Yoshwa 23 - IBAYIBOLO 2024

U Yoshwa akubalagha abantu

¹ Pakachilapo amaka aminji nkani, bo u Mwene abika umutende pakasi paba Izilayeli napa balwani babo bosi. Pakabalilo kanaka u Yoshwa akaba ukuti aghosipa nkani.

² Po akababungannya poka aba Izilayeli bosi, na basongo babo na balongozi babo na balongi babo sona na makambala ghosi nukubabuzya ukuti, “Losi ulu ane naghosipa nkani.

³ Amwe mwiyenezya mwebene ivintu vyosi vivyo u Mwene u Chala winyu azibombela inko zyosi pachifukwa icha mwemwe. Pakuti we Mwene u Chala weyuyo abalwila ubwite.

⁴ Mukumbukaye namumo nazigabila inko zyinyu pakuba mpyana yabo, ichisu icha inko izinji chicho chasyalako, poka ni vyisu vyosi vivyo infyulite kale ukwandila ko kulusoko ulwa Yolodani mupaka ku Nyanja iya Medeteleniya yiyo yili kubwinjililo bwizuba.

⁵ U Mwene u Chala winyu akwiza pakubachimbizyamo bo mukubuka. Amwe mukwiza pakuchifyula ichisu chabo ukuyana namumo u Mwene u Chala winyu akabalayizizya.

⁶ “Polelo muchebaye nkani, sona mwenelezye ukuti mukughakonka amalamulo ghosi ghagho ghasimbiwe mwibuku ilya Ndaghilo izya Mozesi. Mutakalusulaye ululaghilo nalumolumo.

⁷ Mutakangalilaye poka ninko zizyo zyasyala pakasi papinyu. Mutakaghatambulaye amatabwa agha bachala babo, pamo ukulapila mumatabwa agha bachala banaba. Mutakababombelaye, pamo ukumwiputa.

⁸ Loli mumusubilaye u Mwene u Chala winyu ukuyana namumo mwabombelagha mupaka nilelo bulo.

⁹ “Pakuti u Mwene azichimbizya inko inkulu nkani sona ni zyamaka nkani pamaso papinyu. Ukufika ilelo atalipo nayumoyumo umuntu uwakuti angalwa namwe.

¹⁰ Umuntu wesi mumwinyu angabachimbizya abantu 1,000, pachifukwa ichakuti u Mwene u Chala winyu weyuyo akubalwila ubwite ukuyana namumo akabalayizizya.

¹¹ Po mwenelezye ukuti mukumughana u Mwene u Chala winyu.

¹² “Loli nanti mukumusambukila nukwangalilana poka ninko izya bantu babo bachili bakwikala pakasi papinyu sona nukusendelana nabo,

¹³ po mumanye ukuti u Mwene u Chala winyu atakwiza pakuzichimbizya inko zinizi pamaso papinyu. Loli abantu banaba bakwiza pakuba vipingo kukwinyu. Bakwiza pakuba ngati bubavu ubwa ndisa panyuma zyinyu, pamo amivwa mumaso ghinyu. Ichi chikwiza pakubako mupaka papo mwebosi mukwiza pakumala muchisu ichiza chicho u Mwene u Chala winyu abapiye.

¹⁴ “Losi ulu ane akabalilo kane akakufwila kakwana. Amwe mwebosi muzimenye akiza nkani mumoyo na mumuzimu winyu ukuti u Mwene u Chala winyu abapiye ivintu vyosi ivyiza vivyo akabalayizya, sona akwanilisya ivintu vyosi vivyo akabalayizya. Chitalipo nachimochimo chicho akapotwa pakuchikwanilisya.

¹⁵ Loli ukuyana namumo u Mwene u Chala winyu akakwanilisya ivyiza vyosi vivyo akabalayizya, polelo u Mwene angabawisizya ivintu ivibibi mupaka nukubefyamo muchisu ichiza chicho abapa.

¹⁶ Nanti mukulusulannya ulufingo lulo u Mwene u Chala winyu akabalamula, pakubabombela abachala abanji nukubafughamilila, u Mwene akwiza pakubakalalila, po mukwiza pakuzimila lubilolubilo muchisu ichiza chicho abapa.”