Yoshwa 4 - IBAYIBOLO 2024

Ivikumbusyo ivya mabwe vyimikiwa

¹ Bo aba Izilayeli bosi bamala pakuloboka ulusoko ulwa Yolodani, u Mwene akamulamula u Yoshwa akati,

² “Sala abanavuli 12 pakasi pabantu bosi, umwanavuli weka ukwimilila uluko lwache.

³ Po ubalamule ukuti basende amabwe 12 pakasi na pakasi mulusoko ulwa Yolodani, pabuzilo ubwenecho bubo abaputi bakanyapo. Nyamula amabwe ghanagha mwize nagho kuvisakasa kuko mukwiza pakughona ubusiku bunubu.”

⁴ Po u Yoshwa akabitizya abanavuli 12 bala babo akabasala, umwanavuli weka ukwimilila uluko lwache

⁵ nukubabuzya ukuti, “Longolela kuntazi ukwa Bokosi ilya Lufingo ilya Mwene u Chala winyu nukwinjila pakasi na pakasi mulusoko ulwa Yolodani. Umuntu wesi abaghale ibwe, ibwe lyoka ukwimilila uluko loka ulwa inko zyosi izya Izilayeli.

⁶ Amabwe ghanagha ghabanje chikumbusyo chinyu, umwakuti muntazi nanti abana binyu bakubalalusya bakuti, ‘Nkimba amabwe ghanagha ghakung'anamula ichoni?’

⁷ mubamulaye ukuti amizi agha mulusoko ulwa Yolodani ghakaleka pakwenda, bo Ibokosi ilya Lufingo ulwa Mwene likuloboka. Amabwe ghanagha cho chikumbusyo icha ba Izilayeli bwila na bwila.”

⁸ Po aba Izilayeli bakabomba vyosi vivyo u Yoshwa akabalamula. Bakanyamula amabwe 12 ghala pakasi na pakasi mulusoko ulwa Yolodani, ukuyana namumo u Mwene akamulamulila u Yoshwa. Umuntu wesi akanyamula ibwe lyoka, ukwimilila uluko lwache nukughabika pasi muvisakasa mula.

⁹ U Yoshwa akaghimika amabwe 12, ghagho ghakaba pakasi na pakasi mulusoko ulwa Yolodani, pabuzilo bubo abaputi babo bakanyamula Ibokosi ilya Lufingo bakimililapo. Amabwe ghanagha ghachili ghalipo palapala mupaka nilelo bulo.

¹⁰ Abaputi babo bakanyamula Ibokosi ilya Lufingo bakaba bachili bimiliye pakasi na pakasi mulusoko ulwa Yolodani mupaka aba Izilayeli bakabomba zyosi zizyo u Mwene akamulamula u Yoshwa, ukuyana namumo u Mozesi akamubuzizya u Yoshwa. Po aba Izilayeli bakaloboka ulusoko lula umwalubilolubilo.

¹¹ Bo bosi bamala pakuloboka, abaputi babo bakanyamula Ibokosi ilya Lufingo ilya Mwene bakabalongolela abantu bosi bala.

¹² Aba Lubeni naba Gadi, sona nuhafu uwaluko ulwa Manase bakaba bakwanda pakuloboka, bo banyamuye ivilwilo ivya bwite, ukuyana namumo u Mozesi akabalamulila.

¹³ Abasilikali papipi 40,000, bo banyamuye ivilwilo ivya bwite, bakaloboka ulusoko pamaso pa Mwene nukubuka kwikombe ilya Yeliko pakulwa ubwite.

¹⁴ Pisiku lilalila u Mwene akamukwezya u Yoshwa pamaso paba Izilayeli bosi. Po aba Izilayeli bakamuchindikagha u Yoshwa mubumi bwache bosi, ukuyana namumo bakamuchindikilagha u Mozesi.

¹⁵ Po u Mwene akamubuzya u Yoshwa akati,

¹⁶ “Ubalamule abaputi babo banyamuye Ibokosi ilya Lufingo ukuti bepemo mulusoko ulwa Yolodani.”

¹⁷ Po u Yoshwa akabalamula abaputi bala akati, “Mwebaya, epamo mulusoko.”

¹⁸ Bo abaputi bala bepamo bulo mulusoko lula bo banyamuye Ibokosi ilya Lufingo, ulusoko lula lukanda pakwenda sona mupaka nukwizula mulubazu mosi ngati mumo lukabela pakwanda.

¹⁹ Pisiku ilya 10 ilya mwezi uwakwanda, aba Izilayeli bakaloboka ulusoko ulwa Yolodani, nukuzenga ivisakasa vyabo pa Giligali kumpaka iyakubufumilo bwizuba ukwa Yeliko.

²⁰ Kulakula u Yoshwa akaghimika amabwe 12 ghala, ghagho bakaghasenda mulusoko ulwa Yolodani.

²¹ Po akababuzya aba Izilayeli akati, “Muntazi nanti abana binyu bakubalalusya bakuti, ‘Nkimba amabwe ghanagha ghakung'anamula ichoni?’,

²² mubamulaye mutinji, ‘Aba Izilayeli bakaloboka ulusoko ulwa Yolodani pachisu ichumizu.’

²³ U Mwene u Chala winyu akakamula ulusoko ulwa Yolodani pamaso papinyu mupaka mwebosi mukaloboka, ukuyana namumo akakamulila Inyanja Inchesamu pamaso papitu mupaka twebosi tukaloboka.

²⁴ Akabomba bunubu umwakuti abantu bosi aba muchisu ichapasi baghamanye amaka amakulu agha Mwene, umwakuti mumunyilaye u Mwene u Chala winyu bwila na bwila.”