Yoshwa 20 - IBAYIBOLO 2024

Utwaya utukulu nkani utwakuponelamo

¹ Po u Mwene akamubuzya u Yoshwa akati,

² “Ubalamule aba Izilayeli uti, ‘Sala utwaya utukulu nkani utwakuponelamo, tuto ane nkabalamula ukwendela mwa Mozesi,

³ umwakuti nanti umuntu amughogha uwamwabo umwakusita kumanya achimbilile kulakula ukuti apone munyobe izya mukamu uwa muntu yuyo akaghoghiwa yula, yuyo akulonda pakutanizya.

⁴ “ ‘Nanti achimbilila mukaya kamo akakulu nkani, imilile pamulyango uwa kaya akakulu nkani kala nukubalingannya abalongozi aba mukaya akakulu nkani kalakala nizya nongwa yache. Po abalongozi bala bamwitikizye pakwinjila mukaya akakulu nkani kala, nukumupa ubuzilo ubwakuti ikalayemo.

⁵ Nanti umukamu yuyo akulonda pakutanizya akumukonka, abalongozi bala batakamubikaye munyobe zyache, pachifukwa ichakuti akamughogha uwamwabo yula umwakusita kumanya, sona atakaba nawe nu lubengo.

⁶ Umuntu yula ikalaye mulamula mupaka inongwa yache yilongiwe pamaso pa chilundilo chosi. Umuntu yula angikala kulakula mupaka umuputi usongo uwa pakabalilo kalakala afwe tasi. Po umuntu yula angabwela kukaya kache kuko akachimbilako.’ ”

⁷ Po aba Izilayeli bakasala akaya akakulu nkani aka Kedeshi mu Galileya muchisu icha mumaghamba icha Nafutali nakaya akakulu nkani aka Shekemu muchisu icha mumaghamba icha Efulayimu sona nakaya aka Kiliyati Aliba kokuti Hebuloni muchisu icha mumaghamba icha Yuda.

⁸ Kubufumilo bwizuba ubwa lusoko ulwa Yolodani mu Yeliko, bakasala akaya akakulu nkani aka Bezeli mwikombe muchisu icha ba Lubeni nakaya akakulu nkani aka Lamoti mu Giliyadi muchisu icha ba Gadi sona nakaya akakulu nkani aka Golani mu Bashani muchisu icha ba Manase.

⁹ Tunutu tukaba twaya utukulu nkani tuto bakatusala pakuba twakuponelamo, nanti umu Izilayeli, pamo umuyeni yuyo akwikala pakasi papabo akamughogha uwamwabo umwakusita kumanya, umwakuti umukamu uwa muntu yuyo akulonda pakutanizya atakamughoghaye, loli inongwa yache yilongiwe pamaso pa chilundilo chosi.