Yoshwa 17 - IBAYIBOLO 2024

Ichisu icha ba Manase kubwinjilo bwizuba

¹ Po ichigaba chimo icha chisu chila chikapeghiwa kuluko ulwa Manase, ukatote uwa Yosefu. U Makili umunyenya uwa bantu babo bakikalagha mu Giliyadi akaba we katote uwa Manase. U Makili akaba musilikali, umwakuti akapeghiwa ichisu icha Giliyadi, nicha Bashani.

² Po abaluko abanji aba Manase babo bakapeghiwa ichisu bo aba: U Abiyezeli nu Heleki nu Aziliyeli nu Shekemu nu Hefeli nu Shemida. Banaba bakaba baluko abanji aba Manase umwana uwa Yosefu, ukuyana ni nyumba zyabo.

³ U Zelofehadi umwana uwa Hefeli, yuyo akaba mwana uwa Giliyadi, yuyo mwana uwa Makili, yuyo mwana uwa Manase, atakaba na bana abalumendo, loli bene abalindu. Amatabwa ghabo gho agha: U Mala nu Nowa nu Hogila nu Milika sona nu Tiliza.

⁴ Abana banaba bakabuka kwa muputi u Eleyazala, na kwa Yoshwa umwana uwa Nuni, sona na kubalongozi nukuti, “U Mwene akamulamula u Mozesi ukuti atupe ichigaba chimo icha chisu icha bakamu bitu pakuba mpyana yitu.” Po u Yoshwa akabapa ichilingo poka na bakamu abawise ukuyana namumo u Mwene akalamulila.

⁵ Aba Manase bakapokela ivigaba 10 ukonjelezya pachisu icha Giliyadi nu Bashani kubufumilo bwizuba ubwa lusoko ulwa Yolodani,

⁶ pachifukwa ichakuti abana abalindu aba Manase, poka na bana abalumendo bakapokela ichilingo chabo. Ichisu icha Giliyadi chikapeghiwa kubaluko abanji bosi aba Manase.

⁷ Impaka iya chisu icha Manase yikandila ku Asheli mupaka ku Mikimetati kubwinjililo bwizuba ubwa Shekemu. Po yikendelela kuntende mupaka kuchisu icha bantu babo bakikalagha mu Eni Tapuwa.

⁸ Ichisu icha Tapuwa chikaba cha Manase, loli akaya akakulu nkani aka Tapuwa, kako kakaba mumpaka kakaba ka baluko ulwa Efulayimu.

⁹ Impaka yila yikikila kuntende ku kalusoko aka Kana. Utwaya tosi utukulu nkani utwa kuntende ukwa kalusoko kala tukaba twa baluko ulwa Efulayimu, napapo tukaba muchisu icha Manase. Impaka iya Manase yikendelela mupaka kumitu ukwa kalusoko kala nukumalila pa Nyanja iya Medeteleniya.

¹⁰ Ichisu icha luko ulwa Efulayimu chikaba kuntende, po icha luko ulwa Manase chikaba kumitu. Inyanja iya Medeteleniya kubwinjililo bwizuba yikaba yo mpaka iya luko ulwa Manase. Ichisu chabo chikapalamana ni chisu icha baluko ulwa Asheli kumitu, sona ichisu icha baluko ulwa Isakala yikaba mpaka kubufumilo bwizuba.

¹¹ Muchisu icha ba Isakala naba Asheli naba Manase bakaba sona nakaya aka Beti Shani naka Ibuleyamu poka na bantu aba mu Doli naba mu Endoli naba mu Tanaki naba mu Megido naba mu Nafeti sona nutwaya twabo tosi utupalamani.

¹² Loli pope bulo abaluko ulwa Manase bakapotwa pakubachimbizyamo mutwaya twabo aba Kenani umwakuti aba Kenani bala bakendelela pakwikala mulamula.

¹³ Bo aba Izilayeli baba na maka, pope bulo batakabachimbizyamo aba Kenani bosi mutwaya tunutu, loli bakababombezya imbombo iya buzya.

¹⁴ Po abaluko ulwa Yosefu bakamulalusya u Yoshwa bakati, “Nkimba choni chicho twapeghiwa ichisu choka bulo ukuti chibanje mpyana yitu? Aswe twe binji pachifukwa ichakuti u Mwene akatusaya.”

¹⁵ U Yoshwa akabamula akati, “Nanti mwe binji nkani, sona nanti ichisu icha mumaghamba icha Efulayimu chinandi nkani, po bukagha mumusitu muchisu icha ba Pelezi nicha ba Lefayimu. Dumula amakwi nukwiyanizizya mwebene akaya.”

¹⁶ Abaluko ulwa Yosefu bakamwamula bakati, “Ichisu icha mumaghamba chila chinandi nkani, umwakuti chitangatuyana twebosi, sona aba Kenani bosi babo bakwikala mwikombe bali ni ngolo izya chela, ukonjelezyapo bosi babo bakwikala mu Beti Shani, naba mutwaya utupalamani, sona na babo bakwikala mwikombe ilya Yezileli.”

¹⁷ Loli u Yoshwa akababuzya abaluko ulwa Yosefu, babo bakaba bamunyumba iya Efulayimu nu Manase akati, “Naloli mwe binji nkani, sona mwe bamaka nkani. Mutabaghiye pakupeghiwa ichisu choka bulo, awe,

¹⁸ loli ni chisu icha mumaghamba bulo. Napapo musitu, mudumule amakwi nukusenda ubuzilo ubukulu ukuyana namumo mukulondela pakuba chisu chinyu. Amwe mukwiza pakubachimbizyamo aba Kenani napapo bali ni ngolo izya bwite izya chela, sona nukuti bamaka.”