Yoshwa 3 - IBAYIBOLO 2024

Aba Izilayeli bakuloboka ulusoko ulwa Yolodani

¹ Pandabindabi nkani u Yoshwa, poka naba Izilayeli bosi bakavisamya ivisakasa vyabo pa Shitimu nukubuka ku Yolodani, nukuzenga ivisakasa vyabo kulakula.

² Bo ghachilapo amasiku matatu, abalongozi aba ba Izilayeli bakendela ivisakasa vyosi

³ nukubalamula abantu ukuti, “Bo mwabennya abaputi banyamuye Ibokosi ilya Lufingo ilya Mwene u Chala winyu, namwe bulo musamaye nukubakonka.

⁴ Bunubu mukwiza pakuyimanya izila iyakuti mwendemo, pakuti mutenditemo nalumo muzila yiniyi. Loli mutakapalamilaye kupipi ni Bokosi ilya Lufingo lila. Pakasi papinyu ni Bokosi lila pabanje amamita 1,000.”

⁵ U Yoshwa akabalamula abantu akati, “Mwiswefye mwebene pakuti indabi u Mwene akwiza pakupela iviswigho pakasi papinyu.”

⁶ Po u Yoshwa akabalamula abaputi akati, “Nyamula Ibokosi ilya Lufingo nukubalongolela abantu.” Aba Levi bala bakalinyamula nukubalongolela abantu ukuyana namumo u Yoshwa akababuzizya.

⁷ Panapo u Mwene akamubuzya u Yoshwa akati, “Ukwanda ilelo nkwiza pakukukwezya pamaso paba Izilayeli bosi, umwakuti bamanye ukuti indi poka nawe ukuyana namumo nkabela poka nu Mozesi.

⁸ Ubalamule abaputi babo banyamuye Ibokosi ilya Lufingo uti, ‘Bo mwafika mulubazu ulwa lusoko ulwa Yolodani, mwinjile panandi bulo mumizi nukwimilila mulamula.’ ”

⁹ Po u Yoshwa akanena naba Izilayeli akati, “Zagha kuno mwivwe amazyu agha Mwene u Chala winyu.

¹⁰ Bunubu mukwiza pakuzyaghannya ukuti u Chala umumi ali pakasi papinyu sona nukuti naloli akwiza pakubachimbizya pamaso papinyu abalwani binyu aba Kenani naba Hiti naba Hivi naba Pelezi naba Giligashi naba Amoli sona naba Yebusi.

¹¹ Po Ibokosi ilya Lufingo ilya Mwene uwa chisu chosi ichapasi liloboke ulusoko ulwa Yolodani ukulongolela kuntazi kukwinyu.

¹² Losi ulu sala abantu 12 pakasi panko izya Izilayeli, umuntu weka ukwimilila uluko lwache.

¹³ Bo abaputi babo banyamuye Ibokosi ilya Lufingo ilya Mwene lila, yuyo we Mwene uwa chisu chosi ichapasi, akanya bulo mumizi mula, amizi ghosi agha mu Yolodani ghakwiza pakuleka pakwenda, sona ghakwiza pakwima ngati lubumba.”

¹⁴ Bo abantu basamya ivisakasa vyabo ukuti baloboke ulusoko ulwa Yolodani, abaputi babo bakanyamula Ibokosi ilya Lufingo bakabalongolela abantu.

¹⁵ Kanaka kakaba kabalilo akakwinulila, po ulusoko ulwa Yolodani lukizulagha. Loli bo abaputi bakanya bulo mu mizi mula,

¹⁶ amizi ghakaleka pakwenda nukwima ngati lubumba ulutali, ukwandila kukaya aka Adamu mupaka kukaya akakulu aka Zaletani, bo amizi aghakwika ku Nyanja Imfwe ghakalundinkana. Po abantu bakalobokagha ulusoko kupipi nakaya akakulu nkani aka Yeliko.

¹⁷ Abaputi babo bakanyamula Ibokosi ilya Lufingo ilya Mwene bakimilila pachisu ichumizu pakasi na pakasi mulusoko lula, bo aba Izilayeli bakuloboka mupaka abantu bosi bakamala pakuloboka.