Loli pisiku lilalila bakakazyungulila akaseveni.

¹⁶ Bakakazyungulila akaya akakulu nkani kala akaseveni, bo abaputi bala bakulizya amapati ghabo, po u Yoshwa akabalamula abantu bala akati, “Kolomokagha! U Mwene akabika akaya akakulu nkani kanaka munyobe zyinyu.

¹⁷ Akaya akakulu nkani kanaka poka na vyosi vivyo vili mumo muvinangannye ukuti vibanje chakwiyipa kwa Mwene. Loli umalaya u Lahabu mwene, na bosi abamunyumba yache, mubaleke bumi, pakuti weyuyo akabafisa abatendezi bitu bala

¹⁸ Loli amwe, mutakasendepo nachimochimo ichintu chicho chibaghiye pakunanganika, umwakuti mutakipalaghulile mwebene ukunanganika ukwa visakasa ivya ba Izilayeli.

¹⁹ Ivintu vyosi ivya silivas ni vya golide ni vya mukuba sona ni vya chela vipaghuliliwe kwa Mwene nukubikiwa mubuzilo ubwakusungilamo ichuma chache.”

²⁰ Abaputi bala bakalizya amapati ghabo, po bo abantu bivwa ichongo icha mapati, sona bo abantu bakolomoka nkani, panapo na panapo ulupaso ulwa kaya akakulu nkani kala lukamongoka, umwakuti abasilikali bosi bakinjila mukaya mula nukukafyula.

²¹ Bakakanangannya akaya kosi kala, nukubaghogha abanavuli na bakolo na bana abanandi na baghosi bulo ni ng'ombe ni ng'ozi sona ni mpunda.

²² U Yoshwa akababuzya abatendezi babili bala akati, “Bukagha kunyumba iya malaya yula. Mwize nawe kuno poka na bosi abamunyumba yache ukuyana namumo mukamulayizizya.”

²³ Po bakabuka nukumusenda u Lahabu nu wise nu nyina na bayemba bache sona na bosi abamunyumba yache. Bakiza nawe poka na bosi abamunyumba yache nukubabika pabuzilo bumo kuzi ukwa visakasa ivya ba Izilayeli.

²⁴ Pisinda pache bakakalungulizya akaya kosi akakulu nkani kala poka na vyosi vivyo vikaba mulamula. Loli bakavipaghulila kwa Mwene ivintu vyosi ivya golide ni vya siliva ni vya mukuba sona ni vya chela vivyo bakavibika mubuzilo ubwakusungilamo ichuma chache.

²⁵ U Yoshwa akamuleka nubumi umalaya u Lahabu yula, poka na bosi abamunyumba yache, pachifukwa ichakuti akabafisa abatendezi babo u Yoshwa akabatuma pakutendela akaya akakulu nkani aka Yeliko. Abaluko lwache bachili bakwikala pakasi paba Izilayeli mupaka nilelo bulo.

²⁶ Pakabalilo kalakala u Yoshwa akabasoka nkani abantu akati, “U Mwene amughunaye umuntu wesi yuyo akwiza pakukazenga sona akaya aka Yeliko. Umuntu wesi yuyo akwiza pakwala sona ulwalo lwakaya akakulu nkani kanaka, umwana wache ukatote akwiza pakufwa. Umuntu wesi yuyo akwiza pakubika sona imilyango iya kaya akakulu nkani kanaka, umwana wache unkwangu akwiza pakufwa.”

²⁷ Po u Mwene akaba nu Yoshwa, sona u Yoshwa akendelela pakumanyikwa muchisu chosi chila.