Yoshwa 2 - IBAYIBOLO 2024

U Yoshwa akubatuma abatendezi ku Yeliko

¹ Po u Yoshwa umwana uwa Nuni akabatuma abatendezi babili ukufuma muvisakasa pa Shitimu akati, “Bukagha pakuchitendela ichisu chila, nkaninkani akaya akakulu nkani aka Yeliko.” Abatendezi bala bakabuka nukufikila munyumba iya Lahabu, yuyo akaba we malaya nukwikala mulamula.

² U mwene wamu Yeliko akabuziwa ukuti, “Aba Izilayeli bamo bafika kuno pabusiku, pakuchitendela ichisu.”

³ Panapo na panapo u mwene yula akatuma intumi kwa Lahabu pakumulamula ukuti, “Bafumye kuzi abantu babo bali munyumba yako, pakuti biza pakuchitendela ichisu chitu.”

⁴ Loli umukolo yula akabafisa abanavuli babili bala. Po akati, “Eee, momumo, abanavuli babili bizite kunyumba yane kuno, loli kuko bafumite ntamenyako.

⁵ Kuno bepiteko pachamabwila nkani, bo umulyango uwa kaya akakulu nkani ghuli papipi pakwighaliliwa. Ntayimenye izila yiyo bendite, loli nanti mukubakonka mungabagha.”

⁶ Umukolo yula akabafisa abanavuli bala pachisonje icha nyumba mwisote, lilyo akalambalika palapala.

⁷ Po intumi zila zikepamo mukaya mula pakubachimbizya abatendezi bala, sona umulyango uwa kaya kala ghukighaliliwa. Bakabuka pakubalonda abatendezi bala mupaka piloboko ilya Yolodani.

⁸ Bo abatendezi bala bataghonite, u Lahabu akakwela pachisonje pala,

⁹ nukubabuzya ukuti, “Inzimenye ukuti u Mwene abapa ichisu chosi chinichi, po twebosi tukubanyila, sona amoyo ghitu ghali bulo mumwanyamwanya.

¹⁰ Naloli tukivwa namumo u Mwene akakamulila Inyanja Inchesamu ukuti muloboke, bo mukwepamo mu Ijiputi. Tukivwa sona namumo mukamughoghela u Sihoni nu Ogi, babo bakaba bamwene babili aba Amoli abakubufumilo bwizuba ubwa Yolodani.

¹¹ Bo twivwa bulo zinizi, mukasi mukasunguluka, sona amaka ghakatuwila pachifukwa icha mwemwe. Pakuti tuzimenye ukuti u Mwene u Chala winyu we Chala uwakumwanya ni chisu ichapasi.

¹² Losi ulu lapa pamaso pa Mwene ukuti mukwiza pakubapelela ichisa abamunyumba yane, ukuyana namumo nabapeleye ichisa. Mumpe ichimanyilo icha naloli

¹³ ichakuti mukwiza pakutuleka bumi ane nu tata wane nu mayi wane na bawamwitu na bayemba bane sona na bosi abamunyumba zyabo. Mutakatughoghe, loli mutuleke bumi.”

¹⁴ Po abanavuli bala bakamusimikizizya u Lahabu bakati, “Aswe twiyannya na pakufwa bulo ukuti tukupoke. Nanti utakuvumbula zizyo tukubomba kuno, po naswe bulo tukwiza pakukupelela ichisa mubwanaloli, bo u Mwene akutupa ichisu chinichi.”

¹⁵ Inyumba iya Lahabu yikazengiwa mulupaso lwakaya akakulu nkani kala, po akabisizya abatendezi bala pibwindo nu lukusa.

¹⁶ Po akababuzya akati, “Bukagha kumaghamba umwakuti abantu babo bakubachimbizya, batakabaghe. Muvwame kulakula amasiku matatu, po pisinda pache mungendelela nu bulendo bwinyu.”

¹⁷ Abatendezi bala bakamubuzya u Lahabu bakati, “Tukwiza pakuchisunga ichilapo chicho twafingana nawe

¹⁸ pene papo wapinya ulupote uluchesamu pibwindo ilya nyumba yako. Loli ughuso nu nyoko na bakamu bako na bosi abamunyumba yako babanje mukasi munyumba yako.

¹⁹ Nanti umuntu yumo akufumila kuzi ukwa nyumba, kokuti ibanda lyache likwiza pakuba papache, aswe tukwiza pakuba ninongwa. Loli umuntu wesi yuyo ali poka nawe mukasi, ibanda lyache likwiza pakuba papitu, nanti aghoghiwa.

²⁰ Loli nanti wavumbula zizyo tukubomba kuno, po naswe tutakwiza pakuchisunga ichilapo chicho tukafingana nawe.”

²¹ U Lahabu akabamula akati, “Po zibanje ukuyana namumo mwanenela.” Akalaghana nabo, po bakabuka. Pisinda pache akapinya ulupote uluchesamu pibwindo pala.

²² Abatendezi bala bakabuka kumaghamba nukwikala kulakula amasiku matatu mupaka abantu babo bakabachimbizyanga bakabalonda zila yosi nukupotwa pakubagha, po bakanyokela.

²³ Po abatendezi bala bakika pighamba pala, nukuloboka ulusoko, pabumalilo bakafika kwa Yoshwa umwana uwa Nuni, nukumupangila zyosi zizyo zikababonekela.

²⁴ Bakamubuzya u Yoshwa yula bakati, “Naloliloli u Mwene atupiye ichisu chosi chinichi. Abantu bosi kulakula bakutunyila nkani.”