Yoshwa 19 - IBAYIBOLO 2024

Ichisu chicho akabagabila aba Simiyoni

¹ Bo u Yoshwa abomba amayele aghabubili, ghakabawila aba Simiyoni ukuyana ni nyumba zyabo. Ichisu chabo chikaba mukasi nkani muchisu icha baluko ulwa Yuda.

² Ichisu chicho chikonjeleziwapo chikaba nutwaya utukulu nkani utu: Belisheba naka Sheba naka Molada

³ naka Hazali Shuwali naka Bala naka Ezemu

⁴ naka Elitoladi naka Betuli naka Holima

⁵ naka Zikilagi naka Beti Malikaboti naka Hazali Susa

⁶ naka Beti Lebayoti sona naka Shaluheni. Utwaya tosi poka tukabapo 13, poka nutwaya twache utupalamani.

⁷ Pakabapo sona akaya akakulu nkani aka Ayini naka Limoni naka Eteli sona naka Ashani. Utwaya tosi poka tukabapo folo, poka nutwaya twache utupalamani,

⁸ mupaka ku Balati Beele, kokuti Lama kuntende. Ichi cho chisu chicho abaluko ulwa Simiyoni bakapokela pakuba mpyana yabo ukuyana ni nyumba zyabo.

⁹ Ichisu chicho aba Simiyoni bakapokela chikasendiwa pachigaba icha baluko ulwa Yuda, pachifukwa ichakuti ichisu icha baluko ulwa Yuda chikaba chikulu nkani. Po aba Simiyoni bakapokela ichisu mukasi nkani muchisu icha baluko ulwa Yuda pakuba mpyana yabo.

Ichisu chicho akabagabila aba Zebuloni

¹⁰ Bo u Yoshwa abomba amayele aghabutatu, chikabawila aba Zebuloni ukuyana ni nyumba zyabo. Impaka iya chisu chabo yikafika mupaka ku Salidi.

¹¹ Yikakwela kubwinjililo bwizuba mupaka ku Malala, nukufika ku Dabesheti mupaka ku kalusoko papipi nu Yokoneyamu.

¹² Ukufuma ku Salidi impaka yila yikaghalabukila kubufumilo bwizuba nukubuka ku Kisiloti Taboli mupaka ku Dabelati, nukufika ku Yafiya.

¹³ Ukufuma kulakula yikendelela kubufumilo bwizuba mupaka ku Gati Hefeli, na ku Eti Kazini, po yikafika ku Limoni nukughalabukila ku Neya.

¹⁴ Kulakula impaka yila yikaghalabukila kumitu nukubuka ku Hanatoni nukumalila mwikombe ilya Ifuta Eli.

¹⁵ Pakabapo sona utwaya utukulu nkani utu: Akaya aka Katati naka Nahalali naka Shimuloni naka Idala sona naka Betelehemu. Utwaya tosi utukulu nkani poka tukabapo 12, poka nutwaya twache.

¹⁶ Utwaya utukulu tunutu, poka nutwaya twache tukaba tuto aba Zebuloni bakapokela pakuba mpyana yabo ukuyana ni nyumba zyabo.

Ichisu chicho akabagabila aba Isakala

¹⁷ Bo u Yoshwa abomba amayele aghafolo, chikabawila aba Isakala ukuyana ni nyumba zyabo.

¹⁸ Ichisu chabo chikongannyapo utwaya utukulu nkani utu: Yezileli naka Kesuloti naka Shunemu

¹⁹ naka Hafalayimu naka Shiyoni naka Anahalati

²⁰ naka Labiti naka Kishiyoni naka Ebezi

²¹ naka Lemeti naka Eni Ganimu naka Eni Hada sona naka Beti Pazezi.

²² Impaka yabo yikafika ku Taboli, naku Shahazuma sona na ku Beti Shemeshi, nukumalila pa Yolodani. Utwaya tosi poka tukabapo 16, poka nutwaya twache.

²³ Utwaya utukulu tunutu poka nutwaya twache tukaba tuto abaluko ulwa Isakala bakapokela pakuba mpyana yabo ukuyana ni nyumba zyabo.

Ichisu chicho akabagabila aba Asheli

²⁴ Bo u Yoshwa abomba amayele aghafayivi, chikabawila abaluko ulwa Asheli, ukuyana ni nyumba zyabo.

²⁵ Ichisu chabo chikongannyapo utwaya utukulu nkani utu: Aka Helikati naka Hali naka Beteni naka Akishafu,

²⁶ naka Alameleki naka Amadi sona naka Mishali. Kubwinjililo bwizuba, impaka yikafika kukaya aka Kalimeli sona naka Shiholi Libinati.

²⁷ Po impaka yila yikaghalabukila kubwinjililo bwizuba mupaka ku Beti Dagoni nukufika ku Zebuloni sona na mwikombe ilya Ifuta Eli nukusonta kumitu ku Beti Emeki mupaka ku Neyiyeli nukudumusannya mu Kabuli kumongo.

²⁸ Yikendelela mupaka ku Ebuloni naku Lehobu naku Hamoni sona naku Kana mupaka ku Sidoni Umukulu.

²⁹ Po impaka yila yikanyokela nukusonta ku Lama mupaka kukaya akakulu nkani aka Tile, kako kakaba ni linga, nukughalabukila sona ku Hosa nukumalila pa Nyanja iya Medeteleniya mu Akizibu,

³⁰ naku Uma naku Afeki sona naku Lehobu. Utwaya tosi utukulu poka tukabapo 22, poka nutwaya twache.

³¹ Utwaya utukulu tunutu poka nu twache tukaba to tuto abaluko ulwa Asheli bakapokela pakuba mpyana yabo ukuyana ni nyumba zyabo.

Ichisu chicho akabagabila aba Nafutali

³² Bo u Yoshwa abomba amayele aghasikisi, chikabawila aba Nafutali, ukuyana ni nyumba zyabo.

³³ Impaka yabo yikandila ku Helefu mupaka kwikwi ilya mupandapanda mu Zananimu, nukudumusannya mu Adami Nekebu na mu Yabineli, mupaka ku Lakumi, nukumalila pa lusoko ulwa Yolodani.

³⁴ Po impaka yila yikaghalabukila kubwinjililo bwizuba nukudumusannya mu Azinoti Taboli mupaka ku Hukoki, nukufika ku Zebuloni kuntende naku Asheli kubwinjililo bwizuba sona na kulusoko ulwa Yolodani kubufumilo bwizuba.

³⁵ Utwaya utukulu nkani tuto tukaba na malinga tukaba to utu: Akaya aka Zidimu naka Zeli naka Hamati naka Lakati naka Kineleti

³⁶ naka Adama naka Lama naka Hazoli

³⁷ naka Kedeshi naka Edileyi naka Eni Hazoli

³⁸ naka Yiloni naka Migidali Eli naka Holemu naka Beti Anati sona naka Beti Shemeshi. Utwaya tosi utukulu poka tukabapo 19, poka nutwaya twache.

³⁹ Utwaya utukulu tunutu poka nutwaya twache tukaba to tuto abaluko ulwa Nafutali bakapokela pakuba mpyana yabo ukuyana ni nyumba zyabo.

Ichisu chicho akabagabila aba Dani

⁴⁰ Bo u Yoshwa abomba amayele aghaseveni, chikabawila abaluko ulwa Dani ukuyana ni nyumba zyabo.

⁴¹ Ichisu chabo chikongannyapo utwaya utukulu nkani utu: Zola naka Eshitawoli naka Ili Shemeshi

⁴² naka Shalabini naka Ayaloni naka Itila

⁴³ naka Eloni naka Timuna aka Ekiloni

⁴⁴ naka Eliteke naka Gibetoni naka Balati

⁴⁵ naka Yehudi naka Bene Belaki naka Gati Limoni

⁴⁶ naka Me Yalikoni sona naka Lakoni poka ni chisu chicho chikenannya nakaya akakulu nkani aka Yopa.

⁴⁷ Aba Dani bakapotwa pakuchifyula ichisu chabo, po bakabuka nukulwa ubwite nakaya aka Leshemu. Bakakafyula akaya kala nukubaghogha abantu bosi, po bakikala mulamula nukukita akaya kala itabwa ilya munyenya wabo u Dani.

⁴⁸ Utwaya utukulu tunutu poka nutwaya twache tukaba to tuto abaluko ulwa Dani bakapokela pakuba mpyana yabo ukuyana ni nyumba zyabo.

Ichisu chicho akamugabila u Yoshwa

⁴⁹ Bo aba Izilayeli bamala pakugabana ichisu chila, bakamugabilako u Yoshwa umwana uwa Nuni ichisu chimo,

⁵⁰ ukuyana namumo u Mwene akalamulila. Bakamupa akaya akakulu nkani aka Timunati Sela, kako umwenecho u Yoshwa akalaba muchisu icha mumaghamba icha Efulayimu. Akazengako akaya kache nukwikalana kulakula.

⁵¹ Ivi vikaba vigaba ivya chisu vivyo umuputi u Eleyazala nu Yoshwa umwana uwa Nuni, poka na balongozi aba inko izya Izilayeli bakavigaba pa Shilo pamulyango uwa Chisakasa icha Mwene pakubombezya amayele. Pakubomba bunubu bakamalizya pakuchigaba ichisu chilachila.