Yoshwa 15 - IBAYIBOLO 2024

Ichisu chicho akalugabila uluko ulwa Yuda

¹ Ichisu chicho chikapeghiwa kubaluko ulwa Yuda ukuyana ni nyumba zyabo chikaba cho ichi: Ichisu chabo chikafika kumpaka iya Edomu, mupaka munkolongo iya Zini, kuntende ukwenecho.

² Impaka yache iyakuntende yikandila kuntende ukwenecho ukwa Nyanja Imfwe

³ nukuloboka kuntende, ukwandila ko kubukwela ubwa Akilabimu nukupuluzannya munkolongo iya Zini mupaka Kadeshi Balineya kuntende. Po impaka yikapuluzannya mukaya aka Heziloni, nukubuka ku Adali mupaka ku Kalika.

⁴ Po yikendelela ku Azimoni mupaka ku kasoko kumpaka iyakumitu iya Ijiputi mupaka ku Nyanja iya Medeteleniya. Iyi yo yikaba mpaka iyakuntende ukwa Yuda.

⁵ Impaka iyakubufumilo bwizuba yikaba yo Nyanja Imfwe, mupaka ku Yolodani. Impaka yache iyakumitu yikandila palapala

⁶ nukupuluzannya mupaka ku Beti Hogila, nukufika kumitu ukwa Beti Alaba mupaka kwibwe ilya Bohani umwana uwa Lubeni.

⁷ Po impaka yila yikenda mupaka ku Debili ukufuma kwikombe ilya Ntamyo, mupaka ku Giligali kumitu, umwakwenannya ni chikwela icha Adumimu kuntende kwikombe lila. Impaka yila yikendelela mupaka ku mizi agha Eni Shemeshi mupaka ku Eni Logeli.

⁸ Po impaka yikakwela kwi Kombe ilya Beni Hinomu kuntende ukwa kaya akakulu nkani aka Yebusi, kokuti we Yelusalemu. Ukufuma pala yikakwela pamwanya pighamba kubwinjililo bwizuba ubwa Ikombe ilya Beni Hinomu kumitu mupaka kwi Kombe ilya Lefayimu.

⁹ Po yikikila kumbwibwi iya mizi agha Nefitowa mupaka mutwaya utwa Efuloni nukwika mupaka ku Baala, kokuti Kiliyati Yeyalimu.

¹⁰ Po yikazyungulila ukubuka kubwinjililo bwizuba ukufuma ku Baala mupaka kwighamba ilya Seyili nukwenda mulubazu kumitu ukwa lighamba ilya Yeyalimu kokuti Kesaloni, yikendelela ukwika pasi ku Beti Shemeshi sona nukudumusannya mu Timuna.

¹¹ Po impaka yila yikafumizannya kumitu ukwa Ekiloni ukung'anamukila ku Shikeloni, ukwenda mulubazu ulwa Ighamba ilya Baala nukufika ku Yabineli. Impaka yila yikamalila panyanja.

¹² Impaka iya kubwinjililo bwizuba lo lubazu ulwa Nyanja iya Medeteleniya. Iyi yo mpaka yiyo yikabazyungulila abantu aba Yuda ukuyana na bamunyumba zyabo.

U Yoshwa akukapota akaya aka Hebuloni naka Debili

¹³ Ukuyana namumo u Mwene akamulamulila u Yoshwa, ichi cho chigaba icha Yuda chicho u Yoshwa akamupa u Kalebu, umwana uwa Yefune: Akaya aka Kiliyati Aliba, kokuti Hebuloni. Aliba akaba we munyenya uwa ba Anaki.

¹⁴ U Kalebu akabachimbizyamo abana aba Anaki, u Sheshayi nu Ahimani, sona nu Talimayi, babo bakaba baluko ulwa Anaki.

¹⁵ Po akubuka pakulwa ubwite nakaya aka Debili, kako kale kakitiziwanga ukuti Kiliyati Sefele.

¹⁶ U Kalebu akati, “Umuntu yuyo angalwa ubwite nukukafyula akaya aka Kiliyati Sefele nkwiza pakumupa umwana wane umulindu u Akisa ukuti abanje muchi wache.”

¹⁷ Po u Otiniyeli umwana uwa Kenazi, yuyo akaba muzuna uwa Kalebu akakapota akaya kala. Po u Kalebu akamupa umwana wache umulindu u Akisa ukuti abanje muchi wache.

¹⁸ Pisiku limo bo u Akisa afika bulo, u Otiniyeli akamufyenga umuchi ukuti amulabe uwise umughunda. Bo u Akisa ika pampunda yache, u Kalebu akamulalusya akati, “Nkimba ukulonda ichoni?”

¹⁹ U Akisa akamwamula uwise akati, “Nalamba, natinji umpeko ichabupi, pachifukwa ichakuti umpiye ichisu ichumizu mu Negebu, po umpeko sona ni mbwibwi izya mizi.” Po Kalebu akamupako imbwibwi izya mizi. Akamupa imbwibwi izya kumitu nizya kuntende.

Utwaya utukulu nkani utwa Yuda

²⁰ Ichi cho chigaba icha luko ulwa Yuda ukuyana ni nyumba zyabo.

²¹ Utwaya utwa kuntende nkani tuto tukaba kupipi ni mpaka iya Edomu tukaba to utu: Kabizele naka Edeli naka Yaguli

²² naka Kina naka Dimona naka Adada

²³ naka Kedeshi naka Hazoli naka Itinani

²⁴ naka Zifi naka Telemu naka Beyaloti,

²⁵ naka Hazoli Hadata naka Keliyoti Heziloni (kokuti Hazoli)

²⁶ naka Amamu naka Shema naka Molada

²⁷ naka Hazali Gada naka Heshimoni naka Beti Peleti

²⁸ naka Hazali Shuwali naka Belisheba naka Biziyotiya

²⁹ naka Baala naka Iyimu naka Ezemu

³⁰ naka Elitoladi naka Kesili naka Holima

³¹ naka Zikilagi naka Madimana naka Sansana

³² naka Lebayoti naka Shilihimu naka Ayini sona naka Limoni: Utwaya tosi utukulu poka tukabapo 29, poka na twaya twache utupalamani.

³³ Utwaya utwa muntende mwighamba tukaba to utu: Akaya aka Eshitawoli naka Zola naka Ashina

³⁴ naka Zanowa naka Eni Ganimu naka Tapuwa naka Enamu

³⁵ naka Yalimuti naka Adulamu naka Soko naka Azeka

³⁶ naka Shalayimu naka Aditayimu naka Gedela sona naka Gedelotayimu: Utwaya tosi utukulu poka tukabapo 14, poka nutwaya twache utupalamani.

³⁷ Pakabapo sona akaya aka Zenani naka Hadasha naka Migidali Gadi

³⁸ naka Dileyani naka Mizipa naka Yokitele

³⁹ naka Lakishi naka Bozikati naka Egiloni

⁴⁰ naka Kaboni naka Lahimasi naka Kitilishi

⁴¹ naka Gedeloti naka Beti Dagoni naka Naama sona naka Makeda: Utwaya tosi utukulu poka tukabapo 16, poka nutwaya twache utupalamani.

⁴² Libina naka Eteli naka Ashani

⁴³ naka Ipita naka Ashina naka Nezibu

⁴⁴ naka Keyila naka Akizibu sona naka Malesha: Utwaya utukulu tukabapo 9, sona nutwaya twabo utwakuzyungulila.

⁴⁵ Ekiloni poka nutwaya twache utukulu nu tunandi.

⁴⁶ Kubwinjililo bwizuba ubwa Ekiloni kunyanja, tosi tunutu tukaba pasi pabulaghili ubwa Ashidodi;

⁴⁷ Pakabapo sona akaya aka Ashidodi, nutwaya twache utupalamani; akaya aka Gaza poka nutwaya twache utupalamani mupaka kukasoko kumpaka iyakumitu iya Ijiputi sona ni Nyanja iya Medeteleniya.

⁴⁸ Muchisu icha mumaghamba pakabapo akaya aka Shamili naka Yatili naka Soko

⁴⁹ naka Dana naka Kiliyati Sefele pamo Debili

⁵⁰ naka Anabu naka Eshitemowa naka Animu

⁵¹ naka Gosheni naka Holoni sona naka Gilo: Utwaya tosi utukulu poka tukabapo 11, poka nutwaya twache tosi utupalamani.

⁵² Pakabapo sona akaya aka Alabu naka Duma naka Eshani

⁵³ naka Yanimu naka Beti Tapuwa naka Afeka

⁵⁴ naka Humuta naka Kiliyati Aliba (kokuti Hebuloni) naka Ziyoli utwaya tosi utukulu poka tukabapo 9 sona nutwaya twache utwakubazyungulila.

⁵⁵ Pakabako sona akaya aka Mawoni naka Kalimeli naka Zifi naka Juta

⁵⁶ naka Yezileli naka Yokideyamu naka Zanowa

⁵⁷ naka Kayini naka Gibeya sona naka Timuna. Utwaya tosi utukulu poka tukabapo 10, poka nutwaya twache tosi utupalamani.

⁵⁸ Pakabako sona akaya aka Halihuli naka Beti Zuli naka Gedoli

⁵⁹ naka Malati naka Beti Anoti sona naka Elitekoni. Utwaya tosi utukulu poka tukabapo 6, poka nutwaya twache tosi utupalamani.

⁶⁰ Pakabapo sona akaya aka Kiliyati Baala kokuti Kiliyati Yeyalimu naka Laba. Utwaya tosi utukulu tukabapo tubili, poka nutwaya twache tosi utupalamani.

⁶¹ Munkolongo mukaba akaya akakulu nkani aka Beti Alaba naka Midini naka Sekaka

⁶² naka Nibishani naka Mbeya sona naka Eni Gedi. Utwaya tosi utukulu poka tukabapo sikisi, poka nutwaya twache tosi utupalamani.

⁶³ Loli abaluko ulwa Yuda bakapotwa pakubachimbizyamo aba Yebusi, babo bakikalagha mu Yelusalemu. Aba Yebusi bachili bakwikala mulamula poka naba Yuda.