Yoshwa 5 - IBAYIBOLO 2024

¹ Abamwene bosi aba ba Amoli babo bakikalagha kubwinjililo bwizuba ubwa Yolodani, sona na bamwene bosi aba ba Kenani babo bakikalagha mulubazu ulwa Nyanja iya Medeteleniya, bakivwa ukuti u Mwene akakamula ulusoko ulwa Yolodani pamaso paba Izilayeli mupaka abantu bosi bakaloboka. Po bakaba nubogha nkani nukuwa amaka pachifukwa icha ba Izilayeli bala.

Ukusilimuliwa ukwa ba Izilayeli pa Giligali

² Pakabalilo kalakala u Mwene akamulamula u Yoshwa akati, “Biza ivipeni ivya mabwe ukuti ubombe ulwiho ulwakubasilimula aba Izilayeli, babo batakasilimuliwapo.”

³ Po u Yoshwa akabiza ivipeni ivya mabwe nukubasilimula aba Izilayeli bala pighamba ilya Gibeyati Halaloti.

⁴ U Yoshwa akabasilimula abantu pachifukwa ichakuti abanavuli bosi babo bangalwa ubwite bakamalila munkolongo, bo bakwepamo mu Ijiputi.

⁵ Abantu bosi babo bakepamo mu Ijiputi bakasilimuliwa, loli abantu bosi babo bakapapiliwa munkolongo pabulendo bwabo ubwa kwepamo mu Ijiputi batakasilimuliwa.

⁶ Aba Izilayeli bakendendeka munkolongo amaka 40, mupaka abanavuli bosi babo bangalwa ubwite bakamala pakufwa, bo bakwepamo mu Ijiputi pachifukwa ichakuti batakamwivwila u Mwene. Pakuti u Mwene akalapa ukuti banaba batakwiza pakwinjilamo muchisu icha mboto chicho akabalayizya abanyenya babo.

⁷ Loli abana babo bakapyana ichilingo chabo, bo babo u Yoshwa akabasilimula, pakuti bakaba bachili batasilimuliwe, bo bali pabulendo bwabo.

⁸ Bo u Yoshwa amala pakubasilimula bosi, aba Izilayeli bosi bakalindilila muvisakasa vyabo ukuti ivilonda vipole.

⁹ Po u Mwene akamubuzya u Yoshwa akati, “Ilelo nabefya isoni izya buzya bubo mukaba nabo mu Ijiputi.” Ichi cho chifukwa ubuzilo bula bakabwita ukuti Giligali, sona bukwitiziwa ni tabwa linili mupaka nilelo bulo.

¹⁰ Bo aba Izilayeli bachili bali muvisakasa vyabo pa Giligali mwikombe ilya Yeliko, bakaba nu Lusekelo ulwa Pasa pisiku ilya 14 pachamabwila mumwezi uwakwanda ghulaghula.

¹¹ Indabi yache, bo Ulusekelo ulwa Pasa lwamala, bakanda pakulya ivyakulya ivya muchisu mulamula, ichibama chicho chite ni chilungo, sona na malezi aghakukazinga.

¹² Bo banda pakulya ivyakulya ivya muchisu chinichi, umana akaleka pakuwa, po aba Izilayeli batakalya sona umana yula. Loli ukwandila umwaka ghulaghula bakanda pakulya ivyakulya ivya mu Kenani.

U Yoshwa nu muntu uwa panga

¹³ Bo u Yoshwa apalamila ku Yeliko, akinusya icheni chache nukumwennya umuntu yumo imite kuntazi kukwache, bo alemite upanga munyobe yache. Po u Yoshwa akabuka pakumulalusya ukuti, “Nkimba we mumanyani, pamo we mulwani?”

¹⁴ Umuntu yula akamula akati, “Awe, te ne mumanyani, pamo ne mulwani. Loli ne songo uwa basilikali aba Mwene.” Bunubu u Yoshwa akakupama nukumwiputa, po akamulalusya akati, “Nkimba u Mwene, antumiye mazyu ghoni ne mubombi wache?”

¹⁵ Usongo uwa basilikali aba Mwene yula akamwamula u Yoshwa akati, “Vula inkwato zyako, pakuti ubuzilo bubo wimitepo buzelu.” Po u Yoshwa akabomba bunubu.