Yoshwa 22 - IBAYIBOLO 2024

Inko izya kubufumilo bwizuba zikubwela

¹ Po u Yoshwa akababungannya poka aba Lubeni bosi, naba Gadi bosi sona nuhafu uwaluko ulwa ba Manase

² nukubabuzya ukuti, “Amwe mwabomba zyosi zizyo u Mozesi, umubombi uwa Mwene akabalamula sona mwanyivwila muvyosi vivyo nkabalamula.

³ Amwe mutakabatolokapo abakamu binyu pakabalilo kosi kanaka, loli mwayibomba imbombo yosi yiyo u Mwene u Chala winyu akabapa.

⁴ Losi ulu bwelagha, pachifukwa ichakuti u Mwene u Chala winyu abapa abakamu binyu umutende, ukuyana namumo akabalayizizya. Bwelagha kuchisu chinyu, chicho u Mozesi umubombi uwa Mwene akabapa kwisila ilya lusoko ulwa Yolodani.

⁵ Loli mwenelezye ukuti mukughakonka amalamulo ni ndaghilo zizyo u Mozesi umubombi uwa Mwene akabapa izyakuti: Mumughanaye u Mwene u Chala winyu, pakubomba zizyo akulonda, nukughakonka amalamulo ghache ghosi, nukumwivwila yuyo mwene, pakumubombela na moyo ghinyu ghosi, sona nu muzimu winyu ghosi.”

⁶ Po u Yoshwa akabasaya nukubabwezya, sona bosi bakabwela.

⁷ U Mozesi akabapa banaba ichigaba chimo icha ba Manase ichisu icha Bashani. Loli ichigaba ichinji icha luko ulwa Manase, u Yoshwa akabapa ichisu icha kubwinjililo bwizuba ubwa lusoko ulwa Yolodani, poka na bakamu babo bosi. Bo u Yoshwa akubabwezya abantu, akabasaya

⁸ akati, “Losi ulu bwelagha nu bukabi ubukulu nkani. Senda ivitekwa ivinji nkani poka nu siliva nu golide nu mukuba ni vyela sona na menda amiza nkani nukubagabilako abakamu binyu ivintu vivyo mwabafyula abalwani binyu.”

⁹ Po aba Lubeni, naba Gadi, sona nuhafu uwaluko ulwa Manase bakabaleka aba Izilayeli pa Shilo mu Kenani, nukubwela ku Giliyadi kuchisu chabo, chicho bakachipokela ukuyana namumo u Mwene akalamulila ukwendela mwa Mozesi.

¹⁰ Bo abantu bala bafika mu Geliloti papipi nu lusoko ulwa Yolodani mu Kenani, bakazengako ichighemo ichikulu nkani, sona ichiza mulubazu lwalusoko ulwa Yolodani.

¹¹ Bo aba Izilayeli bivwa ukuti aba Lubeni naba Gadi sona nu hafu uwaluko ulwa Manase bazengite ichighemo mu Geliloti mumpaka iya chisu icha Kenani mulubazu lwalusoko ulwa Yolodani kwisila ilya Izilayeli,

¹² ichilundilo chosi icha ba Izilayeli chikabungana mu Shilo ukuti balwe nabo ubwite.

¹³ Loli ichakwanda aba Izilayeli bakamutuma tasi u Finehasi umwana uwa muputi u Eleyazala kuba Lubeni naba Gadi sona nuhafu uwaluko ulwa Manase muchisu icha Giliyadi.

¹⁴ U Finehasi yula akabuka poka na basongo teni, ukwimilila inko izya ba Izilayeli. Umuntu wesi uwa basongo bala akaba mulongozi uwa nyumba.

¹⁵ Bo bafika mu Giliyadi, bakababuzya aba Lubeni naba Gadi sona nuhafu uwaluko ulwa Manase bakati,

¹⁶ “Pakunena nichilundilo chosi icha Mwene, ‘Nkimba choni chicho mukabutagha ubusubiliwa bwinyu kwa Chala uwa ba Izilayeli bunubu? Amwe mwamusambukila u Mwene pakwizengela mwebene ichighemo!

¹⁷ Ukunanga kuko tukananga pa Pewoli, nkimba kutakatukwana? Mupaka nilelo bulo tutiswefizye twebene kumbibi yitu yila, napapo ichiwaya chabawila abantu aba Mwene.

¹⁸ Nkimba ilelo mukulonda pakuleka pakumukonka u Mwene? “ ‘Nanti ilelo mwamusambukila u Mwene, kokuti indabi akwiza pakubakalalila aba Izilayeli bosi.

¹⁹ Nanti ichisu chinyu chinyazu, po bukagha kuchisu icha Mwene kuko kuli Ichisakasa chache, sona mugabane naswe ichisu chitu. Loli mutakamusambukilaye u Mwene pamo ukudalinkana naswe pakwizengela mwebene ichighemo ichinji ichakulekana ni chighemo icha Mwene u Chala witu.

²⁰ Bo u Akani, umwana uwa Zela aba temusubiliwa pavintu ivipaghuliwa, nkimba u Mwene atakabakalalila aba Izilayeli bosi? Pisiku lilalila atakaba we Akani mwene, yuyo akafwa pachifukwa icha mbibi zyache, awe.’ ”

²¹ Po aba Lubeni naba Gadi sona nuhafu uwaluko ulwa Manase bakabamula abalongozi bala bakati,

²² “Uwamaka Ghosi we Chala! We Mwene! Uwamaka Ghosi we Chala! We Mwene! Achimenye ichifukwa chicho tukabombela bunubu, sona namwe bulo muchimanye! Nanti tukamusambukila u Mwene pachifukwa ichakusita kumwivwila, mutakatwitikizye ukuti tubanje nubumi.

²³ Nanti tutakamwivwila u Mwene nukwizengela ichighemo chitu ukuti tubikilayepo ivyakwiyipa ivyakocha pamo ivyakwiyipa ivya busu, pamo nivyakwiyipa ivyabupoka, muleke umwenecho u Mwene atufunde.

²⁴ “Awe! Tukabomba bunubu pachifukwa ichakunyila ukuti isiku limo abaluko lwinyu bakwiza pakubabuzya abaluko lwitu ukuti, ‘Nkimba mukulonda pakubomba nawe ichoni u Mwene u Chala uwa Izilayeli?

²⁵ Pakuti u Mwene akapanga impaka iya Yolodani pakasi papitu namwe, amwe mwe ba Lubeni naba Gadi. Mute ni chigaba nachimochimo mwa Mwene.’ Po abaluko lwinyu bangabapela abaluko lwitu ukuti baleke pakumwiputa u Mwene.

²⁶ “Ichi cho chifukwa tukati, ‘Zagha twizengele twebene ichighemo, loli chitakabanje chakuti tubikilayepo ivyakwiyipa ivyakocha, pamo ivyakwiyipa ivinji, awe.’

²⁷ Loli tukalonda ukuti chibanje we kaboni pakasi papitu namwe sona na pankulilo zizyo zikwiza muntazi, ukuti tukwiza pakumwiputa u Mwene Mubuzilo Ubuzelu pakubika ivyakwiyipa ivyakocha ni vyabupi sona ni vyakwiyipa ivyabupoka. Po muntazi abaluko lwinyu batakwiza pakubabuzya abaluko lwitu ukuti, ‘Amwe mute ni chigaba mwa Mwene.’

²⁸ “Po nanti bakwiza pakutubuzya aswe, pamo abaluko lwitu, tukwiza pakwamula ukuti, ennya ichighemo ichakuyana ni chighemo icha Mwene, chicho abapapi bitu bakazenga. Chitakaba chighemo chakochelapo ivyakwiyipa manyi vyabupi, awe loli pakuba we kaboni pakasi papitu namwe.

²⁹ “Tutangamusambukila u Mwene, sona tutangamukana ilelo pakuzenga ichighemo ichinji ichakubikilapo ivyakwiyipa ivyakocha pamo ivyakwiyipa ivya busu, pamo ivyakwiyipa ivinji ukuchila ichighemo icha Mwene, u Chala witu chicho chili pantazi pa Chisakasa icha Mwene.”

³⁰ Bo umuputi u Finehasi poka na balongozi na balongozi aba inko izya ba Izilayeli, bivwa zizyo aba Lubeni naba Gadi sona naba muchigaba chimo icha ba Manase bakanena, bakahoboka nkani.

³¹ Po u Finehasi umwana uwa muputi u Eleyazala, akababuzya aba Lubeni naba Gadi sona naba muchigaba chimo icha ba Manase akati, “Ilelo tuzimenye ukuti u Mwene ali naswe, pachifukwa ichakuti amwe mutakaba basubiliwa kwa Mwene, sona mwabapoka aba Izilayeli kulufundo ulwa Mwene.”

³² Po u Finehasi umwana uwa muputi u Eleyazala poka na balongozi bakafuma ku Giliyadi nukunyokela ku Kenani, kuko bakabuka pakukomana naba Lubeni, sona naba Gadi nukubapangila aba Izilayeli namumo bakendela.

³³ Bakahoboka nkani pakwivwa namumo bakendela, po bakamupala u Chala. Loli batakanena sona nizya kubuka pakulwa nabo ubwite, umwakuti bachinangannye ichisu chicho aba Lubeni sona naba Gadi bakikalaghamo.

³⁴ Po aba Lubeni naba Gadi bakachita ichighemo chila itabwa ilyakuti we kaboni, pachifukwa ichakuti abene bakati, “Ichighemo ichi we kaboni witu twebosi uwakuti naloli u Mwene we Chala.”