Yoshwa 18 - IBAYIBOLO 2024

Ukugabiwa ukwa chisu chicho chikasyalapo

¹ Bo bachifyula ichisu chosi chila, ichilundilo chosi icha ba Izilayeli chikabungana pa Shilo nukuzenga Ichisakasa icha Mwene palapala.

² Pope bulo inko seveni izya ba Izilayeli zikaba zichili zitapokelite ichilingo chabo.

³ Po u Yoshwa akabalalusya akati, “Nkimba mukwiza pakulindilila mupaka liyi bo mutandite pakuchifyula ichisu chicho u Mwene, u Chala uwa banyenya binyu, abapacho?

⁴ Musale abanavuli batatu pakasi pa luko losi. Nkwiza pakubatuma ukuti bachitendele ichisu chosi nukusimba namumo chibeleye ukuyana ni mpyana iya muntu wesi. Nanti babomba bunubu bize bambuzye.

⁵ Bachigabe ichisu chila muvigaba seveni. Abaluko ulwa Yuda bikalaye muchigaba chabo icha kuntende, sona bope abaluko ulwa Yosefu bikalaye muchigaba chabo icha kumitu.

⁶ Bo mwasimba akiza nkani namumo ivigaba seveni ivya chisu chinichi vibeleye, po mumpe vivyo mwasimba. Ane nkwiza pakubomba amayele pamaso pa Mwene, u Chala witu.

⁷ Loli aba Levi batakwiza pakupokelako ichigaba icha chisu chinichi, pachifukwa ichakuti pakuba baputi aba Mwene yo mpyana yabo. Aba Gadi naba Lubeni sona nuhafu uwaluko ulwa Manase bapokela kale impyana yabo kubufumilo bwizuba ubwa lusoko ulwa Yolodani. U Mozesi umubombi uwa Mwene weyuyo akabapa.”

⁸ Bo abanavuli bala bakunyamuka ukuti bande imbombo iya kusimba namumo ichisu chila chibeleye, u Yoshwa akababuzya akati, “Bukagha mutendele ichisu chosi nukusimba namumo chibeleye. Nanti mwasimba mumpe vivyo mwasimba, po ane nkwiza pakubomba amayele pamaso pa Mwene ku Shilo kuno.”

⁹ Po abanavuli bala bakanyamuka pakutendela ichisu chosi nukusimba akiza nkani mwibuku akaya nakaya, poka ni vigaba vyosi seveni. Po bakanyokela kwa Yoshwa, bo ali muvisakasa pa Shilo.

¹⁰ Pa Shilo palapala, u Yoshwa akabomba amayele pamaso pa Mwene, po akabagabila ichisu chila aba Izilayeli ukuyana nuluko lwabo.

Ichisu chicho akabagabila aba Benjamini

¹¹ Bo u Yoshwa abomba amayele aghakwanda, ghakabawila aba Benjamini, ukuyana ni nyumba zyabo. Po bakapokela ichisu chicho chikaba pakasi paba luko ulwa Yuda nulwa Yosefu.

¹² Impaka iyakumitu yikandila palusoko ulwa Yolodani, nukukwela kumitu ukwa Yeliko, nukusonta kubwinjililo bwizuba mupaka kuchisu icha mumaghamba nukufika munkolongo iya Beti Aveni.

¹³ Po impaka yikadumusannya pabusulumuka ubwa Luzi, kokuti Beteli nukwikila ku Ataloti Adala mumaghamba kuntende nkani ukwa Beti Holoni.

¹⁴ Impaka yila yikaghalabukila kuntende kulubazu ulwa bwinjililo bwizuba nukufika mupaka ku Kiliyati Baala, kokuti Kiliyati Yeyalimu, akaya akakulu aka baluko ulwa Yuda. Iyi yikaba mpaka iya kubwinjililo bwizuba.

¹⁵ Impaka iyakuntende yikandila mulubazu nkani ulwa Kiliyati Yeyalimu kubwinjililo bwizuba nukufika mupaka kumbwibwi iya Nefitowa.

¹⁶ Impaka yikika mupaka muntende mwighamba lilyo likenannya ni Kombe ilya Beni Hinomu, kumitu kwikombe ilya Lefayimu nukwikila kwi Kombe ilya Beni Hinomu mupaka kukaya akakulu nkani aka ba Yebusi nukufika ku Eni Logeli.

¹⁷ Impaka yila yikapetamila kumitu nukufika ku Eni Shemeshi, nukufika mupaka ku Geliloti, umwakwenannya niloboko ilya Adumimu. Po yikikila Kwibwe ilya Bohani umwana uwa Lubeni.

¹⁸ Yikendelela mupaka pabusulumuka ubwa kumitu ukwa Beti Alaba nukwikila kwikombe ilya Yolodani.

¹⁹ Po yikakwela kumitu ukwa Beti Hogila, nukufika kumitu ku Nyanja Imfwe, kubwinjililo ubwa lusoko ulwa Yolodani kuntende. Iyi yikaba mpaka iyakuntende.

²⁰ Ulusoko ulwa Yolodani yikaba mpaka iyakubufumilo bwizuba. Zinizi zikaba zyo mpaka izya chisu chicho abaluko ulwa Benjamini bakapokela pakuba mpyana yabo.

²¹ Utwaya utukulu nkani tuto abaluko ulwa Benjamini bakapokela ukuyana ni nyumba zyabo to utu: Akaya aka Yeliko naka Beti Hogila naka Emeki Kezizi

²² naka Beti Alaba naka Zemalayimu naka Beteli

²³ naka Avimu naka Pala naka Ofula

²⁴ naka Kefala Amoni naka Ofini sona naka Geba. Utwaya tosi poka tukabapo 12, poka nutwaya twache utukulu utupalamani.

²⁵ Pakabapo sona akaya akakulu nkani aka Gibeyoni naka Lama naka Beloti

²⁶ naka Mizipa naka Kefila naka Moza

²⁷ naka Lekemu naka Ilipeli naka Talala

²⁸ naka Zela naka Hayelefu naka Yebusi kokuti Yelusalemu naka Gibeya sona naka Kiliyati Yeyalimu. Utwaya tosi poka tukabapo 14 poka nutwaya twache utupalamani. Ichi cho chisu chicho aba Benjamini bakapokela pakuba mpyana ukuyana ni nyumba zyabo.