Yoshwa 21 - IBAYIBOLO 2024

Utwaya utukulu nkani utwa ba Levi

¹ Po isiku limo abalongozi abamunyumba iya Levi bakiza ku muputi u Eleyazala, na kwa Yoshwa, umwana uwa Nuni, sona naku balongozi aba inko zyosi izya ba Izilayeli,

² bo bali pa Shilo mu Kenani. Bakababuzya bakati, “U Mwene akalamula ukwendela mwa Mozesi ukuti mutupe utwaya utukulu nkani utwakwikalamo, poka nu buzilo ubwakudimilako ivitekwa vyitu.”

³ Po aba Izilayeli bakabapa aba Levi utwaya tumo utukulu nkani, poka nu buzilo ubwakudimilako ivitekwa vyabo, ukuyana namumo uMwene akalamulila.

⁴ Bo babomba amayele aghakwanda, chikabawila abamunyumba iya Kohati, ukuyana ni nyumba zyabo. Aba Levi babo bakaba baluko ulwa muputi u Aloni, bakapeghiwa utwaya utukulu nkani 13 utwa ba Yuda, nutwa ba Simiyoni, sona nutwa ba Benjamini.

⁵ Abaluko abanji bosi aba Kohati bakapeghiwa utwaya utukulu nkani 10 utwa ba Efulayimu nutwa ba Dani sona nutwa muchigaba chimo icha ba Manase.

⁶ Abaluko ulwa Gelishoni bakapeghiwa utwaya utukulu nkani 13 utwa ba Isakala nutwa ba Asheli nutwa ba Nafutali sona nutwa muchigaba chimo icha ba Manase mu Bashani.

⁷ Abaluko ulwa Melali bakapeghiwa utwaya utukulu nkani 12 ukuyana ni nyumba zyabo, utwa ba Lubeni nutwa ba Gadi sona nutwa ba Zebuloni.

⁸ Po aba Izilayeli bakabapa aba Levi utwaya utukulu nkani tunutu, poka nu buzilo ubwakudimilako ivitekwa, ukuyana namumo u Mwene akalamulila ukwendela mwa Mozesi.

⁹ Utwaya utukulu nkani utwa baluko ulwa Yuda nutwa ba Simiyoni,

¹⁰ tuto abaluko ulwa Aloni, babo bakaba bamunyumba iya Kohati muluko ulwa Levi, pachifukwa ichakuti amayele aghakwanda ghakabawila babo, bakapokela to utu:

¹¹ Akaya akakulu nkani aka Kiliyati Aliba kokuti Hebuloni, poka nu buzilo ubwakudimilako ivitekwa muchisu icha mumaghamba icha Yuda. Aliba akaba munyenya uwa Anaki.

¹² Loli amaghunda nutwaya tuto tukakazyungulila akaya akakulu nkani kanaka bakamupa u Kalebu umwana uwa Yefune ukuti chibanje mpyana yache.

¹³ Utwaya utukulu nkani, poka nu buzilo ubwakudimilako ivitekwa, tuto abaluko ulwa muputi u Aloni, bakapokela tukaba to utu: Akaya akakulu nkani aka Hebuloni (kako kakaba kaya akakuponelamo umughoghi) naka Libina

¹⁴ naka Yatili naka Eshitemowa

¹⁵ naka Holoni naka Debili

¹⁶ naka Ayini naka Juta sona naka Beti Shemeshi poka nu buzilo ubwakudimilako ivitekwa vyabo. Utwaya utukulu tosi poka tukabapo 9, tuto tukaba twa baluko ulwa Yuda nulwa Simiyoni.

¹⁷ Ukufuma pa baluko ulwa Benjamini bakapokela utwaya utukulu folo utu: Akaya aka Gibeyoni naka Geba

¹⁸ naka Anatoti naka Alinoni poka nu buzilo ubwakudimilako ivitekwa vyabo kokuti utwaya folo.

¹⁹ Utwaya tosi utukulu utwa baputi, babo bakaba baluko ulwa Aloni, tukabapo 13, poka nu buzilo ubwakudimilako ivitekwa.

²⁰ Abamunyumba iya Kohati abanji bosi, babo bakaba baluko ulwa Levi, bakapeghiwa utwaya utukulu, tuto tukaba twa baluko ulwa Efulayimu.

²¹ Muchisu icha mumaghamba icha Efulayimu, bakapokela akaya akakulu aka Shekemu (akaya akakuponelamo umughoghi) sona naka Gezeli

²² naka Kibizayimu naka Beti Holoni poka nu buzilo ubwakudimilako ivitekwa. Utwaya tosi utukulu poka tukabapo folo.

²³ Abaluko ulwa Dani, bakabapa akaya akakulu aka Eliteke naka Gibetoni

²⁴ naka Ayaloni naka Gati Limoni poka nu buzilo ubwakudimilako ivitekwa. Utwaya tosi utukulu poka tukabapo folo.

²⁵ Abaluko uhafu ulwa Manase bakabapa akaya akakulu aka Tanaki naka Gati Limoni poka nu buzilo ubwakudimilako ivitekwa. Utwaya utukulu tunutu tukabapo tubili.

²⁶ Abamunyumba iya Kohati bosi abanji bakapokela utwaya utukulu nkani teni, poka nu buzilo ubwakudimilako ivitekwa.

²⁷ Utu to twaya tuto abamunyumba iya Gelishoni, babo bakaba baluko ulwa Levi, bakapokela tuto tukaba we hafu uwaluko ulwa Manase: Akaya akakulu aka Golani mu Bashani, (akaya akakuponelamo umughoghi), sona naka Be Eshitela poka nu buzilo ubwakudimilako ivitekwa. Utwaya utukulu tunutu tukabapo tubili.

²⁸ Ukufuma pa baluko ulwa Isakala bakabapa akaya akakulu nkani aka Kishiyoni naka Dabelati

²⁹ naka Yalimuti sona naka Eni Ganimu poka nu buzilo ubwakudimilako ivitekwa. Utwaya tosi utukulu poka tukabapo folo.

³⁰ Ukufuma pa baluko ulwa Asheli bakabapa akaya akakulu aka Mishali naka Abidoni

³¹ naka Helikati naka Lehobu poka nu buzilo ubwakudimilako ivitekwa. Utwaya tosi utukulu poka tukabapo folo.

³² Ukufuma pa baluko ulwa Nafutali bakabapa akaya akakulu aka Kedeshi mu Galileya (akaya akakulu nkani akakuponelamo umughoghi) naka Hamoti Doli sona naka Kalitani poka nu buzilo ubwakudimilako ivitekwa. Utwaya tosi utukulu nkani poka tukabapo tutatu.

³³ Utwaya utukulu utwa bamunyumba iya Gelishoni tosi poka tukabapo 13, poka nu buzilo ubwakudimilako ivitekwa.

³⁴ Abamunyumba iya Melali, babo bakaba baluko abanji aba Levi bakapokela utwaya tuto tukaba twa baluko ulwa ba Zebuloni tukaba to utu: Akaya akakulu aka Yokoneyamu naka Kalita

³⁵ naka Dimina sona naka Nahalali poka nu buzilo ubwakudimilako ivitekwa. Utwaya tosi utukulu poka tukabapo folo.

³⁶ Ukufuma pa baluko ulwa Lubeni bakabapa akaya akakulu aka Bezeli naka Yahazi

³⁷ naka Kedemoti sona naka Mefati poka nu buzilo ubwakudimilako ivitekwa. Utwaya tosi utukulu poka tukabapo folo.

³⁸ Ukufuma pa baluko ulwa Gadi bakabapa akaya akakulu aka Lamoti mu Giliyadi, (akaya akakulu nkani akakuponelamo umughoghi) naka Mahanayimu

³⁹ naka Heshiboni sona naka Yazeli poka nu buzilo ubwakudimilako ivitekwa. Utwaya tosi utukulu poka tukabapo folo.

⁴⁰ Utwaya utukulu tuto bakapeghiwa abamunyumba iya Melali babo bakaba baluko ulwa Levi abakusyalako bosi tukabapo 12.

⁴¹ Utwaya utukulu tuto aba Levi, bakapokela muchisu icha Izilayeli tosi poka tukabapo 48, poka nu buzilo ubwakudimilako ivitekwa.

⁴² Akaya kosi akakulu kakaba nu buzilo ubwakudimilako ivitekwa.

Aba Izilayeli bakuchifyula ichisu

⁴³ U Mwene akabapa aba Izilayeli ichisu chosi, chicho akabalayizizya abanyenya babo. Po bakachifyula nukwikalana mulamula.

⁴⁴ U Mwene akabapa umutende kunkuto zyosi, ukuyana namumo akabalayizizya abanyenya babo. Atakabapo nayumoyumo umulwani uwakuti angabapota, pachifukwa ichakuti u Mwene akababika abalwani babo bosi munyobe zyabo.

⁴⁵ U Mwene akakwanilisya zyosi zizyo akabalayizya aba Izilayeli.