Yoshwa 24 - IBAYIBOLO 2024

Ukufinga ichipyachipya pa Shekemu

¹ U Yoshwa akazibungannya inko zyosi izya ba Izilayeli pa Shekemu. Akabitizya abasongo na balongozi na balongi sona na makambala agha ba Izilayeli, po bosi bakiza pamaso pa Chala.

² U Yoshwa akababuzya abantu bosi akati, “U Mwene u Chala uwa ba Izilayeli akuti, ‘Kale abanyenya binyu poka nu Tela uwise uwa Abulahamu nu Naholi, bakikalagha kwisila ilya lusoko ulwa Yufuleti nukubiputa abachala abanji.

³ Loli nkamusenda u Abulahamu umunyenya winyu nukumwefyamo muchisu chicho chikaba kwisila ilya lusoko ulwa Yufuleti. Nkamulongolela ukudumusannya muchisu chosi icha Kenani, sona nkamupa abaluko abinji nkani. Nkamupa u Yisaki,

⁴ po u Yisaki nkamupa u Yakobo nu Esabu. U Esabu nkamupa ichisu icha mumaghamba icha Seyili ukuti chibanje mpyana yache, loli u Yakobo na bana bache bakabuka pakwikala mu Ijiputi.

⁵ “ ‘Nkamutuma u Mozesi nu Aloni, sona nkabayivya nkani aba Ijiputi pakubawisizya iviwaya, po pisinda pache nkabefyamo.

⁶ Bo nabefyamo abanyenya binyu mu Ijiputi, mukafika panyanja Inchesamu, loli aba Ijiputi bakabakonka mupaka kunyanja kulakula, bo bakwelite pangolo izya bwite, na pafalasi.

⁷ Loli bakamulilila u Mwene ukuti abavwe, po u Mwene akapela ichisi pakasi papinyu na paba Ijiputi, sona inyanja yikabibizya. Amwe mukazyennya na maso ghinyu zizyo nkababombela aba Ijiputi. Po mukikala munkolongo akabalilo akatali nkani.

⁸ “ ‘Pisinda pache nkabafisya muchisu icha ba Amoli, babo bakikalagha kubufumilo bwizuba ubwa lusoko ulwa Yolodani. Bakalwa namwe ubwite, loli nkababika munyobe zyinyu. Nkabanangannya pamaso papinyu, sona mukachifyula ichisu chabo.

⁹ U Balaki umwana uwa Zipola, yuyo akaba we mwene uwa ba Mowabu, akiyannya pakulwa ubwite naba Izilayeli, po akamutumila intumi u Balamu umwana uwa Bewoli ukuti abaghune.

¹⁰ Ane ntakamwivwila u Balamu, loli akabasaya amwe akinjikinji bulo, sona ane nkabapoka munyobe zyache.

¹¹ “ ‘Po mukaloboka ulusoko ulwa Yolodani nukufika mu Yeliko. Abenekaya aba mu Yeliko bakalwa namwe ubwite, ukuyana namumo bakababombela aba Amoli naba Pelezi naba Kenani naba Hiti naba Giligashi naba Hivi sona naba Yebusi. Loli ane nkababika munyobe zyinyu.

¹² Nkabatumila amavwivwi ghagho ghakabaluma pamaso papinyu. Nkabachimbizya sona abamwene babili aba ba Amoli. Amwe mutakabombezyapo upanga pamo ubwele.

¹³ Po nkabapa ichisu chicho mutakiyulapo nalumo, sona nutwaya utukulu nkani tuto mutazengitepo nalumo. Mukwikala mulamula, nukulya amampesya ni misyunguti vivyo mutabyalitemo.’

¹⁴ “Polelo mumunyile u Mwene nukumubombela mubwanaloli bwinyu bosi. Mwefyemo abachala abanji babo abanyenya binyu bakabiputagha mulubazu lwalusoko ulwa Yufuleti na mu Ijiputi, po mumubombelaye u Mwene.

¹⁵ Nanti mutakulonda pakumubombela u Mwene, po ilelo musalepo yuyo mukwiza pakumubombelagha manyi abachala aba abanyenya binyu, babo bakabachindikagha mulubazu lwalusoko, pamo abachala aba ba Amoli, muchisu chicho mukwikalamo. Loli ane na bamunyumba yane tukwiza pakumubombela u Mwene.”

¹⁶ Po abantu bakamula bakati, “Vitamye viti choni, aswe tutakwiza pakumukana nalumo u Mwene nukubabombela abachala abanji.

¹⁷ Pakuti u Mwene u Chala witu weyuyo akatupoka aswe, poka na banyenya bitu mubuzya mu Ijiputi pakubomba iviswigho, bo tukwennya na maso ghitu. Akatusungilila pabulendo bwitu bosi, sona na pakasi pabantu aba inko zyosi, bo tukudumusannya muvyisu vyabo.

¹⁸ U Mwene akazichimbizya inko zyosi bo tukwennya na maso, sona nukonjelezyapo aba Amoli, babo bakikalagha muchisu chilachila. Po naswe bulo tukwiza pakumubombela u Mwene pakuti we Chala witu.”

¹⁹ Po u Yoshwa akababuzya abantu akati, “Lumo mutangamubombela u Mwene, pakuti we Chala Umuzelu; we Chala uwabuzuba. Atakwiza pakubahobokela pachifukwa icha kusambuka kwinyu, sona ni mbibi zyinyu.

²⁰ Nanti mwamukana u Mwene nukubabombela abachala abanji, po wepe akwiza pakubakana nukubatumila intamyo, sona akwiza pakubazimizya, napapo kale akababombela ivyiza.”

²¹ Loli abantu bakamwamula u Yoshwa bakati, “Awe! Aswe tukwiza pakumubombelagha u Mwene.”

²² Po u Yoshwa akababuzya akati, “Amwe mwe bakaboni pafundo iyakuti mwasala pakumubombela u Mwene.” Abantu bala bakitika bakati, “Momumo, aswe twe bakaboni.”

²³ U Yoshwa akanena sona akati, “Losi ulu efya abachala abayeni babo bali pakasi papinyu, po mumupanje u Mwene u Chala uwa Izilayeli amoyo ghinyu ghosi.”

²⁴ Po abantu bala bakamubuzya u Yoshwa bakati, “Tukwiza pakumubombela u Mwene u Chala witu nukumwivwila.”

²⁵ Pisiku lilalila u Yoshwa akafinga ulufingo na bantu bala, sona u Yoshwa akabapa abantu amalamulo ni ndaghilo, bo bali ku Shekemu kulakula.

²⁶ U Yoshwa akavisimba ivintu vyosi vinivi mwibuku ilya Ndaghilo izya Chala. Po akasenda ibwe ikulu nukulyimika muntende mwikwi ilya mupandapanda papipi ni Chipinda Ichizelu icha Mwene.

²⁷ Po akababuzya abantu bosi bala akati, “Ibwe ili we kaboni witu. Ibwe ili lyivwa vyosi vivyo u Mwene anena naswe. Ibwe linili we kaboni uwakubasusya nanti mukumusambukila u Chala winyu.”

Ubufwe ubwa Yoshwa nu Eleyazala

²⁸ Pabumalilo u Yoshwa akababwezya abantu, po umuntu wesi akabwela.

²⁹ Pisinda pache u Yoshwa umwana uwa Nuni, umubombi uwa Mwene akafwa bo ali na maka 110.

³⁰ Bakamusyila muchisu chache mu Timunati Sela muchisu icha mumaghamba icha Efulayimu, kumitu kwighamba ilya Gashi.

³¹ Aba Izilayeli bakamubombelagha u Mwene pakabalilo kosi aka bumi ubwa Yoshwa, sona na pakabalilo aka balongozi, babo bakabapo bo u Yoshwa afwa. Abalongozi banaba bakavyennya ivintu vyosi vivyo u Mwene akababombela aba Izilayeli.

³² Amafupa agha Yosefu ghagho aba Izilayeli bakiza nagho, bo bakwepamo mu Ijiputi, bakaghasyila mu Shekemu, ubuzilo bubo u Yakobo akaghula ku bana abalumendo aba Hamoli uwise uwa Shekemu ni salabazya izya siliva 100. Po ichisu chila chikaba mpyana iya baluko ulwa Yosefu.

³³ Po u Eleyazala umwana uwa Aloni akafwa nukusyiliwa mu Gibeya, mukaya aka mwana wache u Finehasi, kako bakamupa muchisu icha mumaghamba icha Efulayimu.